Danielle nọ ọ rrọ omọvo Isẹri Jihova ọ be rria South Africa. Ẹdẹ jọ, ọ tẹ ruẹ ẹkpa jọ nọ ọ thọrọ ohwo ẹro fihọ oria nọ o kpohọ jẹ dẹ oware. Ọ jọ eva ẹkpa na ruẹ ẹmẹkpa ọsese nọ a re fi ugho họ nọ ugho gbe ekade ATM sa-sa e jọ eva. Danielle ọ gwọlọ nọ ọ rẹ rọ oghẹrẹ kpobi zihe ẹkpa na se ohwo nọ o wo rie. Fikiere, ọ tẹ kiẹ ẹkpa na sọ ọ rẹ ruẹ adrẹse hayo inọmba ifonu ohwo na, rekọ odẹ ọzae jọ ọvo ọ ruẹ. O te kpohọ obọ ebanke sọ a rẹ jọ obei kẹe inọmba hayo adrẹse ọzae na rekọ i te rie obọ họ. Ghele na, o te se inọmba edọkita jọ nọ ọ ruẹ evaọ iresiti nọ ọ jọ ẹkpa na. Ahwo esipito nọ o se na a tẹ rọwo nọ a te rọ inọmba Danielle kẹ ọzae nọ o wo ẹkpa na.

 Ahwo ẹsipito na a te gine se ọzae na, yọ akpọ o gbe rie unu gaga nọ a vuẹ iẹe inọ Danielle ọ ruẹ ẹkpa riẹ nọ o vru na yọ ọ gwọlọ zihe iei sei. Nọ ọzae na ọ nyaziọ obọ uwou amọ Danielle te rehọ ẹkpa na, ọ tẹ ruẹ Danielle avọ ọsẹ riẹ. A tẹ rọ uvẹ yena vuẹ iẹe oware nọ a rọ daoma kpobi ruẹ nọ a zihe ẹkpa na kẹe. A ta kẹe nọ Isẹri Jihova a rrọ, yọ a re ru lele ẹme nọ Ebaibol na ọ ta. Oyejabọ nọ a rọ gwọlọ nọ a re ru eware avọ oruọzewọ ẹsikpobi.—Ahwo Hibru 13:18.

 Nọ euwa jọ e vrẹ nọ, ọzae na o te vi uwou se Danielle avọ ọsẹ riẹ, be wariẹ yere ai rọkẹ epanọ a ro zihe ẹkpa riẹ gbẹ ẹmẹkpa ugho riẹ kẹe. O kere nọ: “Me yere owhẹ gaga rọkẹ epanọ whọ daoma te re whọ sae gwọlọ omẹ. Eva e were omẹ nọ mẹ rọ riẹ owhẹ avọ ahwo uviuwou ra, yọ mẹ te hae kareghẹhọ owhẹ ẹsikpobi keme wha jọ whẹtiẹ whẹtiẹ. Re whọ ginẹ riẹ nọ oware nọ who ru na o da omẹ ẹro, mẹ gwọlọ rọ iroro obọmẹ kẹ owhai ugho jọ. Mẹ riẹ nọ wha be hae raha ugho nọ wha be gọ Ọghẹnẹ rai na. Oware nọ wha ru na u dhesẹ nọ whai yọ emamọ ahwo, yọ uruemu oruọzewọ Danielle na u dhesẹ onana via. Fikiere mẹ gwọlọ wariẹ yere owhẹ, jẹ lẹ nọ Ọghẹnẹ ọ ghale owhẹ evaọ iruẹru egagọ ra.”

 Nọ emera jọ e vrẹ nọ, ọsẹ Danielle avọ ọzae na a tẹ wariẹ ruẹro. Ọzae na o gbiku oware nọ o ru nọ ọ ruẹ ẹmẹkpa ugho ohwo jọ nọ o vru. Ọ ta kẹe nọ kẹle na nọ ọ jẹ dẹ oware evaọ oria jọ, ọ tẹ ruẹ ẹmẹkpa ugho ohwo jọ nọ ọ rrọ otọ. Nọ ọ ruẹ aye nọ o wo ẹmẹkpa ugho na, o te zihe iei kẹe jẹ vuẹ iẹe oware nọ o wọ riẹ zihe ẹkpa na kẹe. Ọ vuẹ riẹ nọ kẹle na, ohwo oruọzewọ jọ o zihe ẹkpa riẹ gbe ugho riẹ nọ u vru kẹe. Ọzae na ọ tẹ ta nọ: “Omoware oruọzewọ gbe emamọ uruemu ovuọvo nọ ohwo o dhesẹ o rẹ lẹliẹ amọfa ru epọvo na re, yọ u re uzuazọ woma kẹ ohwo kpobi evaọ ẹwho na.”