Oniọvo jọ nọ a re se Joshua nọ ọ be rria obọ United States nọ ọ kwa kpohọ Guyana evaọ omoke jọ fiki usi uwoma ota ọ ta nọ: “A rẹ ruẹ unu gbiku oghọghọ nọ me wo ho evaọ okenọ mẹ rọ kwa kpohọ oria nọ a mae jọ gwọlọ iwhowho-uvie!” Ere ọvona ahwo buobu nọ a kwa kpohọ orẹwho nana nọ ọ rrọ South America na a ta re, keme ahwo buobu evaọ orẹwho na a gwọlọ wuhrẹ kpahe Jihova. a Kọ eme ma rẹ sai wuhrẹ mi inievo nọ e kwa kpohọ oria nana fiki usi uwoma ota na? Ẹvẹ eware nọ ma wuhrẹ mi ai e sai ro fiobọhọ kẹ owhẹ ruẹrẹ oma kpahe otẹrọnọ whẹ gwọlọ kpohọ orẹwho ofa fiki iruo Uvie na?

 Taure oniọvo-ọmọzae nọ a re se Linel o te ti kpobọ Guyana, ọ nyae ta usi uwoma evaọ ẹkwotọ nọ a rẹ kake jọ ta usi uwoma ha evaọ orẹwho riẹ, United States. Ọ ta nọ: “A vi omai ahwo nọ a bu te udhe kpohọ ofẹ jọ nọ u rovie aro tere he evaọ West Virginia. Usi uwoma nọ ma ta evaọ obei gbe ahwo nọ me kuomagbe na u nwene uzuazọ mẹ! O lẹliẹ omẹ gbaemu vi epaọ anwẹdẹ nọ mẹ rẹ rọ ẹgba mẹ kpobi ruiruo kẹ Jihova.”

 Ọzae-avọ-aye jọ nọ a re se Garth avọ Erica a je roro gaga kpahe epanọ a rẹ rọ nyae ta usi uwoma evaọ orẹwho ofa, a tẹ salọ Guyana. Fikieme a rọ salọ obei? Erica ọ ta nọ, “Mẹ avọ ọzae mẹ ma riẹ ọzae-avọ-aye jọ nọ a kwa kpohọ obei. Oghẹrẹ ọwhọ nọ a jẹ rọ ta ẹme kpahe oware nọ a rọ obei ru fiki evawere, o lẹliẹ omai kwa kpohọ obei re.” Erica avọ Garth a se ikpe esa nọ a jọ obei na “ikpe nọ a rẹ rọ zaro ho.” Garth ọ ta nọ: “Ma dawo usi uwoma nọ a rẹ ta evaọ orẹwho ofa, yọ mẹ ruẹ nọ o were wumuo ho.” A zizie ọzae-avọ-aye nana kpohọ Isukulu Giliad uwhremu na, yọ a rrọ obọ Bolivia enẹna.

 Ebaibol na ọ tuduhọ omai awọ nọ ma si eware vọ oma evaọ uzuazọ mai hi. (Ahwo Hibru 13:5) O tẹ jẹ tuduhọ omai awọ nọ ma romatotọ roro ziezi taure ma tẹ te jiroro ologbo jọ evaọ uzuazọ mai. (Luk 14:26-33) Who te bi roro kpahe orẹwho ofa nọ whọ rẹ kwa kpohọ, yọ iroro ilogbo. Garth o kere nọ: “Mẹ avọ Erica ma siobọno eware buobu evaọ uzuazọ mai taure ma te ti kpohọ Guyana. Ma zẹ eware nọ ma jẹ rọ kokọ, uwou mai, gbe eware sa-sa nọ e roja kẹ omai hi nọ ma wo. O rehọ omai imikpe jọ. Rekọ evaọ oke nana kpobi, ma daoma re isiuru nọ ma rọ gwọlọ kwa kpobọ Guyana na e gbẹ jariẹ, fikiere kukpe kukpe ma jẹ hae rehọ orẹwho na kperẹ.”

