Ẹnyaharo Ologbo Evaọ Egagọ Ọghẹnẹ!
A siobọno Ebaibol Efafa Akpọ Ọkpokpọ ọrọ Ikereakere Efuafo Na
Evaọ amara Ọvo 12, 2019, ẹnyaharo ologbo jọ ọ romavia: A siobọno Ebaibol Efafa Akpọ Ọkpokpọ ọrọ Ikereakere Efuafo Na evaọ ẹvẹrẹ Isoko.
Oware jọ nọ who re muẹrohọ evaọ Efafa Akpọ Ọkpokpọ na họ, a fa riẹ gbagba lele Ẹme Ọghẹnẹ nọ a rọ ẹkwoma ẹzi riẹ ro kere. (2 Timoti 3:16) Ekpehre uruemu efefafa Ebaibol ọgbọna vẹ a whaha nọ a jẹ fa Ebaibol nana? Ono ọ fa riẹ? Ẹvẹ o sai ro mu owhẹ ẹro nọ whọ sai fievahọ Efafa Akpọ Ọkpokpọ na?
Kọ Ebaibol mẹ ọ rrọ gbagba?
Ọzae jọ nọ a re se Declan Hayes, nọ ọ rrọ prọfẹsọ ekiọthuọ akpọ soso ọ ta nọ: “Ebaibol na họ obe nọ ahwo a be mae dẹ kpaobọ kukpe kukpe.” Fikinọ ahwo a gwọlọ kere ebe nọ e rẹ nya eki gaga, ẹsibuobu a gbẹ be tẹrovi epanọ ebe rai e rẹ rọ jọ gbagba ha. Wọhọ oriruo, evaọ efafa Ebaibol jọ, enọ e fa riẹ a si eria ikere nọ a roro nọ i re “fou ehoo” ese no Ebaibol na no. Evaọ efafa Ebaibol ọfa, a nwene eme nọ a roro nọ e te dha ahwo jọ eva. Wọhọ oriruo, a fa Ebaibol yena re o were oghẹrẹ ahwo jọ, fikiere a te se Ọghẹnẹ “Ọsẹ-Oni.”
Dede na, oware jọ nọ o mai yoma nọ a ru evaọ efafa Ebaibol buobu họ, oghẹrẹ nọ a ru odẹ oma Ọghẹnẹ, Jihova. (Egba-iwuhrẹ jọ a fa odẹ Ọghẹnẹ “Yahweh.”) Evaọ iko-ebe anwae Ebaibol na, ibieme Hibru ene a re ro kere odẹ na, eye họ YHWH hayo JHVH. Odẹ nana o romavia enwenọ asia idu ihrẹ (7,000) evaọ Ikereakere Hibru * na ọvo. (Ọnyano 3:15; Olezi 83:18) Fikiere o rọ vevẹ inọ Ọghẹnẹ ọ gwọlọ nọ idibo riẹ a riẹ odẹ riẹ jẹ hai sei.
Dede na, evaọ ikpe buobu nọ i kpemu, ugbẹrọwọ u ru nọ ahwo Ju a rọ siọ odẹ Ọghẹnẹ ba ese. Uwhremu na, Ileleikristi a te wo eriwo ọthọthọ ahwo Ju na jẹ siọ odẹ Ọghẹnẹ ba ese re. (Iruẹru Ikọ 20:29, 30; 1 Timoti 4:1) Nẹnẹ na, efefafa Ebaibol a be rehọ odẹ-ova na “Olori,” ro nwene odẹ Ọghẹnẹ. Efefafa Ebaibol ọgbọna jọ a tube si ẹme na “odẹ” no obe Jọn 17:6 no, oria nọ Jesu ọ jọ ta nọ: “Me dhesẹ odẹ ra via kẹ [ae] no.” Enẹ Ebaibol Good News Translation ọ fa oria ikere nana: “Me dhesẹ owhẹ kẹ ae no.”
