Omọvo enọ i je su utu ugbarugba mai ọ ta kẹ omẹ nọ: “Whọ tẹ ginẹ gwọlọ wuhrẹ kpahe Ọghẹnẹ, talamu Isẹri Jihova.” Ẹme riẹ na o gbe omẹ unu. Evaọ oke yena, yọ u ri kri nọ Isẹri Jihova a ro mu omẹ họ ewuhrẹ kugbe he. Rekọ re whọ riẹ oware nọ ẹme yena o ro gbe omẹ unu, jomẹ dina gbiku kpahe uzuazọ nọ me je yeri.

 A yẹ omẹ evaọ ẹwho nọ a re se Quezaltepeque, obọ El Salvador. Mẹ họ ọmọ avọ ezeza evaọ usu emọ ikpegbisoi nọ ọsẹgboni mẹ a yẹ. Ọsẹgboni mẹ a daoma yọrọ omẹ re mẹ jọ ohwo oruọzewọ, nọ o re koko izi egọmeti. U te no ere no, Osẹri Jihova jọ nọ a re se Leonardo avọ Isẹri Jihova efa a jẹ hae nyaze ẹmẹsejọ ti wuhrẹ Ebaibol na kugbe omai. Rekọ mẹ kpairoro vrẹ eware nọ a je wuhrẹ omẹ, je mu eware iyoma họ eru, unọjọ utọjọ. Nọ mẹ jọ ikpe ikpegbene, me te kuomagbe egbẹnyusu mẹ evaọ obọ isukulu jẹ hae da idi egaga jẹ rehọ imu egaga. Ẹmẹrera na aikpobi a te no isukulu nyai kuomagbe utu ugbarugba jọ, yọ ere me ru re. Ma rẹ jọ iyẹrẹ ẹsibuobu, be yare ahwo igho je tho uji re ma sae dẹ imu egaga gbe idi nọ i re mu.

 Utu ugbarugba na u te ti zihe ruọ uviuwou mẹ. O jọ omẹ oma nọ mẹ rẹ rọ oghẹrẹ kpobi fiobọhọ kẹ ae. Wọhọ oriruo, ẹdẹ jọ nọ ohwo utu mai na jọ ọ rehọ imu egaga no, ọ tẹ nyae họre ohwo jọ nọ ọ be rria kẹle omai. Nọ a be họre na, ohwo na ọ tẹ gba ogbẹnyusu mẹ fihọ otọ, o te se iporisi. Eva e dha omẹ gaga, mẹ tẹ rọ ọkpọ ologbo jọ be rọ fa omoto ọzae na re ọ ruẹsi siobọno ogbẹnyusu mẹ. Ọzae na ọ lẹ omẹ bẹ inọ mẹ seba rekọ me yo ghele he. Mẹ tẹ te fa ighẹgbe omoto na kpobi kpe jẹ fa oma omoto na kpobi raha no.

 Nọ mẹ jọ ikpe ikpegberee, utu ugbarugba nọ mẹ jọ na u te je lele iporisi họre. Epanọ me bi ti ro gbolo ebọmbo jọ nọ mai ọvo ma ku na, ebọmbo na ọ tẹ sa evaọ obọ mẹ. Mẹ riẹ epanọ oyena o rọ via ha. Oware nọ mẹ kareghẹhọ ọvo họ, obọ mẹ nọ o vaha no, kẹsena ibiaro i te bi omẹ, mẹ gbẹ riẹ oria nọ mẹ jọ họ. Nọ me ti jojo ze evaọ ẹsipito, mẹ tẹ te ruẹ nọ obọze mẹ na o vaha no, mẹ gbẹ be rọ ozọ obọze mẹ na yo ẹme he gbe inọ ubiẹro obọze mẹ na o joma tu no.

 Ghelọ oma nọ mẹ nwa na, nọ mẹ nwani no ẹsipito te uwou, me te je zihe nyai kuomagbe utu ugbarugba na. Rekọ u kri hi, iporisi i te mu omẹ, a te fi omẹ họ uwou-odi. Evaọ uwou-odi na, usu mẹ avọ ahwo nọ ma gbẹ rrọ utu ugbarugba na o tẹ te ga viere. Okpẹdoke soso ma re ru eware kugbe, no ohiohiẹ nọ ma rẹ rọ re emu je vovo ige ọsosuọ mai, rite aso nọ ma re kiẹzẹ.

 Nọ mẹ jọ uwou-odi, Leonardo o te weze bru omẹ ze. Nọ mẹ avọ iẹe ma be ta ẹme na, ọ tẹ riobọhọ tatu nọ mẹ drọ fihọ obọ. Ọ tẹ nọ omẹ nọ: “Whọ riẹ oware nọ eka esa nana i dikihẹ kẹ?” Mẹ tẹ ta kẹe nọ: “Ẹhẹ, ọfariẹ-ogbe, imu egaga, gbe ile rock and roll.” Rekọ Leonardo ọ tẹ ta kẹ omẹ nọ: “Mẹ sae ta nọ i dikihẹ kẹ ẹsipito, uwou-odi, gbe uwhu. Who no ẹsipito ze no, obọnana whọ rrọ uwou-odi. Whọ riẹ onọ u bi ti te na.”

