Emọ eklase avọ 136 ọrọ isukulu Giliad a nwrotọ evaọ Ẹdẹ-Ọmaha, Asa 8, 2014. Emera isoi soso a romatotọ wuhrẹ Ebaibol na. Evaọ isukulu nana, inievo nọ i kri ukoko na no a re wuhrẹ epanọ a sae ro wo onaa ziezi evaọ iruo usi uwoma ota rai gbe epanọ a rẹ rọ bọ ẹrọwọ inievo ukoko na ga. Ahwo nọ a kokohọ evaọ okenọ emọ-isukulu na a je nwrotọ a bu te idu ikpegbọvo gbe egba-isoi gbe udhuvẹ-gberee (11,548). Ahwo jọ evaọ usu ahwo nana a kokohọ ọgwa okokohọ Isẹri Jihova nọ ọ rrọ Patterson, New York, yọ amọfa jọ a rehọ ividio thuru kugbe enọ e jọ ọgwa okokohọ na no eria sa-sa ze evaọ Canada, Jamaica, Puerto Rico, gbe United States.

“Ẹsikpobi jọ Wha Wo Oghẹrẹ Iroro Nana.” David Splane nọ ọ rrọ omọvo Utu Ẹruorote Iruẹru Isẹri Jihova, ọye ọ jọ ohwo-agbara. Ọ rehọ ẹme emuhọ riẹ no obe Ahwo Filipai 2:5-7 ze, onọ o ta nọ: “Ẹsikpobi jọ wha wo oghẹrẹ iroro nana nọ Kristi Jesu o wo re na.” Evaọ okenọ Jesu ọ jọ otọakpọ, ọ jẹ ruawa ọkwa ha, ukpoye ọ romakpotọ ru iruo nọ Ọghẹnẹ ọ kẹ riẹ.

Wọhọ oriruo, Jesu o kie kẹ edawọ Ẹdhọ ọvo ho. Ọ jẹ kẹ Ẹdhọ uyo nọ, “A kere nọ,” yọ usu eme nọ Mosis ọ ta kẹ ahwo orẹwho Izrẹl ọ rehọ eme nana no ze. (Matiu 4:4, 7, 10; Iziewariẹ 6:13, 16; 8:3) Dede nọ Jesu ọ hae sae rọ udu obọriẹ rọ ta ẹme fikinọ ọye yọ Ọmọ Ọghẹnẹ nọ a wholo na, ọ wariẹ eme Mosis na ro dhesẹ epanọ eme riẹ na e were riẹ te. Ere o gwọlọ nọ ma re ru re, u fo nọ ma re jiri amọfa rọkẹ emamọ eware nọ a ru.

Brọda Splane ọ tẹ jẹ ta kpahe epanọ Jesu o ro dhesẹ ọkpọ iroro evona evaọ okenọ o je ku iruo riẹ họ evaọ otọakpọ. Jesu ọ lẹ nọ: “Mẹ kẹ owhẹ oruaro no evaọ otọakpọ na, keme me ru iruo nọ whọ kẹ omẹ re no. Fikiere enẹna, Ọsẹ, kẹ omẹ oruaro evaọ abotọ ra, oghẹrẹ oruaro nọ mẹ jọ abotọ ra wo vẹre taure akpọ na o te ti muhọ.” (Jọn 17:4, 5) Orọnikọ Jesu ọ jẹ gwọlọ epanọ a rẹ rọ kẹe ọkwa ọfa ha. Ukpoye oware nọ ọ lẹ kpahe họ, epanọ Ọghẹnẹ ọ rẹ rọ wariẹ kẹe ọkwa nọ o wo vẹre, hayo ‘epanọ ọ rẹ rọ kẹe iruo nọ o je ru vẹre,’ nọ o te zihe kpobọ odhiwu no. Epọvo na re, o gwọlọ nọ emọ-isukulu Giliad nọ a bi nwrotọ na a rẹ rọ aro kele Jesu. Ukpenọ a re ru epanọ a re wo ọkwa ọkpokpọ, a rẹ daoma tẹrovi iruo rai. Yọ iruo rai e rẹ dae ẹro nọ a gbẹ maki wo owha-iruo ọkpokpọ họ nọ a te zihe kpohọ uwou ogha nọ a no ze.

