A yẹ omẹ evaọ obọ Ciudad Obregón evaọ ofẹ ẹkpẹlobọ ovatha-ọre Mexico, mẹ họ ọmọ avọ isoi evaọ usu emọ izii nọ oni mẹ o yẹ. Ma jẹ rria ughe okpẹwho na, oria nọ ọsẹ mẹ o jo wo udhu osese jọ. Oria na u woma gaga, uviuwou mai o jẹ rria dhedhẹ yọ ma jẹ were eva kugbe ziezi. Ofou-ọwhibo ọ raha udhu mai okenọ mẹ jọ ikpe isoi, fikiere ma tẹ kwa kpohọ ẹwho ọfa.

 Evaọ obonọ ma kwa nya na ugho u je te ọsẹ mẹ obọ ziezi. Rekọ evaọ oke ovona ọsẹ mẹ o te zihe ruọ ọgbidi. Yọ onana u kpomahọ orọo riẹ gbe omai emọ na. Mẹ avọ inievo ekpako ivẹ mẹ ma tẹ jẹ hai vovo isigareti nọ ma tho mi ọsẹ mai. Nọ mẹ jọ ikpe ezeza, mẹ tẹ da idi vrẹ oma yọ onana o jọ orọ ọsosuọ nọ oware utionana o rọ via. U kri hi, ọsẹgboni mẹ a tẹ hẹriẹ, uruemu mẹ u te yoma vi epaọ ọsosuọ.

 Okenọ oni mẹ ọ jẹ kwa bru ọzae ọfa ọ tẹ wha omai lele oma. Ọzae na ọ jẹ hae kẹ oni mẹ ugho ho, yọ ugho nọ oni mẹ o je wo u je te omai ru oware ovo ho. Fikiere, mẹ avọ inievo mẹ ma te je ru imiruo jọ re ma sae kuọ omamai, rekọ ugho nọ ma je wo u je te omai ru oware ovo ho. Mẹ jẹ hae pọlishi eviẹ, zẹ ibrẹdi, ebe-usi, athethe, gbe eware efa. Mẹ jẹ hae jọ ezuzu ahwo nọ a fe evaọ ẹwho na gwọlọ emu nọ mẹ rẹ re.

 Nọ mẹ jọ ikpe ikpe, ọzae jọ ọ tẹ ta kẹ omẹ nọ me lele ie ruiruo evaọ ezuzu nọ ọ rrọ ẹwho na. Mẹ rọwo nọ me re ruiruo na, kẹsena mẹ tẹ se isukulu ba jẹ kwa no uwou no. Ọ jẹ hae hwosa omẹ ₦44:00 evaọ okpẹdẹ, yọ ọ jẹ hae kẹ omẹ emu nọ a jọ ezuzu tọlọ. Umuwou nọ mẹ rehọ eware nọ a kufiẹ rọ bọ mẹ jẹ rria. Ahwo nọ a jọ okegbe na a jẹ hae ta eme etọtọ yọ a je gbe-ọfariẹ gaga re. Ibuobu rai a jẹ lọ imu egaga, a tẹ jẹ jọ egbidi. Oke yena o jọ etoke nọ o mai yoma evaọ uzuazọ mẹ, kaso kaso mẹ jẹ hae viẹ fiki ozọ. Fikinọ me kpohọ isukulu tere he gbe uvuhu ogaga nọ o jọ omẹ oma, oma o jẹ hae vuọ omẹ gaga. Mẹ rria ezuzu na te oware wọhọ ikpe esa, bẹsenọ mẹ rọ kwa kpohọ ubrotọ ọfa evaọ Mexico. Evaọ obonọ mẹ kwa nya na, me je ru iruo kẹ ahwo evaọ idhu rai, mẹ jẹ hae kọrọ idodo gbe ivovo, kwa iti kokohọ, je vu iduku.

 Ikpe ene nọ i lele i rie, mẹ tẹ kwa zihe kpobọ Ciudad Obregón. Oniọvo ọsẹ mẹ jọ nọ ọ rrọ aye nọ o re kporo ẹbo, ọ tẹ kẹ omẹ ubruwou jọ evaọ uwou riẹ nọ mẹ rria. Me te mu ikpehre ewezẹ họ ẹwezẹ, enọ e wha ọkora fihọ omẹ oma te epanọ mẹ rọ gwọlọ nọ me re kpe omamẹ no. Aso ẹdẹjọ mẹ tẹ le se Ọghẹnẹ nọ: “Olori, otẹrọnọ whọ ginẹ rrọ, mẹ gwọlọ riẹ owhẹ, yọ mẹ te gọ owhẹ bẹdẹ bẹdẹ. Otẹrọnọ egagọ uzẹme jọ ọ riẹ, mẹ gwọlọ riẹ egagọ yena.”

