A yẹ omẹ evaọ okpẹwho nọ a re se Calgary evaọ Alberta, obọ Canada. Nọ mẹ gbẹ jọ ọmaha gaga, ọsẹgboni mẹ a tẹ fa orọo. Kẹsena mẹ avọ oni mẹ, ma tẹ jẹ rria kugbe ọsẹgboni ologbo mẹ. Ọsẹgboni ologbo mẹ a you omẹ avọ oni mẹ gaga, yọ a jẹ rẹrote omẹ ziezi. Mẹ gbẹ be kareghẹhọ epanọ oma o jẹ were omẹ te oke yena, oware ovo o jẹ kẹ omẹ uye he.

 Nọ mẹ jọ ikpe ihrẹ, ọsẹ avọ oni mẹ a te kugbe, kẹsena ma tẹ kwa kpobọ St. Louis, Missouri, evaọ obọ America. Eware i te muhọ enwene. Oke yena mẹ rọ riẹ nọ kpakọ ọsẹ mẹ ọ rrọ eva gaga. Wọhọ oriruo, ẹdẹ ọsosuọ nọ me ro kpohọ isukulu evaọ oria nana nọ ma kwa ze na, nọ me je te uwou mẹ tẹ vuẹ ọsẹ mẹ nọ emọ jọ a kpe omẹ evaọ obọ isukulu, yọ mẹ kpọ obọ họ. Eva e dha ọsẹ mẹ te epanọ o ro mu omẹ họ ekpe. Ukpe na o tubẹ ga vi onọ emọ isukulu mẹ a kpe omẹ na. Onana u wuhrẹ omẹ ekpehre oware. Ere me ro mu emaha ibe mẹ họ ẹhọre nọ mẹ jọ ikpe ihrẹ ọvo.

 Ọsẹ mẹ ọ jẹ hai mu ofu ọkpoo, yọ onana o jẹ kẹ oni mẹ uye gaga. O jẹ hae lẹliẹ ae whọ jẹ họre kẹse kẹse. Nọ mẹ jọ ikpe ikpegbọvo, me te mu imu egaga họ ẹrehọ je mu idi họ ẹda thomawa. Me te ti zihe ruọ ọgba ohọre. Ẹsibuobu me re lele ahwo họre evaọ obọ ore. Re me te ti nwrotọ no ekọleji, me te zihe ruọ ohwo nọ ozighi ọ rẹ were gaga.

 Nọ mẹ jọ ikpe ikpegberee, me te kuomagbe utu isoja nọ a re se U.S. Marine Corps evaọ obọ America. A jọ etẹe wuhrẹ omẹ epanọ a re ro kpe ohwo whu lọlọhọ, onana o tẹ jẹ lẹliẹ omẹ yoma vi epaọ ọsosuọ. Nọ ikpe isoi e vrẹ no, me te no isoja re me kpohọ yunivasiti nyai se kpahe epanọ ahwo a re roro iroro (psychology). Mẹ gwọlọ nọ me te nwrotọ no, me ve kuomagbe utu nọ a re se Federal Bureau of Investigation nọ e rẹ kiẹ otọ ahwo nọ e thọ uzi egọmeti. Obọ America me jo mu yunivasiti na họ. Rekọ uwhremu na, me te zihe kpobọ Canada, kọ obei mẹ jọ ruabọhọ iwuhrẹ na.

 Nọ mẹ jọ yunivasiti na, oghẹrẹ nọ ahwo a je yeri uzuazọ o lẹliẹ akpọ vẹso omẹ. Orọ obọ rai ọvo a re si kẹ, oware ovo nọ o be kẹ ahwo evawere o riẹ hẹ, yọ ebẹbẹ nọ e dafia a be sai ku ai họ họ. Mẹ tẹ ruẹ nọ ohwo-akpọ ọ te sai ru akpọ na woma vi enẹ ẹdẹvo ho.

 Nọ mẹ ruẹ nọ akpọ o wotọ họ, mẹ tẹ tubẹ ruabọhọ eware iyoma nọ me je ru anwẹdẹ, tube yoma vi epaọ ọsosuọ. Mẹ jẹ da idi thomawa, rehọ imu egaga, je gbe-ọfariẹ. Mẹ jẹ hai no epati hi, yọ emetẹ kọ enwenwene. Fikinọ a wuhrẹ omẹ goma ziezi no evaọ iruo isoja, kẹse kẹse mẹ jẹ hae họre. Ohwo kpobi nọ me rri nọ o bi kienyẹ omọfa, mẹ rẹ họre iẹe. Me je roro nọ oware uwoma me bi ru, kpakiyọ ozighi oye o reria omẹ obọ no na.