“Wha te Vioja Eware nọ Wha Siobọno Ho.” William Malenfant nọ ọ rrọ ofiobọhọ kẹ Ogbẹgwae Ewuhrẹ ọrọ Utu Ẹruorote na, ọ tuduhọ emọ-isukulu na awọ re a rọ aro kele oghẹrẹ nọ Pọl ukọ na ọ jẹ rọ rehọ uzuazọ riẹ gbodibo kẹ amọfa. Ukpenọ o re rri kpemu je roro kpahe eware nọ o siobọno re ọ sai ru iruo Ọghẹnẹ ziezi, Pọl ọ ta nọ: “Mẹ be kpairoro vrẹ eware nọ e rrọ obemu jẹ be daoma kpobi le eware nọ e rrọ obaro.”​—Ahwo Filipai 3:13, 14.

Nọ emọ-isukulu na a gbẹ vioja eware nọ a siobọno ho, u re dhesẹ nọ a be rọ aro kele idibo Ọghẹnẹ evaọ oke anwae gbe oke mai na nọ i wo ẹrọwọ. Brọda Malenfant ọ ta kpahe iku oniọvo-ọmọtẹ jọ nọ a re se Clara Gerber Moyer nọ ọ gọ Jihova no oke emaha riẹ ze. Oniọvo-ọmọtẹ na ọ ta nọ: “Nọ me te roro kpahe ikpe udhone nọ mẹ rọ rehọ omamẹ mudhe jẹ be gọ Jihova na, mẹ sae ta nọ uvẹ ọghọ ulogbo o ginẹ rrọ, yọ mẹ vioja riẹ vievie he! O hae jọnọ mẹ rẹ wariẹ akpọ mẹ yeri, epọvo na me re yeri uzuazọ mẹ.”

“Wha bi Lele Ikọ-Odhiwu Ta Usi Uwoma na yọ Wha Wọhọ Ikọ-Odhiwu Re.” Gerrit Lösch nọ ọ rrọ omọvo Utu Ẹruorote na o fiobọhọ kẹ emọ-isukulu na ruẹ eware ivẹ jọ nọ ohwo kpobi nọ ọ be ta usi uwoma na ọ rẹ reawere rai. Orọ ọsosuọ, nọ a tẹ be vuẹ ahwo kpahe ovuẹ usi uwoma Uvie na, a wọhọ ikọ-odhiwu Ọghẹnẹ, keme a rẹ sae jẹ fa ẹme Griki gbe Hibru nọ a fa “ukọ-odhiwu” evaọ Ebaibol na wọhọ “ọnyukọ.” Orọ avivẹ, ikọ-odhiwu na a rẹ kpọ enọ e be ta usi uwoma na bru ahwo nọ a gwọlọ obufihọ, wọhọ epanọ ukọ odhiwu jọ o ru kẹ Filip.​—Iruẹru Ikọ 8:26-35.

Kẹsena Brọda Lösch o te gbiku eware buobu nọ Isẹri Jihova jọ a rọ ẹro ruẹ no evaọ iruo usi uwoma ota na. Wọhọ oriruo, Osẹri Jihova jọ evaọ Mexico nọ a re se Gabino ọ jẹ hai kporo ẹthẹ ẹsiẹvo hayo isiava ọvo nọ o te kpohọ usi uwoma. Rekọ evaọ ẹdẹjọ nọ o kpohọ usi uwoma, o kporo ẹthẹ uwou jọ te isiane soso. Nọ ọzae na ọ nya lahwe, ọ tẹ ta kẹ Gabino nọ epanọ o re ro thuru whu o je ru vẹre na. Ọzae na ọ ta nọ: “Nọ who kporo ẹthẹ na ọrọ avọ isiane, yọ mẹ jẹ ufi fihọ uvou mẹ no. Rekọ mẹ tẹ rae no re mẹ riẹ ohwo nọ o bi kporo ẹthẹ na. Who ru kẹhẹ nọ who ro kporo ẹthẹ na unuẹse buobu. Keme who gbe ru ere he, enẹ yọ me whu no.”

Dede nọ ma rẹ nyaku oghẹrẹ eware itienana ẹsikpobi hi, e rẹ ginẹ via ẹsejọ. Rekọ eware itienana i re ru omai riẹ nọ ikọ-odhiwu Ọghẹnẹ a be ginẹ kpọ iruo usi uwoma ota na akpọ na soso.​—Eviavia 14:6.

