Evaọ 2017, Isẹri Jihova ikpegbivẹ jọ nọ e jẹ rria ẹwho nọ a re se Mosquito (Miskito) Coast evaọ obọ Nicaragua a ruọ okọ a te bi kpohọ ẹwho othethabọ jọ. Odẹ okọ rai na Sturi Yamni nọ otofa riẹ o rrọ “Emamọ Usi.” Oniọvo jọ nọ a re se Stephen nọ ọ jọ usu rai ọ ta nọ, “Oware nọ o lẹliẹ omai kpohọ erẹ na họ, re ma tuduhọ Isẹri Jihova nọ e rrọ ẹwho na awọ je lele ai ta usi uwoma. Inievo nọ e rrọ oria na a bu tere he yọ ẹkwotọ nọ a be jọ ta usi uwoma o rrọ ruaro gaga.”

 Isẹri ikpegbivẹ nana a ruọ okọ evaọ oria nọ a re se Pearl Lagoon, a te bi ikilomita 200 (emaele 125) evaọ ethẹ nọ a re se Río Grande de Matagalpa. Euwa ikpegbivẹ soso a bi evaọ ethẹ na. A tubẹ wezẹ oria jọ asohẹrioke dede. A te ti te ẹwho nọ a be nya na. Odẹ ẹwho na La Cruz de Río Grande nọ ọ rrọ akotọ ethẹ na. Kareghẹhọ nọ odẹ okọ rai na evaọ ẹvẹrẹ Miskito họ, “Emamọ Usi.” A riẹ vievie he inọ onya rai na o te wha emamọ usi se ewho buobu nọ e rrọ akotọ ethẹ na evaọ oghẹrẹ nọ a rẹro riẹ hẹ. Nọ inievo na a te ẹwho na, Isẹri Jihova ezeza nọ e be rria etẹe a dede i rai rehọ ziezi.

 Aso ẹdẹ nọ a ro te obei na oware okpẹtu jọ o via. Ofou ọgaga jọ nọ o fou avọ okposo u ru nọ ame ethẹ Río Grande de Matagalpa na o ro bu vrẹta. Asoaso yena, ame ethẹ na o te kporo ruọ ewho nọ e rrọ akotọ ethẹ na. Evaọ edẹ ivẹ nọ i lele i rie, ame na ọ tẹ be wọ ze ọvo. Ame o ku Ọgwa Uvie nọ ọ rrọ ẹwho La Cruz na gbe iwou buobu nọ e rrọ ẹwho na. Inievo nọ e nyaze na a fiobọhọ kẹ ahwo ẹwho na kwa no iwou nọ ame o ku. Ahwo buobu a kwa kpohọ uwou-ehru idhe esa jọ. Osẹri Jihova ọye o wo uwou na.

 Evaọ owọwọ ẹdẹ avọ esa, osu ẹwho na ọ tẹ nyae lẹ inievo na inọ jọ a rọ okọ rai na fiobọhọ kẹ ae, keme okọ yena ọvo ọ ga ziezi nọ a sai ro bi ẹkẹre ọgaga nọ ọ rrọ ethẹ na. Osu na ọ ta nọ jọ a rọ okọ na wọ ahwo riẹ jọ nọ a gwọlọ wọ eware se ahwo nọ owhe na ọ raha eware rai evaọ eria efa. Inievo na a tẹ rọwo.

 Okiokiọ riẹ, ahwo na avọ Isẹri Jihova esa a tẹ ruọ okọ. Stephen ọ ta nọ: “Ethẹ na o je fi ẹkporo gaga evaọ ẹdẹ yena, ire ilogbo i kie fihọ ame na nọ i bi su vrẹ, yọ eria buobu e jọ ethẹ na nọ ame ọ be jọ dhẹ kurẹriẹ vẹrẹ vẹrẹ. Who te te oghẹrẹ nọ ethẹ na o je ro kporo ẹkẹre, ozọ u re mu owhẹ.” Avọ ere na inievo na a rọ udugaga bi okọ na te ewho esa.

 Inievo esa na a rọ uvẹ yena ta ẹme Ọghẹnẹ kẹ ahwo ewho yena keme oware nọ o via na o kẹ rai uye gaga. A tẹ jẹ kẹ ae Awake! 2017 jọ nọ o ta kpahe epanọ ma sai ro siwi uzuazọ mai nọ oware okpẹtu o tẹ via. Uzoẹme Awake! na o nwani kiehọ kẹhẹ!

 Eva e were ahwo na gaga inọ Isẹri Jihova a dhogbo ze jẹ ta usi uwoma kẹ ae. Ọjọ evaọ usu rai ọ ta nọ: “Eva e were omai gaga inọ a nyaze ti fiobọhọ kẹ omai evaọ oke uye nana.” Efa a ta nọ: “A gine you amọfa.” Obọ nọ inievo na a fihọ kẹ Isẹri Jihova nọ e rrọ ẹwho na gbe amọfa o soriẹ nọ ibuobu rai a rọ gaviezọ kẹ ẹme Ọghẹnẹ.