Egba-iwuhrẹ Ebaibol jọ a ta nọ a bi ru lele uruemu nọ u no anwae ze, nọ a tẹ be rehọ odẹ-ova na “Olori” ro nwene odẹ Ọghẹnẹ. Efa a ta nọ a bi ru ere fikinọ a gwọlọ nọ Ebaibol rai ọ rẹ nya eki ziezi. * Rekọ Jesu ọ ta nọ o thọ re a ru lele iruemu nọ i no anwae ze nọ e wọso izi Ọghẹnẹ. (Matiu 15:6) U te no ere no, re a rehọ odẹ-ova ro nwene odẹ oma ohwo, u no Ikereakere na ze he. Jesu Kristi o wo edẹ-ova buobu wọhọ “Ẹme Ọghẹnẹ,” gbe “Ovie ivie.” (Eviavia 19:11-16) Nọ o rrọ ere na, kọ u fo re a rehọ edẹ-ova nana ro nwene odẹ Jesu?
Ẹme nọ ọ rrọ otọ na u wuzou gaga. Enẹ ọgba-uwuhrẹ Ebaibol jọ nọ ọ rẹ kẹ ahwo ohrẹ kpahe efafa Ebaibol evaọ obọ India ọ ta kpahe odẹ Ọghẹnẹ nọ a si no Ebaibol na, inọ: “Ahwo egagọ Hindu a gwọlọ riẹ kpahe odẹ-ova Ọghẹnẹ hẹ, ukpoye a gwọlọ riẹ odẹ-oma Ọghẹnẹ; a gbẹ riẹ odẹ na ha, a sai si kẹle hayo gọ ohwo nọ o wo odẹ na ha.” Evaọ uzẹme, ere o rrọ kẹ ahwo kpobi nọ a gwọlọ riẹ Ọghẹnẹ. Re ma sae riẹ oghẹrẹ ohwo nọ Ọghẹnẹ ọ rrọ, o gwọlọ nọ ma rẹ riẹ odẹ riẹ, inọ Ohwo dẹẹ ọ ginẹ rrọ, orọnikọ ogaga jọ gheghe he, yọ ma rẹ sai si kẹle iẹe. (Ọnyano 34:6, 7) Ebaibol na ọ ta nọ: “Ohwo kpobi nọ o bi se odẹ Jihova a ti siwi ei.” (Ahwo Rom 10:13) O gwọlọ nọ idibo Jihova kpobi a re se odẹ riẹ!
Efafa nọ e be wha orro se Ọghẹnẹ
A jọ Ebaibol Efafa Akpọ Ọkpokpọ na fodẹ odẹ Ọghẹnẹ, Jihova
O jọ oware ẹnyaharo ologbo evaọ ukpe 1950 nọ a ro siobọno Ebaibol Efafa Akpọ Ọkpokpọ ọrọ Ikereakere Griki Ileleikristi Na evaọ ẹvẹrẹ Oyibo. Evaọ ikpe 10 nọ i lele i rie, a je siobọno ebe Ikereakere Hibru na unọjọ utọjọ. Evaọ ukpe 1961, a te siobọno oma Ebaibol na soso evaọ ẹvẹrẹ Oyibo. Who re muẹrohọ nọ, a jọ Efafa Akpọ Ọkpokpọ na fa odẹ Ọghẹnẹ “Jihova,” bu te enwenọ asia idu ihrẹ (7,000) nọ o romavia evaọ Ọvọ Anwae na. Oware jọ nọ o mai woma kpaobọ evaọ Ebaibol nana họ, a zihe odẹ Ọghẹnẹ fihọ eria nọ i bu te 237 nọ ọ jọ romavia evaọ abọ Ikereakere Griki Ileleikristi na. *
Odẹ na nọ a zihe fihọ Ebaibol na o be wha orro se Ọghẹnẹ je fiobọhọ kẹ omai wo otoriẹ Ebaibol na. Wọhọ oriruo, enẹ efafa Ebaibol buobu a fa Matiu 22:44: “Olori na ọ ta kẹ Olori mẹ nọ.” Rekọ ono ọ be ta ẹme kẹ ono na? Enẹ Ebaibol Efafa Akpọ Ọkpokpọ na ọ fa Matiu 22:44: “Jihova ọ ta kẹ Olori mẹ nọ,” nwani lele oria nọ a rehọ e riẹ no ze evaọ obe Olezi 110:1. Fikiere ahwo nọ a se oria nana kpobi a rẹ ruẹ nọ ohẹriẹ o rrọ Jihova gbe Ọmọ riẹ.
