Isẹri Jihova nọ e rrọ obọ Bulgaria a romakẹ iruo usi uwoma ota na gaga. A bi wuhrẹ ahwo Ebaibol na re a riẹ Ọghẹnẹ. Anwọ ukpe 2000 ze, Isẹri Jihova buobu nọ e rrọ erẹwho efa a be kwa kpobọ Bulgaria re a fiobọhọ kẹ inievo nana evaọ iruo usi uwoma na. Eware vẹ e rẹ dina kẹ ohwo uye nọ ọ tẹ kwa kpohọ orẹwho ọfa nyae ta usi uwoma? Rri ẹme nọ Isẹri Jihova jọ nọ e kwa kpobọ Bulgaria a ta.

 Oniọvo nọ a re se Darren nọ ọ jẹ rria obọ England ọ ta nọ: “O rrọ omai iroro anwẹdẹ inọ ma re kpohọ orẹwho ọfa nọ a mae jọ gwọlọ etausiuwoma. Nọ mẹ avọ aye mẹ Dawn ma ruọ orọo no, ma tẹ kwa kpobọ London re ma rọ ẹvẹrẹ Russia ta usi uwoma kẹ ahwo evaọ obei. Ẹsejọ ma rẹ nabe ta ẹme na mu no inọ ma rẹ kwa kpohọ orẹwho ọfa, rekọ oware jọ o vẹ whaha omai. Ma tẹ tubẹ ta nọ ma rẹ kpairoro vrẹ. Kẹsena ogbẹnyusu mai jọ o te fiobọhọ kẹ omai ruẹ nọ eware jọ i nwene no evaọ uzuazọ mai, inọ obọnana u mu rie ẹro nọ oware ovo o te whaha omai hi.” Brọda Darren avọ aye riẹ Dawn a te mu orẹwho nọ a jọ gwọlọ etausiuwoma gaga họ ẹgwọlọ, nọ a rẹ sae kwa kpohọ. Evaọ ukpe 2011, a tẹ kwa kpobọ Bulgaria.

 Nọ inievo jọ nọ a wo iroro nọ a te kwa kpohọ orẹwho ọfa nyae ta usi uwoma ha a ruẹ eva nọ e be were enọ i ru ere, oware na u te bi si ai urru. Oniọvo-ọmọtẹ jọ nọ a re se Giada nọ avọ ọzae riẹ Luca a jẹ rria obọ Italy ọ ta nọ: “Mẹ ruẹ inievo jọ nọ e kwa kpobọ South America gbe Africa nọ e be rọ ọwhọ ta usi uwoma na evaọ obei. Nọ a gbiku epanọ usi uwoma na o were te evaọ obei kẹ omẹ, mẹ tẹ ta nọ me re ru ojọ. Oriruo rai o be lẹliẹ omẹ daoma rọ egagọ Jihova karo enẹna.”

 Brọda Tomasz avọ aye riẹ Veronika gbe emọ ivẹ rai nọ a re se Klara avọ Mathias a kwa no Czech Republic kpobọ Bulgaria evaọ ukpe 2015. Eme ọ lẹliẹ e rai jiroro nọ a re kpohọ obei? Tomasz ọ ta nọ: “Ma ruẹ inievo efa, te imoni mai jọ nọ e kwa kpohọ erẹwho efa nyae ta usi uwoma. Nọ ma gaviezọ kẹ iku nọ a gbe kpahe epanọ usi uwoma o rrọ evaọ obei jẹ ruẹ epanọ eva e be were ai te, ma tẹ rọ ẹme na jiroro evaọ uviuwou mai.” Ma be ta ẹme na, uviuwou nana o rrọ okpẹwho Bulgaria nọ a re se Montana be ta usi uwoma na avọ evawere.

 Oniọvo ọfa nọ ọ kwa kpobọ Bulgaria họ Linda. Ọ ta nọ: “Ikpe buobu nọ i kpemu nọ me kpohọ Ecuador, mẹ ruẹ inievo jọ nọ a kwa kpohọ obei nyae ta usi uwoma. Nọ mẹ ruẹ e rai, mẹ tẹ jọ eva mẹ ta nọ, ẹdẹ jọ mẹ te kwa kpohọ oria nọ iwhowho-uvie e rrọ tere he nyae ta usi uwoma.” Oniọvo-ọmọzae jọ nọ a re se Petteri avọ aye riẹ Nadja a kwa no obọ Finland kpobọ Bulgaria re nọ a ruẹ irere nọ i te ahwo nọ a kpohọ ewho efa nyae ta usi uwoma. A ta nọ: “Inievo jọ nọ ma gbẹ jọ ukoko evaọ obọ ẹwho mai a kpohọ ewho efa nọ iwhowho-uvie e rrọ tere he nyae ta usi uwoma. Kẹse kẹse a re gbiku na. A ta nọ a re ruẹ oware nọ o were te usi uwoma nọ a re kpohọ evaọ eria itieye na ha.”

