O rẹ rehọ oke lelehie taure ahwo jọ a te ti wuhrẹ oware jọ no ekpehre uzuazọ uyero rai ze jẹ daoma kurẹriẹ. Ere o jọ kẹ omẹ. Barcelona, nọ ọ rrọ ẹwho avọ ivẹ nọ ọ mae rro evaọ Spain a jọ yẹ omẹ yọ etẹe mẹ jọ whẹro. Uviuwou mai o jọ oria nọ a re se Somorrostro, etenẹ ọ mae rro evaọ ẹkwotọ mai nọ ọ rẹriẹ ovao ku ame. Somorrostro ọ jọ oria nọ ahwo a jẹ hae jọ zẹ imu egaga, je ru ozighi.

 Ọsẹgboni mẹ a yẹ emọ izii, yọ mẹ jọ ọmọ ọkpako. Fikinọ ma yogbe gaga, ọsẹ mẹ ọ tẹ jẹ hai vi omẹ kpohọ iruo evaọ oria nọ a rẹ jọ fa etẹnisbọro evaọ okegbe mai, mẹ jọ usu emọ nọ e rẹ tọlọ ebọro nọ a fa kufiẹ zihe ze. Ikpe 10 mẹ jọ oke yena, yọ mẹ jẹ hai ru iruo euwa ikpe kẹdẹ kẹdẹ. Onana u ru nọ mẹ gbẹ jẹ sai ro kpohọ isukulu wọhọ ehwa mẹ hẹ. Nọ mẹ kpako te ikpe ikpegbene no, me te je ru iruo evaọ oria nọ a jẹ rọ emashini ku eware.

 Evaọ 1975, a te se omẹ kpohọ iruo isoja, onọ o jọ ọgbahọ evaọ Spain. Mẹ jọ ohwo nọ ọ jẹ hae dawo eware rri gaga, fikiere mẹ tẹ fialoma via nọ me re kuomagbe iruo isoja Spain nọ a re se Spanish Foreign Legion nọ e rrọ Melilla, ẹkwotọ Spain nọ ọ rrọ ofẹ North Africa. Oke yena, me te mu imu egaga họ ẹrehọ je mu idi họ ẹda thomawa.

 Nọ me no iruo isoja na no, me te zihe kpobọ Barcelona jẹ tọ utu ugbarugba họ. Ma jẹ hai tho oware kpobi nọ u te omai obọ. Kẹsena ma vẹ zẹ eware nọ ma tho na re ma sae ruẹ ugho nọ ma rẹ rọ dẹ imu egaga nọ ma rẹ rehọ na. Me tẹ jẹ rehọ umu ọgaga jọ nọ a re se LSD (umu nọ o rẹ lẹliẹ ohwo ruẹ eware nọ a rẹ jọ aruakpọ ruẹ hẹ) gbe amphetamine (umu nọ o rẹ kẹ ohwo ẹgba je ru nọ ohọo u gbe ro kpe ohwo tere he). Me te je gbe-ọfariẹ, da idi vrẹ oma, je mu edhọ họ efio. Uzuazọ uyero nana u ru nọ me je ro ru ozighi gaga. Ẹsikpobi mẹ jẹ hae wha amagha, emewhe, hayo ọpia lele oma, yọ ozọ u re mu omẹ hẹ re mẹ rehọ ae họre ahwo nọ o tẹ gwọlọ ere.

 Ẹdẹjọ, mẹ avọ ẹgba mẹ ma tho omoto, iporisi o te mu omai họ ele. O jọ wọhọ isinima evaọ aruakpọ. Ma dhẹ omoto na te emaele udhe, bẹsenọ iporisi na a ro mu omai họ ẹsa. Ukuhọ riẹ, ma tẹ rọ omoto na jamu oria jẹ họrọ no evaọ omoto na dhẹ dhere. Nọ ọsẹ mẹ o yo kpahe iẹe, o te le omẹ no uwou.