 O rẹ were omẹ gaga re me wuhrẹ kpahe Ọghẹnẹ. Okenọ mẹ gbẹ jọ ọmaha, me kpohọ ichọche buobu rekọ ọvuọvo ọ were omẹ hẹ. A jẹ jarae ta kpahe Ebaibol na tere he, a je wuhrẹ oware ovo nọ u re fiobọhọ kẹ omẹ riẹ kpahe Ọghẹnẹ hẹ. Ugho họ oware nọ ibuobu ichọche nana e jẹ mae ta kpahe yọ evaọ efa ahwo na a je gbe-ọfariẹ gaga.

 Nọ mẹ jọ ikpe ikpegbizii, ọzae oniọvo-ọmọtẹ mẹ jọ ọ tẹ ta kẹ omẹ nọ Isẹri Jihova a vuẹ riẹ kpahe oware nọ Ebaibol na ọ ta kpahe emema nọ a re ro ru egagọ. O te se Ọnyano 20:4, 5 kẹ omẹ. O ta nọ ma rẹ kare ẹmema kẹ omamai hi. Owọ avọ 5 u se nọ: “Who re guzou kpotọ kẹ ae vievie he hayo wo isiuru inọ whọ rẹ gọ ae he, keme mẹ, Jihova Ọghẹnẹ ra, mẹ yọ Ọghẹnẹ nọ ọ gwọlọ omarọkẹ riẹriẹriẹ.” Kẹsena ọgọ mẹ na ọ tẹ nọ omẹ nọ, “Otẹrọnọ Ọghẹnẹ ọ gwọlọ nọ ma rehọ emema ru eware igbunu hayo ma rehọ ai ru egagọ, kọ fikieme o ro mukpahe ai?” Onọ oyena o lẹliẹ omẹ roro gaga. Onana u ru nọ mẹ avọ iẹe ma rọ ta kpahe izoẹme efa evaọ Ebaibol na. Eware nọ ma ta kpahe na e were omẹ gaga te epanọ o rọ wọhọ nọ oke nọ ma rọ ta eme na o dhẹ vẹrẹ gaga.

 Uwhremu na, ọ tẹ wha omẹ kpohọ iwuhrẹ Isẹri Jihova. Eware nọ mẹ ruẹ je yo evaọ iwuhrẹ na e were omẹ gaga. Makọ emaha dede a jẹ kiyo evaọ ewuhrẹ na, yọ enọ i ru ẹme evaọ obọ eplatfọmo a ru ẹme rai vevẹ ziezi! Me te je roro evaọ udu mẹ nọ, ‘Rri emamọ ewuhrẹ nọ a be jọ etenẹ wuhrẹ ahwo!’ Dede nọ eto mẹ e jọ thethei yọ iwu mẹ e jọ gbegbe, a dede omẹ rehọ sasasa ziezi. Uviuwou jọ dede o zizie omẹ nọ mẹ ziọ obọ uwou rai te re emu nọ ewuhrẹ na o te kuhọ no.

 Mẹ jọ Ebaibol nọ Isẹri Jihova a je wuhrẹ omẹ na ruẹ nọ Jihova Ọghẹnẹ yọ Ọsẹ oyoyou, ọnọ ọ be daezọ mai kpobi makọ oghẹrẹ nọ ma rrọ kẹhẹ, oghẹrẹ ovioma mai, te ma fe hayo ma yogbe, ma kpohọ isukulu hayo ma nya ha. Uzẹme o ginẹ rrọ, Ọghẹnẹ o wo ọriẹwẹ hẹ. (Iruẹru Ikọ 10:34, 35) Enẹna mẹ ruẹ oware nọ mẹ be gwọlọ anwẹdẹ no, me mu Ọghẹnẹ họ ewuhrẹ kpahe no. Oma o gbẹ be jọ omẹ goli hi, yọ eva e be were omẹ gaga.

 Ẹmẹrera na uzuazọ mẹ u te muhọ enwene! Mẹ tẹ siọ isigareti ba evovo, siọ idi ba ẹ da vrẹ oma, jẹ siọ eme etọtọ ba ẹta. Me te si ọgo nọ ọ jọ omẹ eva anwọ emaha ze na no udu, yọ mẹ gbẹ jẹ wezẹ ikpehre ewezẹ hẹ. Fiki oja nọ mẹ re no emaha ze gbe fikinọ me kpohọ isukulu tere he, mẹ jẹ hai roro nọ me fioka ha, rekọ enẹna me gbe bi roro ere vievie he.

 Me wo emamọ aye nọ o you Jihova yọ o bi fiobọhọ kẹ omẹ gaga. Enẹna mẹ yọ ọsẹro ọnyawariẹ, yọ me re weze kpohọ ikoko sa-sa re me wuhrẹ ibe Ileleikristi mẹ jẹ tuduhọ ae awọ. Me yere Jihova kẹ epanọ Ebaibol na u re ro nwene uzuazọ ohwo gbe oghẹrẹ nọ Jihova o bi ro wuhrẹ omai. Enẹna oma o gbẹ be vuọ omẹ hẹ.