 Re ohwo o te ti kpohọ usi uwoma ota evaọ orẹwho ọfa, ọ rẹ ruẹrẹ oma kpahe ziezi. (Luk 14:28-30) Oniọvo jọ nọ a re se Nele nọ ọ jẹ rria obọ Belgium ọ ta nọ: “Nọ me mu epanọ mẹ te rọ kwa kpohọ orẹwho ọfa họ eroro no, mẹ lẹ kpahe iẹe gaga, je se kpahe iẹe ziezi evaọ ebe ukoko na. Mẹ jẹ daoma riẹ eware nọ i ti fiobọhọ kẹ omẹ ru oware nọ mẹ be ma omaa riẹ na.”

 Kristian avọ Irmina, nọ a jẹ rria obọ Poland vẹre, a kwa kpobọ Bulgaria, yọ o vrẹ ikpe izii no nọ a rọ rrọ obei. A ruẹ nọ oware jọ nọ u fiobọhọ kẹ ae gaga họ, a kuomagbe utu nọ o rẹ rehọ ẹvẹrẹ Bulgaria ru ewuhrẹ oke nọ a gbẹ jọ obọ Poland. Inievo nọ a gbẹ jọ utu yena a tuduhọ ae awọ je wuhrẹ ai ẹvẹrẹ na. Kristian avọ Irmina a ta nọ: “Whọ tẹ ta nọ iruo Jihova who re ru, eva e rẹ were owhẹ, yọ Jihova ọ rẹ rẹrote owhẹ ziezi. Whọ tẹ vuẹ Jihova nọ, ‘Mẹ na! Vi omẹ!’ eware jọ nọ who roro nọ whọ te sai ru ẹdẹvo ho, who re ru ai.”—Aizaya 6:8.

 Brọda Reto avọ aye riẹ Cornelia nọ a jọ obọ Switzerland a jiroro nọ a rẹ kwa kpobọ Bulgaria nyae ta usi uwoma. A te mu oma họ ẹruẹrẹkpahe, a tubẹ kpairoro vrẹ eware jọ re a sai koko ugho họ. A ta nọ: “Taure ma tẹ te kwa nya, ma kake rehọ obei kpohọ erẹ, ma tẹ rria obei ẹkpoka ọvo re ma riẹ epanọ orẹwho na o rrọ. Ma lele imishọnare nọ e rria obei kri no ta ẹme, yọ ehrẹ nọ a kẹ omai i fiobọhọ kẹ omai gaga.” Reto avọ Cornelia a lele ehrẹ yena, yọ ma be ta ẹme na, a rria Bulgaria vrẹ ikpe udhe no.

 Inievo nọ e kwa kpohọ ewho efa nyae ta usi uwoma, a re wuhrẹ oghẹrẹ nọ a re ru eware evaọ obei, yọ ẹsejọ onana o rẹ lọhọ tere he. (Iruẹru Ikọ 16:9, 10; 1 Ahwo Kọrint 9:19-23) Oware jọ nọ o rẹ ga kẹ ahwo buobu họ, re a wuhrẹ ẹvẹrẹ ẹwho na. Luca nọ ma fodẹ ẹsejọ na ọ ta nọ: “Anwẹdẹ eva e rẹ were omai gaga nọ ma tẹ be rehọ ẹme obọmai kẹ iyo evaọ ewuhrẹ. Rekọ nọ ma kaki te obonẹ, udugaga mẹ avọ aye mẹ ma rẹ rọ rehọ ẹvẹrẹ Bulgaria kẹ uyo okpẹkpẹe. Iyo mai e tẹ wọhọ iyo emọboba. Iyo emaha nọ e rrọ ukoko na dede i woma vi emai kpekufiẹ.”

 Ravil nọ ọ jẹ rria obọ Germany ọ ta nọ: “Re me wuhrẹ ẹvẹrẹ na, ọmọziọ iruo ho. Rekọ mẹ rẹ ta kẹ omamẹ ẹsikpobi nọ, ‘Jọ o kẹ owhẹ uye hrọ họ, whọ tẹ make ta ẹme jọ thọ, rehọ iẹe hwẹ kufiẹ.’ Nọ eware jọ e tẹ be bẹ omẹ eru, me re rri rai wọhọ ebẹbẹ ilogbo jọ họ, rekọ wọhọ iruo nọ me bi ru kẹ Jihova.”