 Otafe mẹ jẹ rria evaọ ikpe isoi nọ i lele i rie. Mẹ jẹ hae wezẹ aro iwou ahwo, evaọ emu imoto ilogbo nọ a dhẹ fihọ oria, ekpala nọ e rẹ jọ ogege-eriosehọ, gbe eria nọ a re ki ahwo fihọ. Mẹ tubẹ rria ighogho-itho oke jọ. Uzuazọ mẹ u fioka ha, yọ o jọ omẹ oma inọ te omẹ rrọ uzuazọ te omẹ rrọ uzuazọ họ u muẹme he. Mẹ kareghẹhọ ẹdẹjọ nọ me bru ela fihọ ẹzo-obọ gbe igbabọ mẹ nọ rehọ imu egaga no. Ipe emela na e gbẹ rrọ omẹ abọ rite inẹnẹ.

 Nọ mẹ jọ ikpe ikpegberee, oni mẹ o te mu omẹ họ ẹgwọlọ jẹ lẹ omẹ nọ me zihe ziọ uwou. Mẹ rọwo jẹ ya eyaa kẹe nọ me ti nwene uzuazọ mẹ, rekọ o rehọ oke lelehie taure me te ti ru eyaa mẹ nana gba.

 Evaọ uvo ẹdẹjọ, Isẹri Jihova ivẹ jọ a te kporo ẹthẹ mai. Nọ mẹ jẹ gaviezọ kẹ ae, ọsẹ mẹ ọ tẹ jọ obeva uwou do nọ mẹ kare ẹthẹ na dhe ae fihọ etegu. O were omẹ ẹdẹvo nọ ohwo ọ rẹ ta oware nọ me re ru kẹ omẹ hẹ, fikiere me ru oware nọ ọsẹ mẹ ọ ta na ha. A kẹ omẹ emebe esa jọ nọ mẹ rọ evawere mi ai. Mẹ tẹ nọ ae oria nọ a rẹ jọ kuomagbe kẹ iwuhrẹ, kẹsena me te kpohọ ewuhrẹ evaọ obọ Ọgwa Uvie nọ emedẹ jọ e ruọ emu no.

 Oware ọsosuọ nọ me muẹrohọ họ, osẹ ohwo kpobi o jọ kpatiẹ ẹdẹ yena. Onana u wo ohẹriẹ gaga no osẹ mẹ, me wo eto ithethei, etuagba mẹ e jọ gbegbe jẹvu jẹvu, yọ iwu mẹ e jọ whọhọ whọhọ. O jọ vevẹ nọ me fo ohwo nọ ọ rẹ jọ usu rai hi, fikiere mẹ tẹ jọ otafe Ọgwa Uvie na. Rekọ u gbe omẹ unu gaga nọ me muẹrohọ ohwo jọ nọ ma gbẹ jọ ẹgba vẹre, odẹ riẹ Juan yọ osẹ riẹ o jọ kpatiẹ. Mẹ tẹ te riẹ nọ ukpe nọ u kpemu o zihe ruọ Osẹri Jihova. Nọ mẹ ruẹ nọ ọ rrọ etẹe, me te wo udu nọ mẹ rọ rueva jẹ gaviezọ kẹ iwuhrẹ na. Enẹ uzuazọ mẹ u ro muhọ enwene.

 Mẹ tẹ rọwo nọ a wuhrẹ Ebaibol na kugbe omẹ. O raha oke he, me te vuhumu nọ re Ọghẹnẹ ọ sae jẹ omẹ rehọ, mẹ rẹ whaha ozighi gbe ọfariẹ-ogbe. Re me ru inwene nana o lọhọ tere he. Me wuhrẹ nọ re mẹ sai ru Jihova eva were, me re “nwene oghẹrẹ ohwo nọ [mẹ] rrọ ẹkwoma iroro [mẹ] nọ [me] re nwene.” (Ahwo Rom 12:2) Ohrọ Ọghẹnẹ o duobọte omẹ gaga. Ghelọ ikpehre eware kpobi nọ me ru no na, mẹ ruẹ nọ Jihova ọ be kẹ omẹ uvẹ nọ me re ro nwene uzuazọ mẹ. Eware nọ me je wuhrẹ kpahe Jihova i te omẹ udu gaga. U te ti mu omẹ ẹro inọ Ọmemama jọ ọ riẹ nọ ọ be ginẹ daezọ mẹ.—1 Pita 5:6, 7.

