Madián avọ Marcela a jẹ rria ẹwho Medellín nọ ọ rrọ Colombia. A wo eware kpobi nọ e rẹ lẹliẹ uzuazọ were. A jẹ hwosa Madián okposa evaọ iruo riẹ, fikiere a jẹ rria uwou nọ u wo erru gaga. Rekọ oware jọ o wha riẹ ze nọ a ro roro kpahe eware nọ a be rọ karo evaọ uzuazọ rai nọ orọnọ idibo Jihova Ọghẹnẹ a rrọ na. A ta nọ: “Evaọ ukpe 2006, ma kpohọ okokohọ obọdẹ nọ uzoẹme riẹ o jọ ‘Ru Ẹro Ra Lọhọ.’ Evaọ eme buobu nọ a ta evaọ okokohọ na, a tuduhọ omai awọ re ma siobọno eware jọ evaọ uzuazọ re ma sai wo oke ziezi kẹ egagọ Ọghẹnẹ. Nọ ma je no okokohọ na kpo, ma ruẹ nọ ma je ru eware nọ ma yo na vievie he. Ma rẹ dẹ eware ugbẹdẹ, yọ ma re esa vọ uzou.”

 Eware nọ Madián avọ Marcela a yo na i fiobọhọ kẹ ae ruẹ nọ u wuzou gaga re a nwene oghẹrẹ nọ a bi yeri uzuazọ rai, fikiere a te mu ere họ eru. A ta nọ: “Ẹmẹrera na, ma gbẹ jẹ raha ugho tere he. Ma tẹ kwa kpohọ uwou osese, zẹ omoto mai, ma tẹ dẹ imotosaikoro.” Ofariẹ, a gbe je kpobọ eki tere he re a gbe mu eware dẹ hẹ. A tẹ be raha oke ziezi ta usi uwoma kẹ erivẹ rai. A te mu usu kugbe ekobaro obọdẹ, a enọ i wo ọwhọ kẹ egagọ Ọghẹnẹ jẹ be raha oke ziezi ta usi uwoma na.

 Nọ omoke jọ o vrẹ no, Madián avọ Marcela a tẹ jiroro nọ a re gbe ru vi epanọ a je ru vẹrẹ evaọ egagọ Jihova, fikiere a tẹ kwa kpohọ iwhre jọ nyai fiobọhọ kẹ ukoko osese jọ nọ o rrọ etẹe. Re a sae kwa, Madián o te no iruo riẹ no. Ọga iruo riẹ o je roro nọ oware jọ o be thọ kugbe ei. Fikiere Madián ọ tẹ nọ ọga iruo riẹ na nọ: “Dede nọ a be hwa owhẹ okposa na, kọ eva e be ginẹ were owhẹ?” Ọga na ọ tẹ ta nọ eva e be were iẹe he keme o wo ebẹbẹ buobu nọ ọ be sai kuhọ họ. Madián ọ tẹ ta kẹe nọ: “Orọnikọ ugho họ oware nọ o mai wuzou evaọ uzuazọ họ, rekọ oware nọ ọ rẹ ginẹ wha evawere se ohwo. Eva e rẹ were omẹ avọ aye mẹ nọ ma te bi wuhrẹ ahwo kpahe Ọghẹnẹ, yọ ma gwọlọ nọ ma re fiba oke nọ ma bi ro ru iruo nana re ma gbe wo evawere viere.”

 Madián avọ Marcela a bi wo evawere gbe ududhomẹno evaọ uzuazọ keme a be rọ egagọ Ọghẹnẹ karo. Anwọ ikpe 13 nọ e vrẹ na, a be ta usi uwoma je fiobọhọ evaọ eria nọ a jọ gwọlọ ahwo nọ a rẹ ta usi uwoma evaọ ikoko nọ e rrọ ofẹ obọze ukiediwo-ọre orẹwho Colombia. Enẹna, a wo uvẹ-ọghọ nọ a rọ rrọ ekobaro obọdẹ.