Ono ọ fa riẹ?
Efafa Akpọ Ọkpokpọ na yọ Ebaibol Watch Tower Bible and Tract Society, odẹ nọ Isẹri Jihova a ro fi odẹ hotọ evaọ obọ egọmeti. O vrẹ ikpe udhusoi no nọ Isẹri Jihova a bi ro printi Ebaibol sa-sa jẹ rehọ ae kẹ ahwo evaọ akpọ na soso. Utu Isẹri Jihova nọ a re se Ogbẹgwae Efafa Ebaibol Akpọ Ọkpokpọ ae a fa Ebaibol Efafa Akpọ Ọkpokpọ na. Ahwo nọ a jọ ogbẹgwae na a gwọlọ okpodẹ hẹ, fikiere a tẹ ta nọ a du kere odẹ rai lahwe he o tẹ make rọnọ a whu no dede.—1 Ahwo Kọrint 10:31.
Fikieme a ro se Ebaibol nana Efafa Akpọ Ọkpokpọ? Ẹme emuhọ nọ ọ jọ efafa nọ a siobọno evaọ ukpe 1950 o ta nọ, odẹ nana o dhesẹ imuẹro egaga nọ ma wo inọ ahwo-akpọ a rrọ “unuẹthẹ akpọ ọkpokpọ na” wọhọ epanọ Ebaibol na ọ ta evaọ obe 2 Pita 3:13. Wọhọ epanọ ogbẹgwae nana o kere, “oke nana nọ ma bi ro no akpọ anwae nana kpohọ akpọ ọkpokpọ na,” o roja gaga re efafa Ebaibol u fiobọhọ ru elo “uzẹme Ẹme Ọghẹnẹ” lo via vevẹ.
Efafa nọ e rrọ gbagba
Oware nọ o mae jọ efefafa na oja họ, epanọ Ebaibol na ọ rẹ rọ jọ gbagba. Efefafa na a jẹ fa ovavo no ẹvẹrẹ Hibru, Aramaik gbe Griki ze, yọ iko-ebe nọ a re fievahọ a jẹ fa no ze. A daoma gaga re a ruẹ nọ a fa eme na gbagba wọhọ epanọ e rrọ ikere anwae na fihọ ẹvẹrẹ nọ ahwo oke mai na a re wo otoriẹ riẹ lọlọhọ.
Agbẹta nọ egba-iwuhrẹ Ebaibol jọ a ro jiri Ebaibol Efafa Akpọ Ọkpokpọ na fikinọ ọ rrọ gbagba. Profẹsọ jọ nọ a re se Benjamin Kedar-Kopfstein, nọ ọ rrọ ọgba-iwuhrẹ Hibru evaọ obọ Israel ọ ta evaọ ukpe 1989 nọ: “Me te bi ru ekiakiẹ evaọ Ebaibol ẹvẹrẹ Hibru gbe Ebaibol efa sa-sa, ẹsibuobu mẹ rẹ nyai ru ekiakiẹ evaọ Ebaibol Efafa Akpọ Ọkpokpọ na ọrọ Oyibo. Me muẹrohọ nọ ẹsikpobi nọ mẹ tẹ rehọ Ebaibol nana ro ru ekiakiẹ, me re gine wo otoriẹ eme na ziezi, yọ u mu omẹ ẹro nọ ahwo nọ a fa riẹ a daoma gaga re a fa Ebaibol na vevẹ te epanọ o gwọlọ.”
