Irma ọ be rria orẹwho Germany, yọ ọ kpako te enwenọ ikpe 90 no. Fikinọ o wo asidẹnte isiava soso yọ a ru obẹrọ kẹe ẹsibuobu no, ọ gbẹ be sae ta usi uwoma no uwou ruọ uwou wọhọ epanọ ọ jẹ hai ru vẹre he. Enẹna, ileta Irma o bi kere rọ ta usi uwoma kẹ imoni riẹ gbe ahwo kpobi nọ ọ riẹ. Ileta nọ Irma o bi kere rọ tuduhọ amọfa awọ jẹ sasa ae oma na e be were ahwo gaga te epanọ a be rọ rehọ ifonu sei jẹ nọe okenọ o ti ro kere ọfa se ai. Ahwo buobu a bi kere ileta sei ro yere iei, jẹ ta kẹe re o kere ileta ọfa se ai. Irma ọ ta nọ: “Onana o be kẹ omẹ evawere jẹ tuduhọ omẹ awọ re mẹ ruabọhọ usi uwoma ota na.”

 Irma o re je kere ileta se ahwo nọ a kpako no re. Ọ ta nọ: “Ọkpọkuaye jọ ọ rọ ifonu se omẹ jẹ ta nọ ileta nọ me kere sei e sasa e riẹ oma gaga evaọ okenọ ọzae riẹ o whu. Ọkpọkuaye na o fi ileta na họ Ebaibol riẹ, yọ ẹsibuobu o re sei evaọ owọwọ. Aye ọfa jọ nọ ọzae riẹ o whu kẹle ọ ta nọ ileta nọ me kere sei o fiobọhọ kẹe vi eme epastọ ichọche rai. O wo enọ buobu nọ ọ gwọlọ iyo rai yọ ọ nọ omẹ sọ ọ sai weze bru omẹ ziọ obọ uwou.”

 Aye jọ nọ avọ Irma a gbẹ riẹ oma ọ ta kẹ Irma nọ ọ hai kere ileta sei evaọ okenọ ọ kwa kpohọ oria nọ u thabọ. Irma ọ ta nọ: “Aye na ọ sẹro ileta nọ me je kere sei na kpobi. Nọ aye na o whu no, ọmọtẹ riẹ ọ tẹ rọ ifonu se omẹ. Ọ ta kẹ omẹ nọ o se ileta kpobi nọ me kere se oni riẹ na, yọ o te were iẹe gaga otẹrọnọ me re kere ileta nọ e ta kpahe Ebaibol na sei re.”

 Eva e be were Irma gaga fiki usi uwoma nọ ọ be ta na. Ọ ta nọ: “Mẹ lẹ Jihova re ọ gbẹ hae kẹ omẹ ẹgba nọ mẹ rẹ rọ gọe. Dede nọ mẹ gbẹ be sae ta usi uwoma no uwou ruọ uwou hu, me bi ru utho ẹgba mẹ.”