Evaọ ofẹ ovatha-ọre Canada nọ a rẹ jọ ta ẹvẹrẹ French, ahwo buobu nọ i diezọ a rẹ ta ẹvẹrẹ obọ rọ t’ẹme Quebec nọ a re se Quebec Sign Language (LSQ). a Fikinọ ahwo nọ i diezọ nọ e be ta ẹvẹrẹ obọ rọ t’ẹme Quebec na a bu te idu ezeza (6,000) ọvo, umutho ebe jọ ọvo a fa fihọ ẹvẹrẹ LSQ na. Rekọ fikinọ Isẹri Jihova a gwọlọ fiobọhọ kẹ ahwo wuhrẹ Ebaibol na, kẹle na a ru ọruẹrẹfihotọ nọ a rẹ rọ fa ebe buobu fihọ ẹvẹrẹ obọ rọ t’ẹme Quebec ọvọvẹ.

Re ma riẹ oware nọ iruo efafa nana i ro wuzou gaga, joma ta kpahe iku Marcel. A yẹ riẹ evaọ ukpe 1941 evaọ ubrotọ Canada nọ a re se Quebec. Nọ ikpe ivẹ e vrẹ no, o te kie ẹyao jọ nọ a re se meningitis nọ o lẹliẹ e riẹ diezọ. Marcel ọ ta nọ: “Nọ mẹ kpako te ikpe 9 no, me te mu isukulu ahwo nọ a diezọ họ ẹnya, yọ etẹe mẹ jọ wuhrẹ ẹvẹrẹ obọ rọ t’ẹme Quebec. Dede nọ emebe jọ e jariẹ nọ a je ro wuhrẹ umutho eware jọ evaọ ẹvẹrẹ obọ rọ t’ẹme, ebe nọ a fa fihọ ẹvẹrẹ obọ rọ t’ẹme e jariẹ hẹ.”

Fikieme u ro wuzou re a fa ebe fihọ ẹvẹrẹ obọ rọ t’ẹme Quebec? Marcel ọ ta nọ: “O rẹ were ahwo nọ a diezọ re a rehọ ẹvẹrẹ nọ a re wo otoriẹ riẹ ziezi vuẹ ae oware viukpenọ a rẹ rehọ ẹvẹrẹ nọ a wo otoriẹ riẹ hẹ ta ẹme kẹ ae. Ababọ ebe nọ a fa fihọ ẹvẹrẹ LSQ, ma re wo otoriẹ oware ovo ho, keme unu gbe ovao ahwo nọ a be ta ẹme ma te hai rri.”

Re a sai fiobọhọ kẹ Marcel gbe amọfa nọ i diezọ nọ e be ta ẹvẹrẹ obọ rọ t’ẹme Quebec, Isẹri Jihova a te siobọno obe ọsosuọ nọ a fa fihọ ẹvẹrẹ na evaọ ukpe 2005. Kẹle na, Isẹri Jihova a bọ uwou nọ a be jọ ru efafa anwẹdẹ rro vi epaọ ọsosuọ evaọ Montreal nọ o rrọ Quebec. Ahwo nọ a be rọ oke rai kpobi ru iruo evaọ etẹe a bu te 7, yọ ahwo nọ a bi ru iruo ubroke a bu vrẹ 12. A ghale rai kpohọ itu esa yọ a wo emamọ istudio ivẹ nọ a rẹ jọ rekọdo ividio ẹvẹrẹ obọ rọ t’ẹme Quebec.

Ividio nọ Isẹri Jihova a be fa fihọ ẹvẹrẹ obọ rọ t’ẹme Quebec na o be were ahwo nọ a be ta ẹvẹrẹ na gaga. Ọzae jọ nọ a re se Stéphan Jacques, nọ ọ rrọ ethabọ ohwo agbara ukoko obufihọ jọ nọ a re se des Sourds de l’Estrie, b ọ ta nọ: “Me muẹrohọ nọ a rẹ riẹ ebe rai fa wowoma. Ẹvẹrẹ obọ rọ t’ẹme rai ọ rẹ jọ vevẹ, yọ oghẹrẹ nọ ahwo nọ a be fa ebe na a re ru ovao o rẹ were owhẹ oma. Oware ofa jọ nọ o were omẹ gaga họ, ahwo nọ a rẹ jọ ividio rai a rẹ gọ ẹgọ kpatiẹ.

Isẹri Jihova a re wuhrẹ emagazini Uwou-Eroro Na evaọ iwuhrẹ rai koka koka. Enẹna a be hae fa Uwou-Eroro Na fihọ ẹvẹrẹ obọ rọ t’ẹme Quebec rọkẹ Isẹri Jihova nọ i bu te egba ivẹ gbe udhe (220), jẹ rọkẹ amọfa nọ e rrọ ikoko obọ rọ t’ẹme 7 gbe itu sa-sa evaọ Quebec. c Ofariẹ, Isẹri Jihova a be fa ividio ẹvẹrẹ obọ rọ t’ẹme Quebec buobu fihọ itanẹte, kugbe ile nọ e rẹ sasa ohwo oma nọ a rehọ no Ebaibol na ze.

Eva e be were Marcel nọ ma fodẹ evaọ obehru na gaga inọ ebe nọ a be fa fihọ ẹvẹrẹ obọ rọ t’eme Quebec i bi dhe ebuebu. Rekọ enọ Isẹri Jihova a be fa e mae were ae. Ọ ta nọ: “Oghale ulogbo o rrọ inọ ividio obọ rọ t’ẹme Quebec buobu e rrọ jw.org. Eva e be were omẹ gaga inọ mẹ be ruẹ eware nana kpobi evaọ ẹvẹrẹ mẹ!”