Ichọche Kathọlik ma jẹ nya evaọ ẹwho Rochester nọ ọ rrọ New York. Ọsẹgboni mẹ a hẹriẹ evaọ okenọ mẹ jọ ikpe eree. Fikiere evaọ udevie oka, mẹ jẹ hae jọ kugbe oni mẹ evaọ iwou nọ a ruẹrẹhọ kẹ iyogbe, kẹsena evaọ urere oka, mẹ vẹ jọ kugbe ọsẹ mẹ evaọ eria nọ ikpahwo a rrọ nọ ọ jẹ rria. Nọ mẹ ruẹ epanọ oni mẹ ọ be thuẹ, be rọ akọ kpena re ọ sae yọrọ emọ ezeza, oware nọ me je roro kpahe kpobi họ epanọ mẹ sai ro fe re mẹ sai fiobọhọ kẹ uviuwou mẹ.

 Ọsẹ mẹ ọ jẹ gwọlọ nọ eware i woma kẹ omẹ evaọ uzuazọ, fikiere o te ru re mẹ nyae ruẹ epanọ eware e rrọ evaọ isukulu jọ nọ a re jo wuhrẹ kpahe epanọ a rẹ rọ rẹrote ehọtẹle. Isukulu na e were omẹ gaga, fikiere me te fi odẹ hotọ, yọ me je roro nọ Ọghẹnẹ ọ be rọ ere kuyo olẹ mẹ nọ mẹ rọ gwọlọ fe je wo evawere na. Evaọ ikpe isoi soso, me wuhrẹ kpahe oghẹrẹ nọ a rẹrote ehọtẹle, izi nọ e rẹ kpọ iruo sa-sa, gbe oghẹrẹ a rẹ rọ rẹrote ugho evaọ ekọmpene; yọ evaọ oke yena me je ru iruo evaọ ehọtẹle jọ nọ a re jo fiedhọ re evaọ Las Vegas nọ ọ rrọ Nevada.

 Evaọ okenọ mẹ jọ ikpe 22, mẹ jọ ethabọ evaes prẹsidẹnte ehọtẹle jọ nọ a rẹ jọ fiedhọ. Ahwo a je rri omẹ nọ me fe ziezi yọ akpọ woma kẹ omẹ no, emu nọ ọ mai woma mẹ jẹ hae re yọ enwaene nọ e mae ghae mẹ jẹ hae da. Egbẹnyusu mẹ nọ ma gbe je ru iruo a jẹ hae vuẹ omẹ nọ, “Tẹrovi oware nọ o mai wuzou evaọ akpọ na, koyehọ ugho.” Evaọ iroro rai, ugho họ oware nọ o rẹ kẹ uvi evawere.

 Evaọ iruo mẹ na, mẹ jẹ hae rẹrote edafe nọ e jẹ hae nyaze ti fiedhọ evaọ Las Vegas. Dede nọ a fe diezọ, a wọhọ ahwo nọ eva e be were he. Yọ u te oria jọ, eva e gbẹ jẹ were omẹ gbe he. Uzẹme riẹ họ epanọ me wo ugho te, ere mẹ jẹ ruawa te, yọ evaọ aso buobu mẹ jẹ hae wezẹ hẹ. Me te je roro kpahe epanọ me re ro kpe omamẹ no. Oghẹrẹ uzuazọ nọ me je yeri na o lẹliẹ akpọ vẹso omẹ, o tẹ jẹ lẹliẹ omẹ nọ Ọghẹnẹ nọ, “Ẹvẹ mẹ sai ro wo uvi evawere?”

 Evaọ oke yena, inievo emetẹ ivẹ mẹ jọ nọ i kurẹriẹ ruọ Isẹri Jihova no a tẹ kwa ziọ Las Vegas. Dede nọ mẹ jẹ hae rọwo mi ai ebe Isẹri Jihova se he, mẹ jẹ hae rọwo nọ a rọ Ebaibol obọmẹ lele omẹ ta ẹme. Evaọ Ebaibol mẹ, ekọlọ ọwawae a ro kere eme Jesu, fikinọ mẹ rọwo ẹme kpobi nọ Jesu ọ ta, kọ eme yena inievo mẹ na a jẹ hae mai ro lele omẹ ta ẹme. Yọ mẹ jẹ hai se Ebaibol na kẹ omobọ mẹ re.

