A yẹ omẹ evaọ okpẹwho nọ a re se Montreal, okpẹwho nọ o mae rro evaọ ubrotọ Quebec, obọ Canada. Ọsẹgboni mẹ ae a yọrọ omẹ avọ inievo esa mẹ evaọ oria uwoma jọ nọ a re se Rosemont. Ma je yeri uzuazọ mai dhedhẹ.

 Nọ mẹ jọ ọmaha, Ebaibol na ọ jẹ hae were omẹ. Mẹ kareghẹhọ nọ okenọ mẹ jọ ikpe ikpegbivẹ, mẹ jẹ hae jọ abọ Ọvọ Ọkpokpọ Ebaibol na se iku Jesu yọ e jẹ hae were omẹ gaga. Uyoyou gbe ohrọ nọ Jesu o wo kẹ ahwo u duobọte omẹ, o tẹ jọ omẹ iroro nọ mẹ rẹ rọ aro kele iei. U yoma kẹhẹ inọ, nọ mẹ be kpako ze na, emamọ iroro yena i no omẹ udu fiki ikpehre egbẹnyusu nọ me wo.

 Ọsẹ mẹ ọ jẹ hai kporo okwakwa ikporakporo jọ nọ o wọhọ ọgba. Yọ ọ kẹ omẹ okwakwa ikporakporo riẹ na, ọsẹ mẹ o te je ru nọ ile-ikporo e rọ were omẹ gaga te epanọ o rọ jọ oware nọ mẹ rọ karo. Ile-ikporo e were omẹ te epanọ me ro wuhrẹ epanọ a re kporo agita. Nọ oke o be nyaharo na, me te ti wo utu ile-ikporo nọ mẹ avọ egbẹnyusu mẹ jọ ma jẹ hai ro kporo ile evaọ epati sa-sa. Ahwo jọ nọ a riẹ odẹ ziezi nọ a re ru ile zẹ a te muẹrohọ omẹ jẹ nyabru omẹ ze inọ a gwọlọ wha ile mẹ na haro. Mẹ tẹ whobọhọ obe kugbe ekọmpene ologbo jọ nọ ọ te zẹ ile mẹ. Ahwo buobu a tẹ te riẹ ile mẹ, yọ a jẹ hae jọ iredio kporo ae gaga evaọ Quebec.

 O jọ wọhọ nọ me wo eware kpobi nọ mẹ gwọlọ evaọ uzuazọ. Mẹ jọ uzoge, a riẹ omẹ odẹ, ile-ikporo e jẹ were omẹ, yọ ugho u je noi ze ziezi. Evaọ uvo, me re kpohọ oria arozaha oma-urujaja, a rẹ nọ omẹ enọ, mẹ rẹ whobọhọ ebe sa-sa kẹ ahwo, jẹ romavia evaọ etẹlẹvisiọno. Evaọ aso, me ve kpohọ epati gbe ile-ikporo. Re me wo udu nọ mẹ rẹ rọ so ile kẹ ogbotu, me mu idi egaga họ ẹda evaọ okenọ mẹ gbẹ maha. Me te ti mu imu egaga họ ẹrehọ, nọ mẹ be kpako na. Me je yeri uzuazọ owhọwhọhọ re, yọ me je gbe-ọfariẹ.

 Uzuazọ mẹ o jẹ were ahwo buobu, keme o jọ wọhọ nọ eva e be were omẹ. Rekọ o jọ omẹ oma nọ uzuazọ ufofe me bi yeri na, maero nọ mẹ ọvo mẹ tẹ rrọ oria. Mẹ jẹ hae ruawa jẹ jọ ọkora. U yoma kẹhẹ inọ, evaọ okenọ mẹ nyaharo gaga no evaọ ile-ikporo na, imava jọ evaọ ekọmpene nọ ọ jẹ zẹ ile mẹ na a te kie ẹyao AIDS, kẹsena a te whu. O kẹ omẹ uye gaga! Dede nọ ile-ikporo e jẹ were omẹ, oghẹrẹ uzuazọ nọ ma je yeri u je tu omẹ oma.

 Dede nọ eware e jẹ riẹ nya kẹ omẹ, mẹ jọ udu mẹ riẹ nọ oware jọ o be thọ evaọ akpọ na. Ẹvẹ akpọ na ọ rọ vọ avọ okienyẹ enẹ? O jẹ hai gbe omẹ unu oware nọ Ọghẹnẹ o gbe ri ro ru oware ovo kpahe iẹe he. Mẹ tubẹ lẹ se Ọghẹnẹ ẹsibuobu re ọ kuyo enọ mẹ na. Ẹdẹjọ nọ me kpohọ ugheriwo, je bi serihọ, mẹ tẹ wariẹ mu Ebaibol na họ ese. Dede nọ me wo otoriẹ eware buobu nọ me se he, me vuhumu nọ urere akpọ na o kẹle no.

