Uwou-Eroro na họ emagazini nọ a be mai printi bu vi emagazini ọfa kpobi evaọ akpọ na. Unu nọ a re printi evaọ onọ a kere kpobi u bu vi ima udhuvẹ gbe ivẹ (42 million). Emagazini Awake! ọ tẹ rọ kẹle iẹe, yọ unu nọ a re printi evaọ onọ a kere kpobi u bu te ima udhuvẹ gbe ọvo (41 million). Isẹri Jihova họ enọ i bi kere emagazini ivẹ nana, yọ a be rehọ ae kẹ ahwo evaọ erẹwho egba ivẹ gbe ọgba gbe ezeza (236).

Kọ ẹvẹ emagazini nọ amọfa a bi kere i bu te? Ukoko ahwo nọ u re kere emagazini nọ a re se Association of Magazine Media o niyẹrẹ nọ emagazini nọ utu AARP a bi kere họ onọ a be mai printi bu evaọ usu enọ egọmeti America o be hwosa fihọ, yọ ahwo nọ a kpako vrẹ ikpe 50 no a be mai kere emagazini nana kẹ. Unu emagazini nana nọ a re printi evaọ ukere kpobi u bu vrẹ ima udhegbivẹ gbe idu egba ene (22.4 million). Emagazini ahwo Germany nọ a re se ADAC Motorwelt o joma bu te ima ikpegbene (14 million), yọ orọ ahwo China nọ a re se Gushi Hui (koyehọ Ikuigbe) u bu te ima isoi gbe idu egba ene (5.4 million).

Evaọ ebe-usi na kpobi, orọ ahwo Japan nọ a re se Yomiuri Shimbun họ onọ o mai bu. Unu nọ a re printi evaọ ukere kpobi u bu vrẹ ima ikpe (10 million).

Evẹrẹ nọ a be fa ebe Isẹri Jihova fihọ i bu vi erọ ebe efa kpobi re. A be fa Uwou-Eroro Na fihọ evẹrẹ nọ i bu vrẹ udhuzii gbe ikpe (190), yọ a be fa Awake! fihọ evẹrẹ nọ i bu vrẹ 80. Enana i bu gaga vi emagazini ọ Reader’s Digest nọ a be fa fihọ evẹrẹ 21, yọ eware nọ e riẹe eva evaọ orẹwho jọ i re wo ohẹriẹ no erọ orẹwho ọfa.

Wo ohẹriẹ no emagazini edekọ kpobi nọ ma fodẹ na, azọhọ unevaze a bi ro printi Uwou-Eroro Na gbe Awake!, a re whowho ai evaọ irediyo gbe etẹlẹvisiọno ho, yọ a rẹ zẹ ae gbe he.

Ẹjiroro nọ a bi ro kere Uwou-Eroro Na họ re u ru ahwo riẹ iwuhrẹ Ebaibol vevẹ, maero kọ oware nọ Ikereakere na e ta kpahe Uvie Ọghẹnẹ. Anwọ ukpe 1879 ze a bi ro kere Uwou-Eroro Na. A rẹ jọ Awake! ta kpahe eware sa-sa, wọhọ emama gbe otọkiẹ-eriariẹ re u fi obọ họ kẹ ahwo riẹ Ọghẹnẹ, Ọnọ ọ ma omai na. O rẹ jẹ ta kpahe epanọ ehrẹ Ebaibol nọ ma re fihọ iruo i re ro fi obọ họ kẹ omai yeri emamọ uzuazọ.