Ọzae jọ nọ ọ rrọ ohwo Eritrea ọ dhẹ kpobọ Norway evaọ ukpe 2011. Nọ Isẹri Jihova a jẹ ta usi uwoma kẹe, ọ tẹ ta nọ ọ riẹ kpahe Isẹri Jihova evaọ obọ ẹwho riẹ nọ ọ dhẹ no ze. Ọ ta nọ evaọ okenọ ọ jọ iruo isoja evaọ obọ orẹwho riẹ, ọ ruẹ nọ Isẹri Jihova nọ a mu fihọ uwou-odi fiki egagọ rai a rọwo nọ a re kuomagbe iruo isoja ha dede nọ a jẹ lahiẹ ae.

 Fiki oware jọ nọ o via, a te fi ọzae nana nọ ọ jọ osoja vẹre na họ uwou-odi. Ọ jọ uwou-odi na ruẹ Isẹri Jihova esa jọ nọ a fihọ uwou-odi fiki ẹrọwọ rai anwọ ukpe 1994. Ae họ, Paulos Eyasu, Negede Teklemariam, gbe Isaac Mogos.

 Nọ ọzae na ọ jọ uwou-odi na, ọ ruẹ nọ Isẹri Jihova a bi gine ru eware nọ a bi wuhrẹ amọfa. O muẹrohọ nọ a rẹ ta uzẹme, jẹ ghale emu rai kugbe amọfa nọ a rrọ uwou-odi na. Ọ ruẹ nọ Isẹri Jihova nọ e rrọ uwou-odi na a re wuhrẹ Ebaibol na kugbe kẹdẹ kẹdẹ, yọ a re zizie amọfa re a kuomagbe ai. Nọ a vuẹ ae nọ a ti siobọno ai otẹrọnọ a whobọhọ obe inọ a gbẹ rrọ Isẹri Jihova ha, a se thahe thahe.

 Oware nana nọ ọzae na ọ ruẹ na u duobọtei udu gaga, fikiere nọ o te Norway no, ọ tẹ gwọlọ nọ ọ rẹ riẹ oware nọ Isẹri Jihova a ro wo ẹrọwọ ọgaga otiọye. Fikiere nọ Isẹri Jihova a ta usi uwoma kẹe, ọ tẹ nwane rọwo nọ a wuhrẹ Ebaibol na kugbei, o te je mu iwuhrẹ Isẹri Jihova họ ẹnya.

 Evaọ amara Azie 2018, ọ tẹ họ-ame evaọ ukoko Isẹri Jihova. Enẹna, ọ rẹ rọ uvẹ kpobi nọ u rovie fihọ ta usi uwoma kẹ ahwo nọ a no Eritrea gbe Sudan ze, jẹ tuduhọ ae awọ re a wuhrẹ Ebaibol na re a sai wo ẹrọwọ ọgaga.