A yẹ omẹ evaọ Uganda evaọ ubrotọ Gomba. Ahwo buobu evaọ ẹwho na a yogbe gaga. Ma jọ ẹwho na wo ikpẹ ẹlẹtriki hi, fikiere evaọ aso ikpe obọ gbe erọ eke ma re ro tu.

 Ọsẹgboni mẹ a no obọ Rwanda ziọ Uganda ziọ ukane, yọ iruo ẹwọ a je ru. Iti nọ a rẹ da gbe iriwo a jẹ kọ, yọ a jẹ hae rọ iriwo na ru udi jọ nọ a re se waragi nọ ahwo a riẹ gaga. U te no ere no, ọsẹgboni mẹ a jẹ yọrọ erifẹ, ewe, isi, gbe imẹlu. Uruemu ẹwho mai gbe oghẹrẹ nọ a rọ yọrọ omẹ u ru nọ me ro wo eriwo ọthọthọ inọ aye o re yoẹme kẹ ọzae riẹ ẹsikpobi, yọ ọ rẹ ta eriwo riẹ vievie he.

 Nọ mẹ jọ ikpe 23 mẹ tẹ kwa kpobọ Rwanda, yọ mẹ avọ emezae efa nọ e jọ ewha mẹ ma jẹ hai kpohọ eria nọ a re jo gbile kẹse kẹse. Mẹ jẹ hai kpohọ oria jọ nọ a re jo gbile na gaga te epanọ ohwo nọ o wo oria na ọ rọ kẹ omẹ ekade nọ mẹ sae rọ rueva ọvọvẹ. Ifimu ozighi nọ a rẹ jọ họre e jẹ hae were omẹ gaga. Okegbe nọ mẹ jẹ rria gbe oghẹrẹ ifimu nọ me je rri i ru nọ mẹ jẹ hai ro ru ozighi, gbe-ọfariẹ, jẹ jọ ọgba-idi.

 Evaọ ukpe 2000, mẹ avọ ọmọtẹ jọ nọ a re se Skolastique Kabagwira ma tẹ jẹ rria uwou yọ ma yẹ emọ esa. Fiki uruemu ẹwho mai gbe oghẹrẹ nọ a rọ yọrọ omẹ, nọ aye mẹ o te bi yere omẹ hayo mi omẹ oware, mẹ rẹ gwọlọ nọ o kigwẹ totọ. U te no ere no, mẹ jẹ hai rri eware nọ ma wo kpobi wọhọ emẹ ọvo, fikiere oghẹrẹ nọ u je omẹ me re ru ai. Kaso kaso mẹ jẹ hai kpohọ ore, me ve zihe ze evaọ ighọjọ esa udevie aso yọ mẹ da idi no. Nọ me te kpozi me je kporo ẹthẹ nọ Skolastique ọ gbẹ kaki rovie ẹthẹ hẹ me ve mu ei họ ekpe.

 Evaọ oke yena me je ru iruo evaọ ekọmpene nọ i re roiro, yọ mẹ jọ ọga evaọ etẹe, fikiere a jẹ hwa omẹ emamọ osa. Skolastique ọ jẹ hae jọ obọ uwou tẹzẹ omẹ re me kuomagbei kpohọ ichọche Pentecostal keme o je roro nọ oyena u ti nwene uruemu mẹ. Rekọ mẹ gwọlọ nọ me re kpohọ ichọche riẹ na ha. Ukpoye na, me te mu ọmọtẹ ọfa jọ họ elele. Fiki ekpehre uzuazọ evega gbe ọfariẹ nọ me je yeri, Skolastique ọ tẹ kwa bru ọsẹgboni riẹ avọ emọ esa mai.

 Ogbẹnyusu mai jọ nọ ọ kpako no ọ tẹ jẹ ta ẹme kẹ omẹ kpahe ekpehre uzuazọ nọ me bi yeri na. Ọ ta nọ me zihe bru Skolastique. Ọ tẹ jẹ ta nọ uwoma ha re emọ mẹ a rria obojọ yọ mẹ ọsẹ rai ọ be rria obọfa. Fikiere evaọ 2005, mẹ tẹ siọ idi ba ẹda, nyasiọ ọmọtẹ nọ me je lele na ba, je zihe bru Skolastique. Evaọ 2006 mai imava ma tẹ rọo. Ma make rọo no na me gbe je kpe aye mẹ ghele.