 Eware buobu nọ me je se i je gbe omẹ unu. Wọhọ oriruo Jesu ọ ta nọ: “Wha tẹ be lẹ, wha du dhe eme ẹwẹwariẹ hẹ wọhọ egedhọ, keme a roro nọ a re ti yo elẹ rai fiki eme ibuobu rai.” (Matiu 6:7, The New American Bible) Whaọ ozerẹ jọ ọ kẹ omẹ uwoho Jesu jẹ ta nọ otẹrọnọ mẹ tẹ lẹ se uwoho na, be wariẹ olẹ Ọsẹ Mai na isia ikpe gbe olẹ Hail Mary na isia ikpe, Ọghẹnẹ ọ tẹ kẹ omẹ unuigho kpobi nọ mẹ gwọlọ. Rekọ me te bi ru epanọ ọ ta nọ, kọ ogbẹrọnọ eme evona me bi dhe ẹwẹwariẹ na? Me te je se eme Jesu nọ e ta nọ: “Wha se ohwo ọvo ọsẹ evaọ otọakpọ họ, Ọsẹ ọvo wha wo evaọ obọ odhiwu.” (Matiu 23:9, NAB) Me te je roro nọ, ‘Kọ fikieme mẹ avọ amọfa nọ ma gbe bi kpohọ ichọche Kathọlik ma bi ro se izerẹ ichọche mai “Efada”?’

 Nọ me se obe Jemis evaọ Ebaibol na me ro muhọ eroro gaga kpahe oghẹrẹ uzuazọ nọ me je yeri na. Evaọ uzou avọ ene, Jemis o kere nọ: “Kọ whọ gbẹ riẹ nọ ohwo nọ o you akpọ na u dhesẹ nọ ọwegrẹ Ọghẹnẹ ọ rrọ? Fikiere, ohwo kpobi nọ ọ gwọlọ you akpọ na o bi ru omariẹ fihọ ọwegrẹ Ọghẹnẹ.” (Jemis 4:4, NAB) Owọ avọ 17 o tubẹ mai duobọte omẹ, o ta nọ: “Keme ohwo nọ ọ riẹ oware nọ u fo nọ o re ru yọ o bi ru ei hi, yọ uzioraha.” Me te se inievo emetẹ mẹ na, mẹ tẹ ta kẹ ai nọ, me bi no iruo ehọtẹle nọ a re jo fiedhọ na no keme e be lẹliẹ omẹ ru eware jọ nọ mẹ riẹ nọ i fo ho, wọhọ edhọ-ifio gbe uruemu uvou-uthei.

 Mẹ gwọlọ wo emamọ usu kugbe Ọghẹnẹ, yọ mẹ gwọlọ nọ usu mẹ avọ ọsẹgboni mẹ gbe inievo mẹ o jọ ziezi re. Fikiere mẹ tẹ jiroro nọ me re siobọno eware jọ re mẹ sai wo oke nọ me re ro ru onana. Rekọ o jọ bẹbẹ kẹ omẹ gaga re me ru onana keme wọhọ oriruo, a jẹ gwọlọ kẹ omẹ ọkwa nọ o kpehru vi ọkwa nọ mẹ jọ vẹre evaọ ehọtẹle na, onọ a te jọ hwa omẹ osa nọ o rọ akuava hayo akuasa bu vi onọ a jẹ hwa omẹ vẹre. Nọ mẹ lẹ kpahe ẹme na no, mẹ tẹ jiroro nọ mẹ gbẹ gwọlọ yeri oghẹrẹ uzuazọ yena ha. Me te no iruo mẹ na, mẹ tẹ jọ uwou oni mẹ ruẹrẹ oria jọ họ nọ mẹ jọ mu imiruo jọ họ eru, mẹ jẹ hae lamineti ebe nọ a re kere oghẹrẹ emu nọ a re there evaọ ehọtẹle fihọ.