 Ẹdẹ jọ, mẹ avọ ogbẹnyusu mẹ jọ ma jọ ubruwou obotọ jọ evaọ uwou mẹ be ruẹrẹ imu egaga kpahe nọ ma be te fa kpohọ orẹwho ofa nyae zẹ. Oke yena yọ ma rehọ imu egaga da oma fia no. Kẹsena ogbẹnyusu mẹ na ọ tẹ nọ omẹ sọ mẹ rọwo nọ Ọghẹnẹ ọ rrọ. Mẹ tẹ ta kẹe nọ, “Otẹrọnọ Ọghẹnẹ ọye ọ wha uye-oruẹ nọ o rrọ akpọ na ze, mẹ gwọlọ wo oware ovuovo kugbei hi!” Whaọ a rehọ omẹ iruo jọ nọ me bi ti muhọ okiokiọ riẹ. Nọ me kpohọ iruo, ohwo iruo mai jọ nọ ọ rrọ Osẹri Jihova ọ tẹ nọ omẹ nọ, “Kọ who roro nọ Ọghẹnẹ ọ wha uye-oruẹ nọ o rrọ akpọ na ze?” U gbe omẹ unu gaga keme ẹme nana ma jẹ ta evaọ ẹdẹ nọ ọ vrẹ na, fikiere mẹ tẹ gwọlọ nọ mẹ rẹ riẹ uyo onọ na. Emerae ezeza nọ i lele i rie, mẹ avọ ohwo iruo mẹ na ma jẹ hae ta ẹme Ọghẹnẹ, yọ ọ rọ Ebaibol na kẹ iyo enọ jọ nọ i bi kpokpo omẹ udu anwẹdẹ.

 U wo ọmọtẹ jọ nọ mẹ gwọlọ rehọ nọ mẹ avọ iẹe ma jẹ rria uwou. Eware nọ me je wuhrẹ na e were riẹ vievie he. Ẹdoka jọ, mẹ tẹ ta kẹe nọ me zizie Isẹri Jihova inọ a hae nyaze uwou mai ti wuhrẹ omai Ebaibol. Okiokiọ riẹ nọ me no iruo ze, mẹ tẹ ruẹ nọ ọ kwa eware uwou mai kpobi rọ dhẹ siọ omẹ ba no. Me te no uwou na ruọ otegu, jẹ viẹ gaga. Mẹ tẹ jẹ lẹ se Ọghẹnẹ inọ o fiobọhọ kẹ omẹ. Ẹdẹ yena họ ẹdẹ ọsosuọ nọ mẹ rọ jọ olẹ se odẹ Ọghẹnẹ, Jihova.—Olezi 83:18.

 Nọ edẹ ivẹ e vrẹ no, ọzae-avọ-aye jọ nọ a rrọ Isẹri Jihova a te mu Ebaibol họ ewuhrẹ kugbe omẹ. Nọ a kpo no ẹdẹ yena, mẹ ọvo me te mu obe nọ a bi ro wuhrẹ Ebaibol kugbe omẹ na họ ese. Odẹ obe na Whọ Sae Ria Bẹdẹ Bẹdẹ eva Aparadase ọ Otọakpọ. a Me se obe na re aso ẹdẹ yena. Oware nọ me wuhrẹ kpahe Jihova Ọghẹnẹ avọ Jesu Kristi Ọmọ riẹ u duobọte omẹ. Mẹ ruẹ nọ Jihova o wo ọdawẹ kẹ omai, yọ o rẹ kẹe uye gaga nọ ma tẹ be ruẹ uye. (Aizaya 63:9) Oware nọ o mai tube duobọte omẹ kọ uyoyou nọ Ọghẹnẹ o wo kẹ omẹ gbe Ọmọ riẹ nọ o vi ze ti whu fiki mẹ na. (1 Jọn 4:10) Mẹ tẹ ruẹ nọ Jihova o bi wo odiri kẹ omẹ “keme ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.” (2 Pita 3:9) O jọ omẹ oma nọ Jihova ọ gwọlọ nọ me sikẹle iẹe.—Jọn 6:44.

 Me te mu iwuhrẹ Isẹri Jihova họ ẹnya okoka yena. Eto mẹ e jọ thethei, mẹ jẹ hai ku emero ezọ họ, yọ ovao mẹ u re muozọ. Ghele na, Isẹri Jihova a dede omẹ rehọ wọhọ ẹsenọ mẹ rrọ ohwo uviuwou rai nọ a re ruẹ kẹle he. Uruemu rai o wọhọ orọ uvi Ileleikristi. O jọ omẹ oma wọhọ epaọ oke nọ mẹ jọ kugbe ọsẹgboni ologbo mẹ na. A whẹtiẹ omẹ họ oma gaga.