 Ẹdẹjọ evaọ 2008, Osẹri Jihova jọ nọ a re se Joël ọ tẹ nyaze te ta usi uwoma kẹ omai. Evaọ emerae jọ nọ i lele i rie, tei te Osẹri Jihova ọfa nọ a re se Bonaventure, a jẹ hae nyaze te ta usi uwoma kẹ omẹ kẹse kẹse. Yọ mẹ jẹ nọ enọ buobu, maero kpahe obe Eviavia. Mẹ jẹ nọ enọ nana re mẹ rọ ere dhesẹ kẹ ae nọ eware nọ a bi wuhrẹ na e gba ha. Wọhọ oriruo, mẹ nọ rai kpahe oware nọ a rọ ta nọ “ogbotu obuobu” nọ a fodẹ evaọ Eviavia 7:9 na a te rria otọakpọ na kpakiyọ oria Ebaibol na o ta nọ a “dikihẹ aro agbara-uvie [Ọghẹnẹ] gbe Omogodẹ na,” Jesu Kristi. Joël ọ romatotọ kiyo enọ mẹ kpobi. Wọhọ oriruo, o dhesẹ Aizaya 66:1 kẹ omẹ, oria nọ Ọghẹnẹ ọ jọ ta nọ otọakpọ na yọ “akpala nọ [ọ] rẹ rọ awọ kpahe.” Onana u gine dhesẹ nọ otọakpọ na ogbotu obuobu na a dikihẹ evaọ aro agbara-uvie Ọghẹnẹ. Me te je se Olezi 37:29 nọ o ta nọ ikiẹrẹe na a te rria otọakpọ na bẹdẹ bẹdẹ.

 Uwhremu na, mẹ tẹ te rọwo nọ a wuhrẹ Ebaibol na kugbe omẹ. Fikiere Bonaventure o te je wuhrẹ Ebaibol kugbe omẹ avọ Skolastique. Nọ ma bi wuhrẹ Ebaibol na, me te mu uruemu mẹ họ enwene. Me wuhrẹ nọ u fo nọ mẹ rẹ kẹ aye mẹ adhẹẹ. Mẹ gbẹ be ta kẹe nọ o kigwẹ totọ kẹ omẹ nọ o te bi yere omẹ hayo mi omẹ oware he, yọ mẹ gbẹ be ta nọ eware kpobi nọ ma wo evaọ uwou na emẹ ọvo ho. Mẹ tẹ jẹ siọ ifimu ozighi ba e rri no re. O jọ bẹbẹ re me nwene ekpehre iruemu mẹ na, keme o gwọlọ nọ me re wo oma-onyẹ gbe omaurokpotọ.

 Ikpe jọ taure ma te ti mu Ebaibol na họ ewuhrẹ na, mẹ rehọ ọmọ ọkpako mẹ nọ a re se Christian kpobọ Uganda re ọ rria kugbe imoni mai jọ. Rekọ nọ me se obe Iziewariẹ 6:4-7 no, mẹ tẹ ruẹ nọ Ọghẹnẹ ọ ta nọ mẹ avọ aye mẹ ma wo iruo nọ ma rẹ rọ rẹrote emọ mai, koyehọ, ma re wuhrẹ ai kpahe izi Ọghẹnẹ. Fikiere ma tẹ nyae rehọ ọmọ na kpozi, yọ eva e were omai kpobi gaga!

 Mẹ jọ Ebaibol na wuhrẹ nọ Jihova yọ Ọghẹnẹ nọ ọ rẹ rọvrẹ, yọ me fi ẹrọwọ họ iẹe nọ ọ rehọ izieraha mẹ kpobi evaọ oke nọ u kpemu rọvrẹ omẹ no. Eva e were omẹ gaga inọ aye mẹ, Skolastique, o kuomagbe omẹ je wuhrẹ Ebaibol na. Nọ ma rọ omamai mudhe kẹ Jihova no, mai imava ma tẹ họ-ame ẹdẹ ọvona evaọ Akpegbivẹ 4, 2010. Enẹna ma fievahọ ohwohwo, yọ ma bi ru lele ehrẹ Ebaibol evaọ uviuwou mai. Eva e be were aye mẹ gaga, keme enẹna nọ me te bi no iruo ze obọ uwou me re kpozi ovavo. Enẹna mẹ be rẹrote aye mẹ ziezi jẹ be kẹe adhẹẹ, mẹ siọ idi ba ẹda no, yọ mẹ gbẹ rrọ eva gaga ha. Fikiere eva e be were iẹe gaga enẹna. Evaọ 2015, a tẹ rọ omẹ mu ọkpako ukoko. Evaọ emọ isoi nọ ma wo na, esa e họ-ame no.

 Nọ Isẹri Jihova a je wuhrẹ Ebaibol kugbe omẹ na, me je mu rọwo eware nọ a je wuhrẹ omẹ na ha, mẹ jẹ hae nọ ae enọ gaga re me vuhu uzẹme na kẹ omamẹ. Oware jọ nọ a je ru nọ o jẹ were omẹ gaga họ Ebaibol na a jẹ rọ kiyo enọ mẹ kpobi. Mẹ avọ aye mẹ ma ruẹ vuhumu nọ ahwo nọ a be gọ Ọghẹnẹ uzẹme na a re koko izi riẹ kpobi, orọnikọ enọ e were e rai ọvo ho. Eva e be were omẹ gaga inọ me wo emamọ usu kugbe Jihova enẹna jẹ be gọe evaọ ukoko riẹ. Nọ me te rri oghẹrẹ uzuazọ nọ me je yeri vẹre gbe onọ me bi yeri enẹna, mẹ riẹ nọ Ọghẹnẹ ọ sai fiobọhọ kẹ ohwo kpobi nọ o wo emamọ eva nwene ekpehre uruemu riẹ re ọ sae gọe.