 Dede nọ Ebaibol na o fiobọhọ kẹ omẹ riẹ oware nọ o mai wuzou evaọ uzuazọ no, mẹ jẹ gwọlọ nọ me re kpohọ iwuhrẹ Isẹri Jihova ghele he. Fikiere inievo emetẹ mẹ a tẹ nọ omẹ oware nọ Isẹri Jihova e gbẹ were omẹ hẹ. Mẹ tẹ ta kẹ ae nọ: “Keme Jihova Ọghẹnẹ rai na ọ rẹ hẹriẹ iviuwou. Oke Kresimesi gbe ehaa ẹdẹ-eyẹ ọvo me wo nọ mẹ sae rọ jọ kugbe ahwo uviuwou mẹ, yọ wha re ru ehaa yena ha.” Oniọvo ọmọtẹ mẹ jọ o te muhọ ẹviẹ jẹ nọ omẹ nọ: “Diẹse whọ rrọ evaọ edẹ nọ i kiọkọ evaọ ukpe na kpobi? Ma gwọlọ nọ ma rẹ jọ kugbe owhẹ ẹsikpobi. Rekọ oke Kresimesi gbe ehaa ẹdẹ-eyẹ ọvo whọ gwọlọ nọ who re kpozi yọ fikinọ whọ rehọ iẹe nọ o gba owhẹ họ jabọ.” Eme riẹ na i duobọte omẹ gaga, mẹ omamẹ me te muhọ ẹviẹ re.

 Nọ mẹ nwane riẹ epanọ Isẹri Jihova a you ahwo uviuwou rai te no, jẹ ruẹ nọ kpakọ me bi roro thọ anwẹdẹ, mẹ tẹ jiroro nọ me re kpohọ ewuhrẹ rai jọ evaọ obọ Ọgwa Uvie. Mẹ tẹ jọ obei nyaku Kevin, oniọvo jọ nọ ọ riẹ epanọ a rẹ rọ Ebaibol wuhrẹ ohwo ziezi, o te mu omẹ Ebaibol họ ewuhrẹ kugbe.

 Kevin avọ aye riẹ a je le ikpeware he, a je yeri umuzuazọ nọ o rẹ sae kẹ ae uvẹ wo oke nọ a re ro fiobọhọ kẹ amọfa wuhrẹ Ebaibol na. A jọ imiruo nọ a je ru na sai koko ugho họ nọ a ro kpobọ Africa gbe Central America nyai fiobọhọ bọ iwou ogha Isẹri Jihova. Eva e jẹ were ai gaga, yọ a you ohwohwo wumuo ho. Mẹ tẹ jẹ jọ udu mẹ ta nọ, ‘Oghẹrẹ uzuazọ nana mẹ gwọlọ yeri.’

 Kevin o dhesẹ ividio jọ kẹ omẹ kpahe evawere nọ ohwo o re wo nọ o te bi ru iruo imishọnare, mẹ tẹ jiroro nọ oware nọ mẹ gwọlọ ru oye. Evaọ ukpe 1995 nọ me wuhrẹ Ebaibol na ziezi evaọ emerae ezeza no, mẹ tẹ te họ-ame zihẹ ruọ omọvo Isẹri Jihova. Nọ umuo oke yena vrẹ, ukpenọ mẹ rẹ lẹ se Ọghẹnẹ nọ o ru omẹ fe, mẹ tẹ be lẹ nọ: “Whọ kẹ omẹ uvuhu hayo efe he.”—Itẹ 30:8.

 Enẹna mẹ yọ ọdafe, orọnikọ fiki ugho nọ me wo ho, rekọ fiki emamọ usu nọ me wo kugbe Ọghẹnẹ gbe epanọ eva e be were omẹ te evaọ uzuazọ. Mẹ nyaku emamọ oniọvo-ọmọtẹ jọ nọ a re se Nuria evaọ obọ Honduras, mai imava ma tẹ ruọ orọo. Yọ ma ru iruo imishọnare kugbe no evaọ obọ Panama gbe Mexico. Ẹme jọ nọ ọ rrọ Ebaibol na nọ o rugba no evaọ uzuazọ mẹ họ onọ o ta nọ: “Oghale Jihova oye u re ru ohwo fe, yọ o re fi edada evuevo bae he”!—Itẹ 10:22.