A fa Ebaibol na fihọ evẹrẹ efa
U te no ẹvẹrẹ Oyibo no, Isẹri Jihova a daoma fa Ebaibol Efafa Akpọ Ọkpokpọ na fihọ evẹrẹ efa buobu no. A fa abọjọ hayo oma Ebaibol nana soso fihọ evẹrẹ nọ i bu te ẹgba ọvo gbe udhosa gbe ikpegbizii (179) no. Re onana o sae lọhọ, a ru edhere okpokpọ jọ nọ a rẹ rọ fa Ebaibol na. Evaọ edhere nana, efefafa na a rẹ rọ ekọmputa ru ekiakiẹ re a sai wo otoriẹ eme Ebaibol na. A rọ ẹko iruo jọ nọ a re se Translation Services mu re u fiobọhọ kẹ efefafa na. Utu Ẹruorote Isẹri Jihova ae a be rọ ẹkwoma Ogbẹgwae Ebe-Ikere rẹrote efafa Ebaibol na. Rekọ ẹvẹ a bi ro ru iruo nana?
Orọ ọsosuọ, a rẹ rọ utu Ileleikristi nọ i kruga ziezi mu re a jọ utu efafa na. Eware nọ e via no i dhesẹ nọ utu efafa a te bi ru iruo kugbe, efafa rai e rẹ mai woma vi ẹsenọ omomọvo o te bi ru iruo na. (Itẹ 11:14) Ahwo nọ a rẹ jọ utu nana yọ ahwo nọ a ru iruo kri no evaọ efafa ebe Isẹri Jihova efa. Kẹsena a ve wuhrẹ utu na ziezi kpahe izi nọ e rẹ kpọ efafa Ebaibol gbe oghẹrẹ nọ a rẹ rọ rehọ ekọmputa ru iruo na.
A rẹ kẹ utu efafa na ekpọvio re a fa Ebaibol na gbagba, rekọ evaọ edhere nọ makọ ahwo nọ a kpohọ isukulu hu a re ro wo otoriẹ riẹ lọlọhọ. A rẹ fa eme na wọhọ epanọ e nwane rrọ unọjọ utọjọ nọ o tẹ lọhọ, rekọ a rẹ ruẹ nọ onana u nwene ovuẹ nọ o rrọ Ebaibol na ha. Ẹvẹ a re ro ru onana? Joma ta kpahe Ebaibol ọkpokpọ nọ a siobọno na. Utu efafa na a kake salọ eme Isoko rọkẹ igogo eme kpobi nọ e rrọ Ebaibol Efafa Akpọ Ọkpokpọ ọrọ ẹvẹrẹ Oyibo na. Oware nọ a ru fihọ ekọmputa nọ a re se Watchtower Translation System na u te dhesẹ eme kpobi nọ i tho ohwohwo evaọ Ebaibol na via. U te je dhesẹ eme ẹvẹrẹ Griki hayo Hibru nọ a si eme Oyibo na no ze, re efefafa na a ruẹ epanọ a rẹ rọ fa eme Griki gbe Hibru na evaọ eria efa kpobi nọ e jọ romavia. Nọ utu efafa na o tẹ nwane rọwo fihọ eme nọ a salọ na no, a ve mu Ebaibol na họ ẹfa. Nọ a be fa owọ ọvuọvo evaọ Ebaibol na, yọ ekọmputa na o bi dhesẹ ẹvẹrẹ Oyibo gbe eme Isoko nọ efefafa na a salọ kẹ igogo eme Ebaibol na.
