Oma nọ ọzae nọ ma gbẹ jẹ fa ekareti na ọ nwa, o rro vi epanọ me rẹro riẹ. Mẹ rọ ọthobọ thihi ei unwe. O kẹ omẹ uye gaga, me te je roro sọ mẹ rẹ dhugbẹ siọ ekareti ba ẹfa. Oware nana nọ o thọ omẹ obọ na o lẹliẹ omẹ roro sọ mẹ rẹ gbẹ fa ekareti, dede nọ mẹ rọ oma mẹ kpobi kẹ ekareti-efa evaọ ikpe buobu no. Whaọ, jomẹ kaki gbiku epanọ me ro mu ekareti họ ẹfa.

 Ẹwho jọ nọ ọ kẹle ẹwho Buffalo evaọ New York nọ ọ rrọ U.S.A. mẹ jọ whẹro. Ichọche Kathọlik uviuwou mai ọ jẹ hae nya, yọ ma jẹ riẹ yerikugbe ziezi. Isukulu Kathọlik mẹ nya, yọ okenọ mẹ jọ ọmaha mẹ jẹ hai fiobọhọ kẹ ilorida evaọ obọ aruẹri, onọ a re se altar boy. Ọsẹgboni mẹ a jẹ gwọlọ nọ eware i woma kẹ omẹ avọ oniọvo-ọmọtẹ mẹ. Fikiere a jẹ hae kẹ omẹ uvẹ re mẹ fa ebọro hayo zaha oghẹrẹ arozaha ọfa nọ isukulu e tẹ fa no, yọ mẹ jẹ hai ru iruo ubroke re thakpinọ mẹ pase ziezi. Onana u fiobọhọ kẹ omẹ nọ mẹ rọ riẹ epanọ mẹ rẹ rọ jiroro kẹ omamẹ je ru eware sa-sa no anwọ oke emaha ze.

 Nọ mẹ jọ ikpe 17, me te mu epanọ a rẹ fa ekareti họ ewuhrẹ. Evaọ ikpe buobu mẹ jẹ hai wuhrẹ ekareti euwa esa okpẹdẹ evaọ edẹ ezeza ẹkpoka. Yọ koka koka, mẹ jẹ hae rọ euwa buobu roro kpahe onaa sa-sa gbe oghẹrẹ sa-sa nọ a rẹ fa ekareti yọ mẹ jẹ hai rri ividio kpahe epanọ mẹ sae rọ riẹ fa viere. O jẹ hae were omẹ gaga re mẹ gba ibiaro mẹ nọ me te bi wuhrẹ, o tẹ make rọnọ egbọdọ gbe emegha mẹ be rọ fa dede. Mẹ jẹ hae sae rọ obọgo ọvo rọ bẹre ẹwẹ akpala kpohọ abava, hayo tube kporo eblọko rueva dede. Mẹ tẹ te jọ usu ahwo nọ a mae riẹ ekareti ẹfa, yọ me nwini unuẹse buobu nọ me kpohọ afe-ughe nyae họre. Ekareti-efa i te zihe ruọ oware nọ o mai wuzou kẹ omẹ evaọ uzuazọ.

 Me je roro nọ akpọ o woma kẹ omẹ no. Nọ me nwrotọ no yunivasiti, erezọto mẹ i woma gaga. Me te je ru iruo evaọ ekọmpene ologbo jọ nọ mẹ jẹ jọ rẹrote ekọmputa. Eware iwoma buobu i je te omẹ obọ fiki iruo na, me wo uwou obọmẹ oke yena, me te je wo ogbẹnyusu ọmọtẹ jọ re. Ohwo o re roro nọ me wo ẹbẹbẹ ọvuọvo ho evaọ akpọ, rekọ u wo enọ jọ kpahe uzuazọ nọ e jẹ kẹ omẹ uye gaga.

 Re mẹ sae ruẹ iyo enọ mẹ na, me te mu ichọche họ ẹnya isiava ẹkpoka yọ mẹ jẹ hae lẹ se Ọghẹnẹ re o fiobọhọ kẹ omẹ. Rekọ ẹdẹ jọ, ẹme nọ me lele ogbẹnyusu mẹ jọ ta, o te nwene uzuazọ mẹ soso. Mẹ nọ riẹ ẹdẹ yena nọ, “Kọ who tube roro kpahe ẹjiroro nọ ma rọ rrọ uzuazọ no dede? Ebẹbẹ i bu wumuo ho, yọ okienyẹ ọ da otọ fia!” Ọ tẹ vuẹ omẹ nọ ọ jẹ nọ ọkpọ enọ yena vẹre, yọ ọ ruẹ iyo na no evaọ Ebaibol na. Kẹsena ọ tẹ kẹ omẹ obe Whọ Sae Ria Bẹdẹ Bẹdẹ eva Aparadase ọ Otọakpọ a na, jẹ vuẹ omẹ nọ Isẹri Jihova a bi wuhrẹ Ebaibol na kugbei. Mẹ jẹ kake rọwo mi ei hi keme me je roro nọ u fo re me se ebe egagọ efa ha. Rekọ fikinọ mẹ gwọlọ ginẹ riẹ uyo enọ mẹ na, mẹ tẹ ta nọ me re se obe na re mẹ riẹ sọ oware nọ Isẹri Jihova a bi wuhrẹ o te kẹ iyo enọ mẹ na.