 U kri hi, eware nọ me je wuhrẹ i te ru omẹ mu uruemu mẹ họ enwene. Me te bru eto mẹ no, siọ ọfariẹ-ogbe ba, jẹ siọ imu egaga avọ idieda-thomawa ba. (1 Ahwo Kọrint 6:9, 10; 11:14) Epanọ me re ro ru eva were Jihova o mae jọ omẹ oja. Fikiere nọ me te wuhrẹ nọ oware jọ nọ me bi ru o thọ, me re gu inoma vievie he. Ukpoye, o rẹ da omẹ te ẹzi. Mẹ vẹ jọ udu mẹ ta nọ, ‘Me re gbe ru oware nana ofa ha.’ Mẹ vẹ daoma kpobi re me siobọno uruemu yena, jẹ kpọ iroro mẹ vi. Uzuazọ mẹ u te muhọ ewoma fikinọ me bi ru oreva Jihova. Evaọ Ahrẹ 29, 1989, mẹ tẹ họ-ame evaọ ukoko Isẹri Jihova. No ẹdẹ nọ a ro mu uwuhrẹ Ebaibol họ kugbe omẹ rite ẹdẹ ame-ọhọ mẹ, emerae ezeza ọvo.

 Ebaibol na o nwene uzuazọ mẹ riẹriẹriẹ. Evaọ oke nọ u kpemu, nọ ohwo ọ tẹ gwọlọ omẹ ẹme, me re kpe obọ mu ei oma. Rekọ enẹna, mẹ be daoma “lele ahwo kpobi rria dhedhẹ.” (Ahwo Rom 12:18) Orọnikọ ẹgba mẹ me bi ro ru onana ha. Jihova họ nọ ọ be rehọ Ebaibol na gbe ẹzi ọfuafo na nwene uruemu mẹ na.—Ahwo Galesha 5:22, 23; Ahwo Hibru 4:12.

 Obọnana, mẹ gbẹ be rehọ imu egaga ha, yọ me gbe bi ru ozighi hayo gbe-ọfariẹ hẹ. Ukpenọ mẹ rẹ kuvẹ re eware nana e kpọ omẹ evaọ uzuazọ, kọ Jihova Ọghẹnẹ mẹ be daoma ru eva were jẹ rọ ẹgba mẹ kpobi gọ. Me te je bi fiobọhọ kẹ amọfa re a riẹ Jihova. Nọ mẹ họ-ame no, imikpe jọ e jẹ vrẹ no, mẹ tẹ kwa kpohọ orẹwho ofa nyae ta usi uwoma na evaọ eria nọ etausiuwoma e rrọ tere he. Anwọ oke yena ze, me wuhrẹ Ebaibol na kugbe ahwo buobu no. Yọ mẹ tẹ ruẹ oghẹrẹ nọ ẹme Ọghẹnẹ o ro fiobọhọ kẹ ae nwene uruemu rai, o rẹ kẹ omẹ evawere. Eva e were omẹ gaga re inọ oni mẹ o kurẹriẹ ziọ ukoko Isẹri Jihova. Oware jọ nọ o lẹliẹ e riẹ kurẹriẹ họ, ọ ruẹ nọ ẹme Ọghẹnẹ o fiobọhọ kẹ omẹ siobọno eware iyoma nọ me je ru.

 Evaọ 1999, me nwrotọ no isukulu ukoko na nọ a bi se Isukulu Rọkẹ Etausiuwoma Uvie Na enẹna. Obọ El Salvador ma jo ru isukulu na. A jọ isukulu na wuhrẹ omẹ epanọ a rẹ ta usi uwoma na ziezi gbe epanọ mẹ rẹ rọ ẹme Ọghẹnẹ wuhrẹ inievo ukoko na ziezi jẹ rẹrote ai. Ubrobọ urere ukpe yena, mẹ tẹ rehọ Eugenia, aye oyoyou mẹ na. Mai imava ma tẹ rrọ iruo usi uwoma ota oke-kpobi na evaọ obọ Guatemala.

 Enẹna, akpọ ọ gbẹ vẹso omẹ hẹ. Ukpoye, eva e be were omẹ gaga evaọ uzuazọ. Eware nọ mẹ jọ Ebaibol wuhrẹ nọ me bi lele na i fiobọhọ kẹ omẹ siomano ozighi gbe ọfariẹ-ogbe. Obọnana me wo uvi uyoyou kẹ amọfa je bi lele ohwo kpobi rria dhedhẹ.