 Oware ofa họ ugho. Ahwo jọ nọ a kwa kpohọ orẹwho ofa fiki iruo Uvie na a sae jọ orẹwho na ru iruo nọ a re ro wo ugho otẹrọnọ uzi egọmeti o kuvẹ riẹ. Ejọ a rẹ gbẹ jọ obọ orẹwho rai ru iruo ubroke evaọ ekọmputa. Amọfa a re zihe kpobọ orẹwho rai noke toke evaọ omoke re a ruẹsi ru iruo nọ a re ro wo ugho a ve zihe ze. Ere ọzae-avọ-aye jọ nọ a re se Paul avọ Sinead a jẹ hai ru. A jẹ hai zihe kpobọ Ireland ẹsiẹvo ẹgbukpe re a ru iruo. Ere nọ a jẹ hai ru na u fiobọhọ kẹ ae nọ a rọ jọ Guyana ikpe ikpegberee soso taure a te ti yẹ ọmọtẹ rai, kẹsena a tẹ rria ikpe ihrẹ efa kugbe.

 Olezi 37:5 o ta nọ: “Rehọ uzuazọ ra họ obọ Jihova; rẹroso ẹe, o ti fiobọhọ kẹ owhẹ.” Ọzae-avọ-aye nọ a re se Christopher avọ Lorissa nọ a rrọ ahwo obọ United States a jẹ hae lẹ kẹse kẹse kpahe utee nọ a rọ gwọlọ jọ orẹwho ofa ta usi uwoma. Yọ a jẹ hae jọ egagọ uviuwou rai ta ẹme kpahe oware nọ u fo nọ a re ru re a sai le utee rai tobọ. A kere eghale gbe ebẹbẹ nọ a sae rẹriẹ ovao dhe fihotọ. Fikinọ o te jọ bẹbẹ kẹ ae re a wuhrẹ ẹvẹrẹ ọkpokpọ, a tẹ salọ obọ Guyana nọ ahwo buobu a rẹ jọ ta ẹvẹrẹ Oyibo.

 Kẹsena a te ru oware nọ o rrọ Itẹ 15:22 nọ o ta nọ: “Omaa o rẹ raha nọ a gbẹ nọ mi amọfa ha, rekọ a rẹ sai ru oware, nọ ekohrẹ i te bu.” A kere ileta kpobọ uwou ogha nọ o be rẹrote iruo Uvie na evaọ Guyana. b A kere fihọ iẹe nọ a gwọlọ kpohọ oria nọ ẹgwọlọ ọ rrọ je dhunu te oghẹrẹ ahwo nọ a rrọ. A tẹ jẹ nọ kpahe oghẹrẹ nọ usiwo-imu o rrọ evaọ obei, oghẹrẹ ezi sa-sa gbe iruemu ẹwho nọ a wo. Uwou ogha na o za enọ rai kpobi, u te je ru re a lele ugboma ekpako oria nọ a te kwa nya ta ẹme.

 Linel nọ ma kake fodẹ ẹsiẹ na yọ ọsẹro ọnyawariẹ enẹna evaọ Guyana. Taure ọyomariẹ ọ tẹ te kwa kpohọ obei re, o ru oware nọ Itẹ 15:22 o ta. Ọ ta nọ: “U te no ugho nọ me kokohọ kẹ erẹ na no, me lele ahwo nọ a kwa kpohọ orewho ofa no vẹre ta ẹme. Me lele uviuwou mẹ, ekpako ukoko mẹ, gbe ọsẹro okogho mai ta ẹme. Me te je se eware kpobi nọ mẹ rẹ sai se evaọ ebe ukoko na nọ a jọ ta kpahe oria nọ ẹgwọlọ ọ mae rrọ nọ a re kpohọ.”

 Ahwo buobu nọ a gwọlọ nọ a re kpohọ orẹwho ofa nyae ta usi uwoma a rẹ kaki weze te orẹwho na tao. Ọzae-avọ-aye jọ nọ a re se Joseph avọ Christina a ta nọ, “Oke ọsosuọ nọ ma ro kpobọ Guyana, emerae esa ma rria. Ma rehọ oke yena riẹ epanọ oria na o rrọ. Kẹsena ma te zihe kpo, kokohọ eware họ, ma tẹ kwa kpohọ obei.”