 Onana u te ru nọ me je ro ru inwene buobu. Wọhọ oriruo, nọ ẹme ivovavovo o romavia evaọ etoke obe-uwuhrẹ mẹ, mẹ tẹ ta kẹ omamẹ nọ, ‘Jihova Ọghẹnẹ ọ tẹ gwọlọ nọ mẹ jọ fuafo, jẹ whaha oghẹrẹ egbegbe kpobi, kiyọ mẹ rẹ siọ isigareti ba evovo!’ (2 Ahwo Kọrint 7:1) Me te gbolo ai kpobi fihọ ezuzu!

 O tẹ jẹ gwọlọ nọ mẹ rẹ whaha imu egaga erehọ jẹ siọ ae ba ẹzẹ. Onana o rehọ obọdẹ omodawọ gbe omoke jọ mi omẹ. Re mẹ sai ru onana, mẹ riẹ nọ o gwọlọ nọ mẹ rẹ fa usu no egbẹrioma mẹ vẹre. Usu nọ mẹ jọ kugbe ai na, u je fiobọhọ kẹ omẹ wo ẹnyaharo ho evaọ usu mẹ kugbe Jihova. Rekọ nọ oke o be nyaharo na, mẹ tẹ jẹ rẹroso Ọghẹnẹ yọ egbẹnyusu ekpokpọ nọ me wo evaọ ukoko na i je fiobọhọ kẹ omẹ re. Mẹ re ruẹ obọ uyoyou nọ a wo kẹ omẹ hẹ gbe isiuru nọ a wo kpahe omẹ. Nọ emerae jọ e ruemu no, me te ti siobọno imu egaga erehọ riẹriẹriẹ “jẹ whẹ uruemu okpokpọ na họ oma,” onọ u ti fiobọhọ kẹ omẹ ru eva were Ọghẹnẹ. (Ahwo Ẹfisọs 4:24) Evaọ Aria 1985 mẹ tẹ họ-ame zihe ruọ Osẹri Jihova.

 Ebaibol na o fiobọhọ kẹ omẹ mu emamọ uzuazọ họ eyeri. U siwi omẹ no oghẹrẹ uzuazọ nọ o hae te raha ugboma mẹ je si ọghọ no omẹ oma. Evaọ uzẹme, AIDS gbe eyao efa sa-sa nọ i re no imu egaga erehọ ze i kpe egbẹrioma mẹ nọ i bu vi ọgba evaọ okenọ a gbẹ jọ izoge. Eva e be were omẹ gaga inọ mẹ be rọ ehri-izi Ebaibol yeri uzuazọ enẹna, u fiobọhọ kẹ omẹ whaha oware nọ o via kẹ egbẹrioma mẹ yena.

 Oke nọ u kpemu, mẹ jọ uzoge nọ ọ jẹ hae wha emegha gbe imiwhe lele oma je ru ozighi, rekọ o gbẹ rrọ ere enẹna ha. Me rẹro vievie he inọ ẹdẹjọ mẹ te wha Ebaibol lele oma jẹ rehọ iẹe fiobọhọ kẹ ahwo viukpọ emegha gbe iwhe. Enẹna mẹ avọ aye mẹ ma rrọ iruo odibọgba oke-kpobi.

 Ọsẹgboni mẹ a zihe ruọ Isẹri Jihova ha, rekọ eva e were rai inọ me ru emamọ inwene fiki Ebaibol nọ me wuhrẹ. Ọsẹ mẹ ọ tubẹ thọ Isẹri Jihova ẹdẹjọ evaọ iraro ibe iruiruo riẹ kpobi. O jọ vevẹ kẹe inọ orọwọ okpokpọ mẹ na u fiobọhọ kẹ omẹ ru obọdẹ inwene evaọ uzuazọ. Ẹsibuobu oni mẹ ọ jẹ hae ta nọ, dodokọ mẹ kaki mu Ebaibol na họ ewuhrẹ. Yọ mẹ rọwo kugbei dẹẹ!

 Eware nọ e via kẹ omẹ no evaọ uzuazọ i ru omẹ vuhumu inọ oware ugheghẹ o rrọ re ohwo o roro nọ o ti wo evawere nọ ọ tẹ be hae rehọ imu egaga je yeri uzuazọ ọfariẹ. Enẹna, amọfa nọ me bi fiobọhọ kẹ riẹ iwuhrẹ Ebaibol nọ i fiobọhọ siwi uzuazọ mẹ na u bi ru omẹ wo uvi evawere.