Uwou-Eroro Oyibo nọ A Ru Eme Riẹ Lọhọ
Evaọ Ahrẹ 2011, a siobọno uvitha ọsosuọ orọ emagazini Uwou-Eroro Na nọ a ru eme riẹ lọhọ evaọ ẹvẹrẹ Oyibo, onọ ma ta nọ ma be dawo evaọ ẹgbukpe ọvo. Ẹgbukpe na ọ vrẹ no, yọ ma jiroro nọ ma rẹ ruabọhọ ekere riẹ.
No umuo amara Ọvo 2013 vrẹ, ma ti je wo Uwou-Eroro nọ a rọ eme elọlọhọ kere evaọ ẹvẹrẹ French, Portuguese, gbe Spanish.
A kere orọ eme elọlọhọ na re u fi obọ họ kẹ ahwo nọ Oyibo ọ rrọ ẹvẹrẹ rai hi nọ a be rọ Oyibo ru ewuhrẹ evaọ obọ Ọgwa Uvie.
Anwọ oke nọ a ro siobọno uvitha ọsosuọ Uwou-Eroro nana, ahwo buobu a bi kere ileta uyere se omai. Omọvo rai jọ họ Rebecca, ọnọ ọ kpako te ikpe 64 no nọ ọ be rria obọ Liberia, yọ o kpohọ isukulu ẹdẹvo ho. O kere nọ: “Me bi wuhrẹ obe-use. Ẹsejọ me re se Uwou-Eroro Na rekọ me re wo otoriẹ riẹ hẹ. Onọ a rọ eme elọlọhọ kere na o were omẹ gaga. Me bi wo otoriẹ riẹ ziezi.”
Esẹgbini buobu a be rọ orọ eme elọlọhọ na fi obọ họ kẹ emọ rai ruẹrẹ oma kpahe kẹ Uwuhrẹ Uwou-Eroro na, nọ o rrọ usu iwuhrẹ nọ Isẹri Jihova a re ru.
Oniọvo-ọmọtẹ jọ nọ a re se Rosemary nọ ọ be yọrọ emọ-iruọmọ esa riẹ o kere nọ: “O jẹ hae jọ bẹbẹ re mẹ avọ emọ na ma ruẹrẹ oma kpahe kẹ Uwuhrẹ Uwou-Eroro na. Ma rẹ rọ obe-ofeme rri otofa eme buobu. Onana o jẹ hae raha oke te epanọ ma gbe ro wo otoriẹ oware nọ uzoẹme na o be ta ha. Enẹna, ma be rehọ oke na se eria Ebaibol nọ a fodẹ gbe oghẹrẹ nọ i ro kiekpahe uzoẹme na.”