 Nọ me bi se Ebaibol na, mẹ tẹ ruẹ nọ Jesu ọ se emuọriọ ba edẹ udhuvẹ evaọ obọ udhude. (Matiu 4:1, 2) Mẹ tẹ jọ udu mẹ roro nọ me te ru epọvo na, ẹsejọhọ Ọghẹnẹ o ti fiobọhọ kẹ omẹ riẹ ọyomariẹ, fikiere me te fi ẹdẹ họ. Eka ivẹ i kiọkọ taure ẹdẹ nọ me fihọ na o te ti te, Isẹri Jihova ivẹ e tẹ nyaze, a te kporo ẹthẹ mẹ. Mẹ vuẹ rai nọ a ruọ uwou wọhọ ẹsenọ me bi rẹro rai no vẹre. Kẹsena mẹ tẹ tẹrovi ọjọ evaọ usu rai nọ a re se Jacques, mẹ tẹ nọe nọ, “Ẹvẹ ma sae rọ riẹ nọ edẹ urere akpọ nana ma be rria na?” O te rovie Ebaibol riẹ je se 2 Timoti 3:1-5. Mẹ rọ enọ efa buobu zere aimava na, yọ oghẹrẹ nọ a rọ rehọ Ebaibol na kiyo enọ na kpobi avọ onaa o were omẹ gaga. Nọ a nyabru omẹ ze unuẹse jọ no, mẹ tẹ ruẹ nọ u du gwọlọ nọ mẹ rẹ siọ emuọriọ ba ha.

 Isẹri Jihova a te muọ Ebaibol họ ewuhrẹ kugbe omẹ kẹse kẹse. Uwhremu na me te bru eto ithethei mẹ no, me te mu iwuhrẹ rai họ ẹnya ẹsikpobi evaọ obọ Ọgwa Uvie. Oghẹrẹ nọ a ro dede omẹ rehọ evaọ ewuhrẹ u te je ru omẹ riẹ nọ uzẹme na ona.

 Re mẹ sai fi eware nọ me bi wuhrẹ evaọ Ebaibol na họ iruo, o gwọlọ nọ me re ru inwene ilogbo jọ evaọ uzuazọ mẹ. Ojọ rai họ, mẹ rẹ siọ imu egaga ba ẹrehọ, jẹ siọ uzuazọ ọfariẹ-ogbe na ba. O tẹ jẹ gwọlọ nọ mẹ rẹ siọ omobọ mẹ ọvo ba erorokpahe, jẹ rọ ẹgwọlọ amọfa karo. Ofariẹ, u fo re inọ mẹ rẹ rẹrote emọ ivẹ mẹ nọ mẹ ọvo ọ be yọrọ, mẹ vẹ jẹ rọ ẹme Ọghẹnẹ wuhrẹ ai. Fikiere, mẹ tẹ siọ okọ ile-ikporo na ba jẹ ruọ iruo nọ osa riẹ u bu tere he.

 Re me ru inwene nana kpobi o lọhọ tere he. Nọ mẹ be daoma siọ imu egaga ba na, oma o jẹ hae wọ omẹ re me zihe kpohọ ae, yọ me gine zihe unuẹse jọ. (Ahwo Rom 7:19, 21-24) O jọ bẹbẹ gaga re mẹ siọ uzuazọ ọfariẹ-ogbe na ba. U te no ere no, iruo ekpokpọ mẹ na e jẹ hae rrọ omẹ oma, yọ osa na o jọ kakao. Ugho nọ a be hwa omẹ evaọ emerae esa, mẹ jẹ hae jọ ile-ikporo woi evaọ euwa ivẹ.

 Olẹ u fiobọhọ kẹ omẹ ru inwene nana nọ e jọ bẹbẹ na. Ebaibol nọ mẹ jẹ hai se kẹse kẹse u fiobọhọ kẹ omẹ gaga re. U wo eria Ebaibol jọ nọ e kẹ omẹ uduotahawọ gaga. Ọjọ rai họ, 2 Ahwo Kọrint 7:1, nọ o tuduhọ Ileleikristi awọ nọ a “ru [omarai] fo no eware kpobi nọ i re zue oma gbe ẹzi.” Oria Ebaibol ofa jọ nọ o kẹ omẹ imuẹro inọ o ginẹ lọhọ re me siobọno iruemu iyoma họ Ahwo Filipai 4:13, nọ o ta nọ: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.” Jihova Ọghẹnẹ o yo elẹ mẹ, o te fiobọhọ kẹ omẹ wo otoriẹ eware nọ me je wuhrẹ evaọ Ebaibol na je fi ai họ iruo. Onana u te ru omẹ roma mudhe kẹ Jihova. (1 Pita 4:1, 2) Mẹ tẹ họ-ame evaọ 1997.

 Mẹ riẹ nọ, mẹ hae ruabọhọ uzuazọ nọ me je yeri vẹre na, enẹ yọ me whu no. Rekọ obọnana, me wo uvi evawere! Elvie, emamọ aye mẹ na o fiobọhọ kẹ omẹ gaga no re. Mai imava ma rrọ iruo odibọgba oke-kpobi, bi wuhrẹ Ebaibol na kugbe ahwo. Onana o be kẹ omẹ evawere ẹsikpobi. Me yere Jihova gaga nọ o ro si omẹ ziọ ukoko riẹ.—Jọn 6:44.