Otẹrọnọ whẹ yọ Osẹri Jihova, ẹvẹ o rẹ jọ owhẹ oma nọ iporisi i te bi su owhẹ no uwou ruọ uwou evaọ usi uwoma ota? Whaọ oware utioye o via kẹ Joseph evaọ obọ Micronesia evaọ ukpe 2017. Ọye omariẹ avọ Isẹri Jihova esa efa a jẹ ta usi uwoma kẹ ahwo evaọ ikoliko jọ nọ i siomano.

 Nọ oke uvo o be kẹle no, Isẹri Jihova ene na a tẹ ta usi uwoma te ukoliko osese jọ nọ ahwo nọ a bu te oware wọhọ egba ezeza (600) a be rria. Nọ a te unueri ukoliko na, a tẹ ruẹ osu ẹwho na nọ ọ nyaze ti yere ai. Joseph ọ ta oware nọ o via nọ o yere ai no inọ: “Osu na ọ vuẹ omai nọ ma tẹ gwọlọ, a sae rọ omoto iporisi wọ omai kpohọ iwou nọ e rrọ ukoliko na kpobi. Akpọ o gbe omai unu gaga rekọ ma rọwo kẹe he. Ma gwọlọ nọ mai ọvo ma rẹ nyae ta usi uwoma wọhọ epanọ ma be hai ru.”

 Isẹri Jihova na a tẹ nyavrẹ, yọ a gwọlọ nọ a rẹ ta usi uwoma kẹ ohwo kpobi. A ta nọ: “Ahwo na a dede omai rehọ ziezi yọ a gaviezọ kẹ omai gaga. Fikiere ma jẹ raha oke evaọ uwou ọvuọvo vi epanọ ma rẹro riẹ.”

 Nọ owọwọ o be kẹle no, omoto iporisi jọ ọ tẹ dhẹ vrẹ Joseph isiava soso; ọrọ avọ isiasa omoto na ọ tẹ wẹriẹ. Iporisi na a tẹ nọ Joseph sọ a sae wọe kpohọ iwou nọ i kiọkọ nọ ọ re ta usi uwoma te he. Joseph ọ ta nọ: “Mẹ tẹ ta kẹ ae nọ ijo. Rekọ a rọwo ho, ukpoye a ta kẹ omẹ inọ, ‘Uviemenẹ yọ wha zihe kpo no, fikiere ma gwọlọ wọ owhẹ kpohọ iwou nọ i kiọkọ na.’ Mẹ tẹ tubẹ rọwo kẹ ae keme iwou buobu i gbe gine kiọkọ nọ me ri te he. Nọ ma tẹ be dhẹ kẹle uwou jọ no, iporisi na a vẹ vuẹ omẹ odẹ ahwo nọ a be rria uwou na. A rẹ jẹ vuẹ omẹ nọ otẹrọnọ me te kporo ẹthẹ na, ohwo ọvo ọ gbẹ nya lahwe he, a ti kporo ọgba omoto rai re ahwo na a yo.

 “Ere ma ginẹ rọ nyate iwou na kpobi jẹ ta usi uwoma kẹ ahwo na evaọ ẹdẹ yena. Ma rọ ebe buobu kẹ ahwo yọ ma ru ọruẹrẹfihotọ nọ ma ti ro zihe bru ahwo nọ a gwọlọ wuhrẹ Ebaibol na.”

 Iporisi na a ta kẹ Joseph nọ “usi uwoma nọ ae omarai a nya na o were rai gaga.” Okenọ Isẹri Jihova na a je no ukoliko na kpo evaọ obọ owọwọ ẹdẹ yena, iporisi na a te je veghe obọ kẹ ae evaọ unueri na avọ ovao rai nọ o rrọ ohwohwẹ yọ a kru ebe họ obọ.