Isẹri Jihova a fa ebe nọ a kere evaọ ẹvẹrẹ Oyibo no Ebaibol na ze fihọ evẹrẹ nọ i bu vi egba izii (900) no. O nwane lọhọ tere he re a sae fa obe nọ a kere evaọ ẹvẹrẹ jọ fihọ ọfa. O mae tubẹ bẹ re a fa oware fihọ ẹvẹrẹ obọ rọ t’ẹme. Abọ gbe ovao ahwo buobu nọ a diezọ a mae rọ ta ẹme, fikiere efefafa ẹvẹrẹ obọ rọ t’ẹme a rẹ fa ẹme nọ a kere fihọ ividio. Isẹri Jihova a rọ oghẹrẹ utiona fa ebe rai fihọ evẹrẹ obọ rọ t’ẹme sa-sa nọ i bu vi udhone gbikpe no.

Wọhọ efefafa Isẹri Jihova efa, ahwo nọ a rẹ fa ebe fihọ ẹvẹrẹ obọ rọ t’ẹme a rẹ riẹ ẹvẹrẹ nọ a be fa fihọ na ziezi. Ibuobu rai i diezọ yọ ẹvẹrẹ obọ rọ t’ẹme a rọ yọrọ ae hayo o sae jọnọ a diezọ họ rekọ a whẹro evaọ uviuwou nọ ahwo jọ a jọ diezọ. Efefafa na a rẹ riẹ Ebaibol na ziezi re.

A re wuhrẹ efefafa ekpokpọ ziezi re a riẹ izi nọ e rẹ kpọ efafa. Wọhọ oriruo, Andrew ọ ta nọ: “Nọ mẹ jẹ whẹro ze, mẹ riẹ ẹvẹrẹ obọ rọ t’ẹme keme me kpohọ isukulu ahwo nọ a diezọ, rekọ eware nọ a wuhrẹ omẹ wọhọ ọfefafa i fiobọhọ kẹ omẹ riẹ izi nọ e rẹ kpọ ẹvẹrẹ obọ rọ t’ẹme. Ibe efefafa mẹ a wuhrẹ omẹ epanọ mẹ sai ro wo onaa ziezi evaọ oghẹrẹ nọ me rẹ rọ abọ, ovao gbe omamẹ ro dhesẹ oware nọ mẹ gwọlọ ta gbagba ziezi.”

Efefafa a re ru iruo kugbe evaọ itu sa-sa. Omomọvo o wo owha iruo riẹ evaọ utu na, wọhọ ohwo nọ ọ rẹ fa, ohwo nọ ọ rẹ kiẹ eware nọ a fa riwi, gbe ohwo nọ o re sei sọ oware jọ o jariẹ thọ. Kẹsena o tẹ lọhọ, utu ahwo nọ a diezọ nọ i no eria sa-sa ze a ve kokohọ re a kiẹ efafa na riwi. A vẹ rehọ eware nọ ahwo nana a muẹrohọ ro ru efafa na woma viere. Onana u re fiobọhọ kẹ ae ruẹ nọ a fa eme na evaọ oghẹrẹ nọ ahwo nọ a diezọ a rẹ rọ ta ẹme kẹdẹ kẹdẹ, jẹ ruẹ nọ ividio na e rrọ gbagba.

Efefafa ẹvẹrẹ obọ rọ t’ẹme a re kpohọ iwuhrẹ Isẹri Jihova nọ a rẹ rọ ẹvẹrẹ obọ rọ t’ẹme ru. Ofariẹ, ẹvẹrẹ obọ rọ t’ẹme a re ro wuhrẹ Ebaibol na kugbe ahwo nọ i diezọ. Enẹ efefafa na a rẹ rọ riẹ oghẹrẹ nọ ahwo nọ a diezọ a be rọ ta ẹme kẹdẹ kẹdẹ.

Ebaibol na ọ ta nọ ahwo “nọ i no erẹwho, erua, oghoghẹrẹ ahwo gbe evẹrẹ” kpobi ze a te gaviezọ kẹ ovuẹ Ebaibol na nọ o rẹ kẹ ẹruore na. (Eviavia 7:9, oruvẹ-obotọ) Ahwo nọ i diezọ a rrọ usu ahwo nana re.

Eva e rẹ were efefafa na re a rehọ oke gbe onaa rai ruiruo nana nọ i wuzou gaga na. Ọfefafa jọ nọ a re se Tony ọ ta nọ: “Fikinọ me diezọ, mẹ riẹ ebẹbẹ nọ ahwo nọ i diezọ a be rẹriẹ ovao dhe. O rrọ utee mẹ re mẹ daoma nyate ahwo nọ a diezọ kpobi oma re mẹ vuẹ ae kpahe ẹruore nọ o rrọ Ebaibol na.”

Amanda nọ o bi ru iruo evaọ utu obọ rọ t’ẹme jọ ọ ta nọ: “Me rri nọ enẹna mẹ be mai ru emamọ iruo vi oke ọsosuọ keme me bi kuomagbe fa ebe nọ i re fiobọhọ kẹ ahwo nọ i diezọ re a riẹ oware nọ Ebaibol na ọ ta.”

A jọ etenẹ na “Find Sign-Language Content” dhesẹ epanọ whọ sae rọ gwọlọ ividio ẹvẹrẹ obọ rọ t’ẹme evaọ jw.org.