 U gbe omẹ unu gaga nọ mẹ ruẹ oware nọ Ebaibol na o gine wuhrẹ. Me wuhrẹ nọ ẹjiroro nọ Ọghẹnẹ o wo kẹ ahwo-akpọ evaọ oke ọsosuọ họ, re a rria bẹdẹ bẹdẹ evaọ aparadase otọakpọ; yọ ẹjiroro riẹ yena o ri nwene he. (Emuhọ 1:28) U gbe omẹ unu re nọ mẹ ruẹ odẹ Ọghẹnẹ Jihova evaọ Ebaibol efafa King James obọmẹ, jẹ ruẹ nọ odẹ yena mẹ be hae lẹ kpahe oke kpobi nọ mẹ tẹ be wariẹ Olẹ Olori na. (Olezi 83:18; Matiu 6:9) Me te ti wo otoriẹ oware nọ Ọghẹnẹ ọ rọ kuvẹ re ahwo-akpọ a ruẹ uye evaọ omoke jọ. Eware nọ me je wuhrẹ na kpobi e jọ gbagba, iyo enọ mẹ na mẹ ruẹ no na! Yọ u duobọte omẹ gaga.

 Mẹ rẹ gbẹ kareghẹhọ epanọ eva e jẹ were omẹ te nọ me mu iwuhrẹ Isẹri Jihova họ ẹnya obọ. Ohwo kpobi evaọ Ọgwa Uvie na ọ jọ sasasa, yọ a jẹ nọ omẹ onọ odẹ mẹ. Evaọ ewuhrẹ ọsosuọ nọ mẹ nya, a kẹ ovuẹ ogbotu obọdẹ jọ nọ a jọ ta kpahe oghẹrẹ elẹ nọ Ọghẹnẹ o re yo. Uzoẹme ovuẹ ogbotu na ọ were omẹ gaga, keme u kri no nọ mẹ be rọ lẹ se Ọghẹnẹ re o fiobọhọ kẹ omẹ. Nọ u no oyena no, me te kpohọ Ekareghẹhọ Uwhu Jesu. Yọ u gbe omẹ unu gaga nọ mẹ ruẹ nọ oke kpobi nọ a tẹ fodẹ oria Ebaibol, makọ emaha dede a re rovie Ebaibol rai a ve bi rri lele ohwo nọ o bi se na. Oke ọsosuọ mẹ riẹ epanọ a re rovie Ebaibol ruẹ oria nọ a gwọlọ se he, rekọ Isẹri Jihova na a fiobọhọ kẹ omẹ gaga yọ a wuhrẹ omẹ epanọ mẹ sai ro rovie eria Ebaibol sa-sa.

 Nọ me kpohọ iwuhrẹ unuẹse buobu no, mẹ tẹ ruẹ nọ emamọ eware ọvo Isẹri Jihova a bi wuhrẹ, yọ onana o were omẹ gaga. Me re wuhrẹ eware buobu evaọ ewuhrẹ kpobi, yo e jẹ hae tuduhọ omẹ awọ wumuo ho. Kẹsena a tẹ vuẹ omẹ nọ a te hai wuhrẹ Ebaibol kugbe omẹ.

 Oware nọ mẹ jẹ jọ oma Isẹri Jihova ruẹ u wo ohẹriẹ gaga no onọ mẹ jẹ hae ruẹ evaọ obọ ichọche mẹ. Mẹ ruẹ nọ Isẹri Jihova na emamọ ahwo, a wo okugbe, yọ a be daoma ru eva were Ọghẹnẹ. Yọ o jọ vevẹ kẹ omẹ nọ a bi dhesẹ uvi uyoyou evaọ udevie rai, onọ o rrọ oka nọ a re ro vuhu Ileleikristi uzẹme.—Jọn 13:35.

 Nọ me bi wuhrẹ Ebaibol na, me te muhọ enwene re mẹ sai koko izi Ọghẹnẹ nọ me bi wuhrẹ evaọ Ebaibol na. Rekọ o jọ omẹ oma nọ mẹ te sae siọ ekareti ba ẹfa ha. O jẹ hae were omẹ gaga re me wuhrẹ je lele amọfa họre evaọ afe-ughe. Nọ mẹ ta ẹme nana kẹ oniọvo nọ o je wuhrẹ Ebaibol kugbe omẹ na, ọ tẹ tuduhọ omẹ awọ nọ: “Gbẹ hae thakpi wuhrẹ, mẹ riẹ nọ whọ te sai ru oware nọ u fo.” Ẹme yena o ginẹ tuduhọ omẹ awọ gaga. Nọ me bi wuhrẹ Ebaibol na, mẹ tẹ gwọlọ nọ me re ru eva were Jihova Ọghẹnẹ.

