Taure whọ tẹ te ta kẹ Isẹri Jihova nọ a kẹ owhẹ Ebaibol ọ Braille, onọ ahwo nọ i tuaro a re se, who re wo oria ruaro. Ebaibol ọ New World Translation erọ ẹvẹrẹ Oyibo, Spanish, gbe Italian nọ a ru fihọ Braille na i re bu te iko 20, hayo tube bu te 28 dede, yọ oria nọ a re fi ai họ o rẹ kẹre te irula ezeza.

Eghẹrẹ sa-sa a ru kẹ ahwo nọ i tuaro, rekọ enọ i wo ibieme nọ a rẹ sae rọ obọ rara se na e mae rro evaọ usu enọ a ru na. U wo oghẹrẹ okwakwa jọ nọ ahwo nọ a tuaro a rẹ sai kere eware fihọ, a vẹ jẹ sai se eme nọ a kere na ẹkwoma ibieme na nọ e rẹ kpare kpehru re a sae rọ obọ rara ae. Okwakwa ofa o tẹ jẹ riẹ nọ u re se eme nọ e rrọ obe do via re ahwo nọ i tuaro a sae gaviezọ kẹ eware nọ e rrọ obe na.

U te no ere no, Isẹri Jihova a ru okwakwa ekọmputa jọ nọ o rẹ sai nwene eme fihọ Braille, onọ ahwo nọ a tuaro a rẹ sae rọ obọ rara se evaọ evẹrẹ buobu. Re okwakwa nana o sai nwene eme ẹvẹrẹ fihọ Braille, a re fi eme ẹvẹrẹ na gbe ibieme Braille nọ i dikihẹ kẹ eme na họ eva okwakwa na. Okwakwa na o rẹ sai je ru obe na fihọ oghẹrẹ nọ ahwo nọ i tuaro a sae rọ rehọ obọ rara eme na se lọlọhọ. Okwakwa nana u ti ru ei lọhọ re a ru ebe gbe Ebaibol na fihọ Braille evaọ ẹvẹrẹ kpobi nọ u wo ibieme Braille, makọ evẹrẹ nọ e rẹ rehọ ibieme ahwo Rom (koyehọ A, B, C, D rite Z) ro kere eme rai hi.

Anwọ ikpe udhusoi ze na, Isẹri Jihova a bi ru ebe gbe eware efa nọ a kere no Ebaibol ze kẹ ahwo nọ i tuaro, yọ a ru rai fihọ evẹrẹ nọ i bu te 19 no. Dede nọ a be zẹ ebe nana ha, ahwo buobu nọ a be rehọ ae a bi ru unevaze fihọ ae.

Evaọ oke nọ u kpemu, nọ a te siobọno obe evaọ okokohọ Isẹri Jihova, a ve ru owhowhovia kẹ ahwo nọ e rrọ okokohọ na inọ a rẹ sae yare orọ Braille evaọ oke ofa. Evaọ ukpe n’ukpo, uwou ogha obọ America o kiẹ ikoko riwi re a riẹ okokohọ nọ ahwo nọ i tuaro a ti kpohọ gbe oghẹrẹ okwakwa Braille nọ o te were ae (onọ a rẹ rọ obọ rara se, onọ a re kere eware fihọ, hayo onọ u re se eme do via).

A wọ ebe nọ a sae rọ obọ rara se kpohọ ikokohọ nọ ahwo nọ i tuaro a jọ, yọ onana u ru nọ a ro wo ebe nọ a siobọno evaọ oke ovona nọ amọfa a ro wo ai. A vi eghẹrẹ enọ ekọmputa o re se do via se omomọvo ahwo nọ i tuaro na evaọ oka nọ o kẹle riẹ nọ a ru okokohọ na no.

Osẹri Jihova jọ nọ o tuaro ọ ta nọ: “O jọ oware evawere ulogbo nọ ma ro wo ebe na evaọ oke ọvona nọ amọfa a ro wo ai. Obe Olezi 37:4 ọ ta nọ Jihova ọ te kẹ omai eware nọ ma gwọlọ. O ru ere evaọ oka nana!” Oniọvo ọfa o te muhọ ẹviẹ jẹ ta nọ: “A je roro kpahe omẹ. Me yere Jihova nọ ọ be rọ rẹrote omai ziezi.”