 Linda nọ ma fodẹ ẹsiẹ na ọ ta nọ: “Ẹvẹrẹ ọ rẹ kake ruọ omẹ uzou hu. Ẹvẹrẹ Bulgaria na ọ rrọ gaga. Ẹsejọ me te wuhrẹ te oria jọ, mẹ vẹ ta nọ mẹ te sai gbe wuhrẹ hẹ. O rẹ kẹ uye gaga nọ whọ tẹ rrọ oria nọ ahwo a bi jo yo ẹvẹrẹ ra ha, yọ who bi yo ọrai hi. Me re se ebe nọ ukoko na o fa fihọ ẹvẹrẹ ahwo Sweden nọ mẹ riẹ ziezi na re ẹrọwọ mẹ ọ seba ewhrehe. Ẹmẹmẹrera na, inievo na a te ti wuhrẹ omẹ ẹvẹrẹ Bulgaria na ziezi.”

 Oware ofa nọ o rẹ kẹ uye họ, ẹro ahwo nọ whọ nyaseba nọ o re vo owhẹ. Ohwo nọ ọ kwa kpohọ ẹwho ọfa, ọ rẹ nyasiọ imoni gbe egbẹnyusu riẹ ba. Oniọvo-ọmọtẹ jọ nọ a re se Eva nọ avọ ọzae riẹ Yannis a gbẹ kwa kpobọ Bulgaria ọ ta nọ: “Ma rẹ rọ ifonu se egbẹnyusu gbe imoni mai kẹse kẹse nọ ẹro rai o te bi vo omai, yọ ma mu egbẹnyusu jọ no re evaọ obonẹ.”

 Eware efa e riẹ nọ e rẹ dina kẹ uye. Ọzae-avọ-aye jọ nọ a re se Robert avọ Liana nọ a kwa no obọ Switzerland kpobọ Bulgaria a ta nọ: “Ẹvẹrẹ ẹwho na o jẹ bẹ omai ewuhrẹ, yọ uruemu ahwo na u wo ohẹriẹ gaga no orọ ahwo obonọ ma no ze. U te no ere no, ma riẹ hẹ inọ enẹ ekpahe obonẹ e rẹ ga te evaọ ezi ekpahe.” O make rrọ ere na inievo na a be hai roro kpahe eghale nọ a wo no, yọ a be hai tubẹ rehọ eware nọ e be kẹ ae uye na hwẹ ehwẹ ẹsejọ. Onana u ru nọ a be rọ gọ Jihova avọ evawere anwọ ikpe ikpegbene nọ a rọ rrọ obei na.

 Lilly ọ ta nọ otẹrọnọ o rẹ lọhọ, jọ oniọvo kpobi ọ nyae ta usi uwoma evaọ oria nọ iwhowho-uvie e rrọ tere he. Ọ ta nọ: “O lẹliẹ omẹ riẹ Jihova gaga no. U mu omẹ ẹro nọ mẹ hae riẹ Jihova te enẹ hẹ evaọ obọ ẹwho mẹ. Usi uwoma nọ mẹ be ta ẹsikpobi na u si omẹ kẹle Jihova vi epaọ anwẹdẹ no, yọ o be lẹliẹ eva were omẹ gaga.” Ọzae riẹ Ravil, ọ ta nọ ere o ginẹ rrọ, o te je fibae nọ: “Uzuazọ nọ o mai woma kpaobọ ona, o lẹliẹ omai riẹ inievo buobu nọ i wo ajọwha nọ i no erẹwho efa ze nọ a riẹ usi uwoma ẹta ziezi. Inievo nana a wuhrẹ omẹ eware buobu no.”

 Ajọwha nọ inievo mai buobu a wo o lẹliẹ e rai kwa kpohọ eria nọ etausiuwoma e rrọ tere he. Ere ma be rọ “ta usi uwoma Uvie na evaọ akpọ na soso.” (Matiu 24:14) Inievo nọ e rehọ iroro obọrai kwa kpobọ Bulgaria a ruẹ epanọ Jihova o ro ru ẹgwọlọ rai kẹ ae, je fiobọhọ kẹ ae ru oware kpobi nọ a ma omaa riẹ.—Olezi 20:1-4.