 Oware nọ Leonardo ọ ta na o lẹliẹ ekpahe kpe omẹ. Uzẹme ọ ta na. Uki obọmẹ mẹ be tọ na fiki oghẹrẹ uzuazọ nọ me bi yeri. Leonardo ọ tẹ ta nọ ọ gwọlọ wuhrẹ Ebaibol kugbe omẹ, mẹ tẹ rọwo. Oware nọ mẹ jọ Ebaibol wuhrẹ u ru omẹ gbaemu nọ me re nwene uzuazọ mẹ. Wọhọ oriruo, Ebaibol na ọ ta nọ “usu uyoma u re gbe emamọ uruemu ku.” (1 Ahwo Kọrint 15:33, ẹme-obotọ) Fikiere, oware ọsosuọ nọ me re ru họ, me re bru usu no ikpehre egbẹnyusu je mu ekpokpọ. Me gbe je kpohọ ẹgwae nọ utu ugbarugba nọ mẹ jọ na a jẹ hae nya ha, ukpoye mẹ tẹ jẹ hai kpohọ iwuhrẹ Isẹri Jihova nọ a je ru evaọ uwou-odi na. Mẹ jọ iwuhrẹ na ruẹ ọzae jọ nọ ma gbẹ rrọ uwou-odi na nọ a re se Andrés, ọnọ o zihe ruọ Osẹri Jihova jẹ họ-ame no evaọ uwou-odi na. Andrés ọ ta kẹ omẹ nọ mẹ avọ iẹe ma jọ oria ovo re emu evaọ ohiohiẹ. No umuo oke yena vrẹ, me gbe je vovo ige kohiohiẹ kohiohiẹ hẹ. Ukpoye, mẹ avọ Andrés ma re se oria Ebaibol, ma vẹ ta kpahe iẹe.

 O raha oke he, utu ugbarugba na u te muẹrohọ nọ me muhọ enwene no. Fikiere, omọvo enọ i wuzou utu na ọ tẹ ta nọ ọ gwọlọ ruẹ omẹ. Ozọ u mu omẹ gaga. Mẹ riẹ oware nọ o ti ru omẹ hẹ nọ ọ tẹ riẹ oware nọ mẹ gwọlọ ru, keme o lọhọ vievie he re ohwo o no utu ugbarugba. Ọ tẹ ta kẹ omẹ nọ: “Ma ruẹ nọ whọ gbẹ be nyaze ẹgwae mai hi, ukpoye kọ iwuhrẹ Isẹri Jihova whọ be nya. Eme ọ rrọ owhẹ iroro?” Mẹ tẹ vuẹe nọ mẹ gwọlọ ruabọhọ Ebaibol nọ me bi wuhrẹ na, yọ mẹ gwọlọ nwene uzuazọ mẹ. U gbe omẹ unu gaga nọ ọ ta kẹ omẹ nọ utu ugbarugba na u ti kpokpo omẹ hẹ otẹrọnọ Osẹri Jihova mẹ ginẹ gwọlọ jọ. Kẹsena ọ tẹ ta nọ: “Whọ tẹ ginẹ gwọlọ wuhrẹ kpahe Ọghẹnẹ, talamu Isẹri Jihova. Ma bi rẹro nọ whọ te siọ eware iyoma ba eruo. Mẹ ghọghọ kẹ owhẹ. Emamọ oware whọ gwọlọ ru na. Isẹri Jihova a sai gine fiobọhọ kẹ owhẹ. A je wuhrẹ Ebaibol kugbe omẹ evaọ oke nọ mẹ jọ obọ America, yọ ahwo uviuwou mẹ jọ Isẹri Jihova. Jọ ozọ u mu owhẹ hẹ. Ruabọhọ oware nọ who bi ru na.” Omozọ o gbẹ jọ omẹ ẹro, rekọ evaọ oke ovona, eva e jẹ were omẹ gaga. Mẹ jọ udu mẹ yere Jihova Ọghẹnẹ gaga. Mẹ jọ wọhọ ọvra nọ a si no ikeji, me te wo otoriẹ ẹme Jesu nọ ọ ta nọ: “Wha te riẹ uzẹme na, uzẹme na u ve ti si owhai no igbo.”—Jọn 8:32.

 Dede na, egbẹnyusu anwae mẹ jọ a jẹ hae rọ imu egaga dawo omẹ. Re a ta uzẹme, me kie kẹ odawọ nana unuẹse jọ. Rekọ nọ oke o be nyaharo na, nọ mẹ lẹ kpahe iẹe gaga no, mẹ tẹ te siọ eware iyoma nọ me je ru na ba.—Olezi 51:10, 11.