 Re ahwo nọ a kwa kpohọ oria nọ ẹgwọlọ ọ mae rrọ a sae jọ obei gọ Ọghẹnẹ ziezi, o gba rai họ nọ a re wo ẹzi omaurodhidhe. A vẹ jẹ daoma re oria na gbe iruemu ẹwho na e reriae oma. Wọhọ oriruo, ahwo nọ a no unuakpọ nọ o rẹ jọ dhedhẹ gaga kpohọ obonọ o rẹ rrorro, a rẹ ruẹ oghoghẹrẹ emerae evaọ uwou rai. Joshua nọ ma fodẹ ẹsiẹ na ọ ta nọ: “Mẹ jẹ hae ruẹ ekprọ tere evaọ obomai hi. Yọ o wọhọ nọ enọ e rrọ obọ Guyana e mae rro! Rekọ nọ oke o be nya na, e tẹ te reria omẹ oma no. Mẹ ruẹ nọ who te bi ru uwou ra fo, ekprọ e rẹ jariẹ tere he. Koyehọ, whọ rẹ hae wozẹ imidhe igbegbe notọ, ku ezuzu kufiẹ, je ru uwou na fo kẹse kẹse.”

 Oware ofa nọ u re fiobọhọ nọ whọ sae rọ rria orẹwho ofa họ, who re wuhrẹ epanọ whọ rẹ rọ re oghoghẹrẹ emu nọ whọ riẹ vẹre he, gbe epanọ a re there emu na. Joshua ọ ta nọ: “Mẹ avọ oniọvo nọ ma gbẹ jọ uwou ma ta kẹ inievo-emezae gbe erọ emetẹ na nọ a wuhrẹ omai epanọ a re there emu rai. Nọ ma te there emu ọkpokpọ nọ ma wuhrẹ no, ma ve zizie inievo jọ evaọ ukoko na re a kuomagbe omai re emu na. Nọ emamọ edhere jọ nọ ma jẹ rọ riẹ inievo na je mu egbẹnyusu.”

 Evaọ ofẹ iruemu ẹwho, Paul avọ Kathleen a ta nọ: “O gwọlọ nọ ma re wuhrẹ uruemu okpokpọ gbe oghẹrẹ ẹgọ nọ u fo nọ ma rẹ gọ. Eware nana e jọ eware ekpokpọ kẹ omai. Fikiere ma daoma romakpotọ, ma te nwene, rekọ evaọ oghẹrẹ nọ ma gbẹ rọ raha izi Ebaibol ho. Oghẹrẹ nọ a re ru eware evaọ ẹwho na nọ ma jẹ daoma ru o lẹliẹ omai si kẹle ahwo ukoko na, je ru nọ a jẹ rọ gaviezọ kẹ omai evaọ usi uwoma.”

 Joseph avọ Christina a ta eva ahwo nọ a kiọkọ inọ: “Eghale na i bu vi ebẹbẹ nọ i te omai kpekufiẹ. Oware obẹbẹ nọ ma ri ru ẹdẹvo ho nọ ma ru u fiobọhọ kẹ omai nwene eware nọ ma rọ karo. Eware nọ ma je roro nọ eye e mai wuzou i gbe te oware ovo kẹ omai hi. Eware nọ ma rehọ aro ruẹ i ru omai gbaemu nọ ma rẹ gbẹ dawo ẹgba mai kpobi evaọ egagọ Jihova. Umutho oware kpobi nọ ma wo o be da omai ẹro fia.”

 Erica ọ ta nọ: “Oria nọ ẹgwọlọ ọ mae rrọ nọ ma kwa nya u ru omẹ avọ ọzae mẹ wuhrẹ oware nọ u dhesẹ re ohwo o fievahọ Jihova. O fiobọhọ kẹ omai evaọ idhere nọ ma re ruẹ vẹre he. Onana o tẹ jẹ lẹliẹ omai si kẹle ohwohwo gaga wọhọ ọzae-avọ-aye.”