Ghele na, orọnikọ efefafa na a rẹ rehọ eme Isoko na ro nwene eme Oyibo na ọvo ho. A ruẹ nọ eme nọ a salọ evaọ ẹvẹrẹ Isoko na i dhesẹ otofa eme Ebaibol na gbagba evaọ oria nọ a bi fi ai họ kpobi. A yọroma gaga re a fa eme na wọhọ epanọ ahwo a rẹ ta ẹme kẹdẹ kẹdẹ. Whọ rẹ ruẹ onana vevẹ evaọ Ebaibol ọkpokpọ nọ a fa na. Eme Isoko nọ a rọ fa Ebaibol Efafa Akpọ Ọkpokpọ na e lọhọ ese, e rrọ vevẹ nọ ahwo a re wo otoriẹ rai lọlọhọ, e tẹ jọ rrọ gbagba wọhọ eme ọsosuọ nọ a ro kere Ebaibol na. *
Ma be tuduhọ owhẹ awọ inọ who se Ebaibol Efafa Akpọ Ọkpokpọ ọrọ Ikereakere Efuafo Na kẹ omara. Whọ sae jọ itanẹte hayo JW Library app sei, hayo whọ sae ta kẹ Isẹri Jihova nọ e rrọ okegbe ra re a kẹ owhẹ ọnọ a printi no. Nọ who bi sei na, jọ u mu owhẹ ẹro nọ Ẹme Ọghẹnẹ nọ a fa fihọ ẹvẹrẹ ra gbagba who bi se na. Whọ te ginẹ ruẹ nọ Ebaibol ọkpokpọ nana nọ a siobọno na yọ ẹnyaharo ologbo evaọ egagọ Ọghẹnẹ!
Oghẹrẹ nọ a fa Ebaibol Efafa Akpọ Ọkpokpọ na
Eware nọ Ma rẹ Sai Wuhrẹ Evaọ Ebaibol Na:
Whọ rẹ jọ oria nana ruẹ eria ikere nọ e kẹ iyo enọ 20 kpahe igogo iwuhrẹ Ebaibol
Efafa Egbagba: A romatotọ fa eme Hibru, Aramaik, gbe Griki fihọ ẹvẹrẹ Oyibo, kẹsena a tẹ fa ae gbagba fihọ ẹvẹrẹ Isoko
Eria Ikere nọ E Rrọ Udevie Ẹwẹ-Obe: I dhesẹ eria Ebaibol efa nọ i kiekpahe ẹme ọvona
Ẹme-Ofiba A: A jariẹ ta kpahe abọ sa-sa Ebaibol ọkpokpọ na, wọhọ eme jọ nọ a nwene gbe oghẹrẹ nọ a ro kere odẹ Ọghẹnẹ
Ẹme-Ofiba B: U wo abọ 15 nọ a rọ ekọlọ sa-sa ru, gbe emapo avọ iwoho
^ edhe-ẹme 7 Ahwo buobu a re sei Ọvọ Anwae na.
^ edhe-ẹme 9 Wọhọ oriruo, ohwo nọ o wuzou efafa Ebaibol New International Version o kere nọ: “Jihova yọ odẹ nọ u ru Ọghẹnẹ wo ohẹriẹ no eghẹnẹ efa, yọ u fo nọ ma hae kere iei fihọ efafa mai. Rekọ igho nọ ma raha fihọ efafa nana i bu vi edọla ima ivẹ ($2,000,000). Wọhọ oriruo, o hae jọnọ ma fa obe Olezi 23 enẹ, ‘Yahweh họ othuru mẹ,’ igho kpobi nọ ma raha na e hae te jọ ivrẹvru keme Ebaibol mai na ọ hae te nya eki hi.”
^ edhe-ẹme 12 Ahwo buobu a re sei Ọvọ Ọkpokpọ na.
^ edhe-ẹme 24 Whọ tẹ gwọlọ gbe se kpahe eware nọ e rẹ kpọ efafa Ebaibol gbe oghẹrẹ nọ a fa Ebaibol Isoko na, iviena se ẹme-ofiba A1 gbe A2 evaọ Ebaibol Efafa Akpọ Ọkpokpọ na.