 Rekọ uzuazọ mẹ u nwene riẹriẹriẹ nọ oware nọ mẹ fodẹ evaọ obọ emuhọ na o via okenọ mẹ rọ rọ ọthobọ thihi ọzae nọ ma gbẹ jẹ fa ekareti unwe. Oware yena nọ o via na o lẹliẹ omẹ roro gaga sọ mẹ sae ginẹ jọ olele Kristi nọ o re lele amọfa rria dhedhẹ otẹrọnọ mẹ gbẹ be fa ekareti. Mẹ jọ eruẹaruẹ nọ e rrọ obe Aizaya 2:3, 4 wuhrẹ nọ ahwo nọ a bi ru lele iwuhrẹ Jihova a ti gbe “wuhrẹ ẹmo-ofio ofa ha.” Yọ Jesu o wuhrẹ ilele riẹ nọ a du ru ozighi hi o tẹ make rọnọ amọfa a bi kienyẹ ae dede. (Matiu 26:52) Nọ me roro kpahe onana kpobi, mẹ tẹ siọ ekareti nọ e rẹ were omẹ gaga na ba ẹfa.

 Nọ oyena o vrẹ no, me te ru lele ohrẹ Ebaibol nọ o ta nọ “wuhrẹ omara avọ utee orọ omarọkẹ Ọghẹnẹ.” (1 Timoti 4:7) Mẹ tẹ jẹ rọ oke nọ mẹ jẹ hae rọ fa ekareti kpobi na ro ru eware nọ i re ru omẹ si kẹle Jihova jẹ gọe ziezi. Ọmọtẹ nọ ma gbẹ jẹ nyusu evaọ oke yena ọ rọwo fihọ eware nọ me je wuhrẹ evaọ Ebaibol na ha, fikiere ma tẹ fa usu na. Evaọ edẹ 24 amara Ọvo ọrọ ukpe 1987, mẹ tẹ họ-ame zihe ruọ omọvo Isẹri Jihova. Nọ omoke jọ o vrẹ no, mẹ tẹ jẹ hae rọ oke mẹ kpobi ro wuhrẹ amọfa Ebaibol na, onọ a re se ọgbodibo oke-kpobi. Yọ anwọ oke yena ze mẹ rọ rrọ iruo odibọgba oke-kpobi na, yọ evaọ oke jọ dede me ru iruo evaọ oria nọ u wuzou iruẹru Isẹri Jihova nọ ọ rrọ New York evaọ U.S.A.

 Enẹna nọ mẹ riẹ uzẹme na kpahe Ọghẹnẹ no na, me duku oware nọ u vru mi omẹ evaọ uzuazọ no. Yọ o gbẹ rrọ omẹ oma nọ mẹ rrọ uzuazọ kufiẹ hẹ. Ukpoye mẹ be rọ uzuazọ mẹ ru emamọ eware, me wo uvi ẹruore kpahe obaro na yọ enẹna eva e be were omẹ ziezi. Me gbe bi ru eware nọ i re ru omẹ oma jaja kẹse kẹse, rekọ orọnikọ oma nọ me re ru jaja họ oware nọ o mai wuzou kẹ omẹ evaọ uzuazọ enẹna ha. Oware nọ o mai wuzou kẹ omẹ họ epanọ mẹ rẹ rọ gọ Jihova Ọghẹnẹ.

 Evaọ okenọ mẹ jẹ fa ekareti na, ẹsikpobi mẹ jẹ hai muẹrohọ ahwo nọ a wariẹ omẹ họ yọ me bi viẹro ku ai, bi roro kpahe epanọ mẹ sae rọ thọ omamẹ nọ ohwo jọ ọ tẹ be họre omẹ. Rekọ enẹna, me bi muẹrohọ ahwo orọnikọ fiki epanọ me bi viẹro ku ai hi rekọ re mẹ sai fiobọhọ kẹ ae. Ebaibol na o fiobọhọ kẹ omẹ zihe ruọ ohwo nọ o re ru ọghọ no, mẹ tẹ jẹ rrọ emamọ ọzae kẹ Brenda aye oyoyou mẹ na.

 Vẹre vẹre, ekareti-efa họ oware nọ o mai wuzou kẹ omẹ evaọ uzuazọ. Rekọ enẹna mẹ rọ oware ofa nọ u woma vi ei ro nwene ẹta riẹ no. Yọ nwane wọhọ epanọ Ebaibol na ọ ta: “Oma na nọ a re ru jaja o rẹ kẹ umutho erere, rekọ omarọkẹ Ọghẹnẹ o rẹ kẹ erere evaọ eware kpobi, keme u wo eyaa orọ uzuazọ enẹna gbe uzuazọ nọ o be tha.”—1 Timoti 4:8.