“Ividio Nana I Woma Vi Ividio Efa Kpobi”
Kukpe kukpe, Isẹri Jihova a re ru ividio buobu nọ a re dhesẹ evaọ ikokohọ ubrotọ rai. Ẹvẹrẹ Oyibo a re ro ru ividio nana buobu. Nọ o rrọ ere na, ẹvẹ ahwo nọ a bi ru ikokohọ evaọ evẹrẹ efa nọ e rrọ Oyibo ho a be sai ro wo otoriẹ ividio nọ a bi dhesẹ evaọ ikokohọ na? Evaọ evẹrẹ efa nana buobu, a be wariẹ rekọdo ividio na evaọ evẹrẹ nọ ahwo na a re yo dẹẹ. Ẹvẹ ividio nọ a be wariẹ rekọdo na e be jọ ahwo na oma?
Oghẹrẹ nọ Ividio na E be Jọ Ahwo Oma
Rri eme jọ nọ ahwo nọ a rrọ Isẹri Jihova ha a ta evaọ okenọ a kpohọ okokohọ ubrotọ Isẹri Jihova evaọ Mexico gbe Central America:
“Me wo otoriẹ ividio na vevẹ, yọ o jọ omẹ oma wọhọ ẹsenọ mẹ jọ usu ahwo nọ a rrọ ividio na. U duobọte omẹ udu gaga.”—Ohwo nọ o kpohọ okokohọ ubrotọ nọ a rọ ẹvẹrẹ Popoluca ru evaọ Veracruz, nọ o rrọ Mexico.
“O jọ wọhọ ẹsenọ mẹ rrọ obọ ẹwho mẹ bi lele ogbẹnyusu ọkpekpe mẹ gbiku. Ividio nana i woma vi ividio efa keme me wo otoriẹ rai ziezi.”—Ohwo nọ o kpohọ okokohọ ubrotọ nọ a rọ ẹvẹrẹ Nahuatl ru evaọ Nuevo León, nọ o rrọ Mexico.
“Nọ me rri ividio na evaọ ẹvẹrẹ mẹ, o jọ wọhọ ẹsenọ ahwo nọ a rrọ ividio na a be ta ẹme kẹ omẹ.”—Ohwo nọ o kpohọ okokohọ ubrotọ nọ a rọ ẹvẹrẹ Chol ru evaọ Tabasco, nọ o rrọ Mexico.
“Ukoko nana o be daoma gaga re a sai fiobọhọ kẹ ahwo wuhrẹ Ẹme Ọghẹnẹ evaọ ẹvẹrẹ obọrai. Ukoko ovuovo nọ o wọhọ ukoko nana o rrọ họ!”—Ohwo nọ o kpohọ okokohọ ubrotọ nọ a rọ ẹvẹrẹ Cakchiquel ru evaọ Sololá, nọ o rrọ Guatemala.
Isẹri Jihova a rẹ haya ahwo nọ a wo onaa epanọ a rẹ rekọdo re a fiobọhọ kẹ ai rekọdo ividio rai hi, yọ eria nọ i siomano, nọ i rovie aro tere he a rẹ jọ rekọdo ividio rai. Kọ ẹvẹ a be sae rọ rekọdo ividio nọ i woma te enẹ?
“Iruo nọ E Mai Woma Kpaobọ”
Kẹle na, uwou ogha Isẹri Jihova nọ o rrọ Central America u ru ọruẹrẹfihotọ nọ a rọ rekọdo ividio okokohọ ubrotọ evaọ ẹvẹrẹ Spanish gbe evẹrẹ 38 efa. Ahwo nọ a fialoma via nọ a fiobọhọ ru iruo na a bu te idu ivẹ gbe egba isoi (2,500). Enọ i wo onaa nọ e rẹ rọ ekwakwa ekọmputa rekọdo gbe itu ahwo nọ i re ruiruo efafa a rekọdo evẹrẹ nana evaọ uwou ogha, ifisi efafa nọ e rrọ eria sa-sa, gbe eria efa gheghe nọ a rẹ jọ rekọdo evaọ ubroke. A jọ eria sa-sa nọ i bu vi 20 rekọdo evaọ Belize, Guatemala, Honduras, Mexico, gbe Panama.
Ahwo nọ a be rekọdo evaọ uwou ogha nọ o rrọ Central America
O gwọlọ omodawọ gaga re a sae ruẹrẹ eria nọ a re ro ru istudio họ. Nọ orọnọ a te jọ eria nana rekọdo evaọ umutho oke jọ ọvo na, a rẹ daoma re a siọ ugho ba ẹraha gahrọ. A rẹ rehọ eware gheghe nọ i te rai obọ evaọ eria nọ a be jọ rekọdo na rọ whaha edo nọ ọ rẹ rueva istudio na, eware wọhọ emehọ gbe ifomu.
Ahwo buobu nọ a rrọ emotọ eria nọ a rọ rekọdo ividio na a wo ugho tere he, rekọ a daoma gaga re a sae nya hayo jẹ ofa kpohọ istudio nọ ọ kẹle rai. O rehọ ejọ rai euwa 14 soso taure a te ti te oria nọ a be jọ rekọdo na. Evaọ ẹdẹjọ dede, ọsẹ jọ avọ ọmọ riẹ a rehọ enwene euwa eree rọ nya edhere taure a te ti te istudio na.
No anwọ emaha ze, Naomi ọ be hai ro fiobọhọ kẹ ahwo uviuwou riẹ ruẹrẹ istudio nọ a rẹ jọ rekọdo evaọ ubroke họ. Ọ ta nọ: “Ẹsikpobi ma jẹ hae rẹro oka nọ a rẹ rọ rekọdo na. Ọsẹ mẹ ọ jẹ hae daoma gaga re iruo na e sae riẹ nya ziezi. Evaọ ẹsejọ dede, oni mẹ o re there emu kẹ ahwo nọ a nyaze te rekọdo na nọ i bu te 30.” Enẹna, Naomi o bi ruiruo evaọ ọfisi efafa nọ o rrọ obọ Mexico. Ọ ta nọ: “Eva e be were omẹ gaga inọ mẹ be rehọ oke mẹ fiobọhọ kẹ ahwo re a sai yo ovuẹ Uvie na evaọ ẹvẹrẹ obọrai. Iruo nana họ iruo nọ e mai woma kpaobọ nọ ohwo o re ru.”
Kukpe kukpe, Isẹri Jihova a re ru ikokohọ ubrotọ evaọ akpọ na soso, yọ ohwo kpobi ọ rẹ sae nyaze. Re whọ gbẹ riẹ kpahe eware efa, iviena rri oria IKOKOHỌ