 Nọ me no uwou-odi ze no, ahwo buobu a je roro nọ mẹ te wariẹ mu uzuazọ nọ me je yeri vẹre na họ, rekọ me ru ere he. Ukpoye, mẹ jẹ hai kpohọ obọ uwou-odi na nyae vuẹ ahwo nọ a rrọ uwou-odi eware nọ mẹ be jọ Ebaibol wuhrẹ. Uwhremu na, u te ti mu egbẹnyusu anwae mẹ na ẹro nọ me gine nwene no. Rekọ u yoma kẹhẹ inọ ewegrẹ mẹ vẹre a vuhu onana mu hu.

 Ẹdẹ jọ nọ mẹ avọ oniọvo jọ ma jọ usi uwoma, ma je rri hi na, ahwo utu ugbarugba ofa jọ nọ a jọ ewegrẹ mai a tẹ wariẹ omai họ, inọ a re kpe omẹ no. Oniọvo nọ ma gbẹ jọ usi uwoma na ọ tẹ gbaudu rọ unu kpotọ ta kẹ ae nọ mẹ gbẹ rrọ omọvo utu ugbarugba ha. Oke yena yọ mẹ be daoma nyẹ omamẹ. A te mu omẹ họ ekpe, jẹ vẹvẹ omẹ unu nọ mẹ gbẹ nyaruọ oria yena ofa ha, kẹsena a tẹ kẹ omai uvẹ nyavrẹ. Ebaibol na o gine nwene uzuazọ mẹ no. O hae jọnọ oke ẹdẹ, mẹ hae daoma ru ai kele. Rekọ obọnana, me bi ru lele ohrẹ nọ o rrọ 1 Ahwo Tẹsalonika 5:15 nọ o ta nọ: “Ajọ ohwo ọvo ọ rọ eyoma hwosa eyoma kẹ ohwo ọvo ho, rekọ wha hae daoma ru ewoma kẹ ohwohwo, te amọfa kpobi.”

 Anwọ oke nọ me ro zihe ruọ Osẹri Jihova no na, mẹ be daoma yeri uzuazọ oruọzewọ. O nwane lọhọ tere he. Rekọ fiki obufihọ Jihova, ehrẹ nọ e rrọ Ebaibol na, gbe uduotahawọ egbẹnyusu ekpokpọ mẹ, mẹ kparobọ no. Me gbe bi ru eware iyoma nọ me je ru vẹre na ha.—2 Pita 2:22.

 Evaọ oke nọ o vrẹ, mẹ jọ ohwo nọ ofu o re mu nọ ọ jẹ hai ru ozighi gaga. Mẹ riẹ vevẹ nọ o hae jọnọ mẹ ruabọhọ uzuazọ ozighi yena, enẹna yọ me whu no. Eware nọ mẹ jọ Ebaibol wuhrẹ i nwene uzuazọ mẹ riẹriẹriẹ. Mẹ siọ iruemu iyoma ba. Mẹ be rria dhedhẹ kugbe ahwo nọ a jọ ewegrẹ mẹ evaọ okenọ u kpemu. (Luk 6:27) Yọ enẹna me wo emamọ egbẹnyusu nọ i bi fiobọhọ kẹ omẹ dhesẹ emamọ iruemu. (Itẹ 13:20) Mẹ be wereva enẹna, me wo uvi ẹruore, mẹ tẹ jẹ be gọ Ọghẹnẹ nọ ọ ruẹrẹ oma kpahe re ọ rọ imuemu mẹ kpobi rọvrẹ omẹ.—Aizaya 1:18.

 Evaọ 2006, me kpohọ obọdẹ isukulu Isẹri Jihova jọ nọ a re jo wuhrẹ Ileleikristi nọ e re rọo ho re a jọ etausiuwoma. Nọ ikpe jọ e vrẹ no, mẹ tẹ rehọ aye oyoyou mẹ na, yọ mai imava ma be rẹrote ọmọtẹ mai. Enẹna, mẹ be rọ oke mẹ buobu wuhrẹ amọfa ehrẹ Ebaibol nọ i fiobọhọ kẹ omẹ na. Mẹ tẹ jẹ rrọ ọkpako evaọ ukoko mẹ, yọ mẹ be daoma fiobọhọ kẹ izoge na re a gbe yeri ekpehre uzuazọ nọ me yeri evaọ okenọ mẹ jọ ọhwa rai hi. Ukpenọ mẹ rẹ tọ uki obọmẹ, mẹ be daoma ruẹrẹ oma kpahe kẹ uzuazọ ebẹdẹ bẹdẹ nọ Ọghẹnẹ ọ ya eyaa riẹ evaọ Ebaibol na.