Osẹri Jihova jọ ọ riẹ nọ a re se Bryn nọ ọ be rria obọ North Carolina, evaọ America. Ọ rrọ usu Ogbẹgwae Ẹmeọta-Kugbe Ahwo Iwou-Imu, nọ i re fiobọhọ kẹ Isẹri Jihova nọ e be mọ ruẹ edọktọ nọ ọ rẹ sai siwi ai ababọ azẹ.

 Fiki ẹyao COVID-19 nọ ọ rrọ oria kpobi na, a be kẹ ahwo uvẹ re a nyae ruẹ ahwo nọ a be mọ họ evaọ ispito buobu. Rekọ Bryn ọ gwọlọ rehọ ẹme Ọghẹnẹ sasa ahwo nọ e be mọ evaọ ọspito oma. Fikiere o te se ifonu ọspito jọ re o lele ohwo nọ a re mi uvẹ utioye na ta ẹme.

 Nọ Bryn o se inọmba ọspito na, a tẹ rehọ ifonu na kẹ ethabọ ọga nọ a re mi uvẹ na. Ọ tẹ nọe sọ ọ sae rehọ inọmba ifonu riẹ kẹ Isẹri Jihova nọ a bi siwi evaọ etẹe re ọyomariẹ ọ sai lele ai ta ẹme. Ọ rọwo inọ o ti ru ere.

 Bryn o roro kpahe epanọ ọ sae rọ ta oware nọ u re fiobọhọ kẹ ahwo nọ a be jọ ọspito na ru iruo. Ọ ta kẹ ethabọ ọga nọ a re mi uvẹ na nọ, ahwo nọ a be jọ ọspito na ru iruo na a be daoma gaga. Kẹsena ọ tẹ nọe sọ aikpobi a sasa. Ọ tẹ jẹ ta nọ, o se kpahe uye nọ o be bẹ ahwo evaọ oria kpobi fiki ẹyao COVID-19 na no, mae ga kọ ahwo nọ a bi ru iruo evaọ ọspito.

 Ọzae na ọ ta nọ ẹyao COVID-19 na o ginẹ lẹliẹ iruo rai ga vi epaọ anwẹdẹ no.

 Bryn ọ tẹ ta kẹe nọ: “Ma wo izoẹme sa-sa evaọ oria itanẹte mai nọ e rẹ sai fiobọhọ kẹ ahwo nọ oma o be rrọ gaga fiki iruo rai. Who te rovie jw.org, who ve kere fihọ oria Search na nọ ‘oma nọ o be rrọ ohwo.’ Whọ te rehọ ẹme yena gwọlọ ku izoẹme itieye na nọ e sai fiobọhọ kẹ ahwo iruo rai.”

 Nọ ẹme na ọ gbẹ riẹe unu na, ọzae na ọ tẹ nwani rovie oria itanẹte na je kere fihọ iẹe nọ ‘oma nọ o be rrọ ohwo.’ Ọ tẹ ruẹ izoẹme sa-sa nọ i kiekpahe ẹme na. O te bo nọ: “Kinọ emamọ eware nọ e rrọ etenẹ! Me ti dhesẹ ai kẹ ọga mai. Izoẹme nana i ti fiobọhọ kẹ ahwo iruo mai gaga gbe amọfa dede. Me ti printi rai ghale kẹ ahwo mai.”

 Nọ eka jọ e vrẹ no, Bryn o te se ọga nọ ahwo a re mi uvẹ re a tẹ te nyae ta ẹme Ọghẹnẹ kẹ ahwo ọspito na. Nọ ọ nọe sọ a kpohọ oria itanẹte mai na no, ọ tẹ ta nọ a rovie i rie, yọ a jariẹ printi izoẹme buobu ghale kẹ ahwo rai. A ghale ejọ kẹ enọso gbe ahwo nọ a bi ru egheghẹrẹ iruo efa evaọ ọspito na.

 Bryn ọ ta nọ: “Ọga na ọ ta kẹ omẹ nọ ma be daoma kẹhẹ nọ ma bi ro kere emamọ izoẹme itiena, jẹ rehọ ẹme Ọghẹnẹ sasa ahwo oma. Anọ o wuhrẹ eware buobu no izoẹme na ze.”