“A te Ghale Ọnọ O Wo Ọghọ.” Michael Burnett nọ ọ rrọ owuhrẹ evaọ isukulu Giliad, ọye ọ kẹ ovuẹ nana. Ọ ta kpahe oriruo Jebẹz nọ o no uye Juda ze, ọnọ o “wo ọghọ vi inievo-emezae riẹ.” Jebẹz ọ lẹ se Ọghẹnẹ nọ: “O, ghale omẹ je ru ẹkwotọ mẹ kẹre, je ru re obọ ra o jọ kugbe omẹ jẹ thọ omẹ no okpẹtu.”​—1 Iruẹru-Ivie 4:9, 10.

Emọ-isukulu na a sae rọ aro kele emamọ oriruo Jebẹz nọ a tẹ be hae lẹ se Jihova kpahe uzedhe oware nọ a gwọlọ. Maero na, a sae lẹ se Ọghẹnẹ re o fiobọhọ kẹ ae ru iruo nọ a rọ fiki riẹ kpohọ isukulu Giliad na ziezi. O tẹ jẹ gwọlọ nọ a rẹ lẹ se Ọghẹnẹ re ọ thọ ae no okpẹtu, orọnikọ re o si okpẹtu na no riẹriẹriẹ hẹ, rekọ re o fiobọhọ kẹ ae thihakọ uweri hayo ebẹbẹ nọ emuemu o rẹ sae wha ze. Ọghẹnẹ ọ gaviezọ kẹ olẹ Jebẹz na, yọ o ti ru epọvo na kẹ emọ-isukulu Giliad na.

“Jọ Erae Ra E Hae Ware Ẹsikpobi.” Mark Noumair nọ ọ rrọ owuhrẹ evaọ isukulu Giliad gbe ofiobọhọ rọkẹ Ogbẹgwae Ewuhrẹ, ọ rehọ ẹme riẹ no obe 1 Ahwo Tẹsalonika 5:16-19 ze. Re erae e seba efu, e gwọlọ ire, ofou, gbe ẹroro. Epọvo na, o gwọlọ nọ emọ-isukulu na a re ru eware esa jọ re ọwhọ nọ a be rọ ta usi uwoma na ọ seba ekiekpo.

Orọ ọsosuọ, “Wha hae ghọghọ ẹsikpobi.” (1 Ahwo Tẹsalonika 5:16) Nọ emọ-isukulu na a tẹ be hai roro kpahe epanọ Jihova ọ rọ jẹ egagọ rai rehọ, a sai wo oghọghọ nọ u re ru ọwhọ nọ a wo kẹ usi uwoma ota na jọ gaga. Orọ avọ ivẹ, “Wha hae lẹ kẹse kẹse.” (1 Ahwo Tẹsalonika 5:17) Olẹ o wọhọ ofou nọ ọ rẹ lẹliẹ erae ware ziezi. U fo nọ ma re wo oke ziezi nọ ma rẹ rọ ta eva mai kẹ Jihova. Orọ avọ esa, “Wha kẹ uyere evaọ oware kpobi.” (1 Ahwo Tẹsalonika 5:18) Nọ ma te wo uruemu uyere-okẹ, u re ru usu mai kugbe Jihova gbe inievo ukoko na jọ gaga. Brọda Noumair ọ ta nọ: “Hae dhesẹ nọ eware nọ amọfa a bi ru e da owhẹ ẹro fia, ukpenọ whọ rẹ fo ahwo evaọ oware kpobi.”

“Kuomagbe Emama nọ E Rrọ Ehru na Jiri Jihova.” Sam Roberson nọ ọ rrọ owuhrẹ evaọ isukulu ukoko na jọ, ọ rehọ ẹme emuhọ riẹ no obe Olezi ze inọ, ọre, ọvẹre, gbe isi na a bi jiri Jihova. (Olezi 19:1; 89:37; 148:3) Ọ ta nọ emọ-isukulu na omarai a wo uvẹ nọ a be hai ro jiri Jihova re. Kẹsena o te gbiku emamọ iyẹrẹ nọ emọ-isukulu na a rọ ẹro ruẹ no evaọ odibọgba rai, yọ a rọ idhesẹvia ro ru onana. Wọhọ oriruo, ẹdẹ jọ nọ ọmọ-isukulu na jọ ọ jẹ dhẹ omoto vrẹ, ọ tẹ hẹrẹ re ọzae jọ nọ ọ rrọ ọmo ọ fa edhere vrẹ. Ọzae nọ ọ rrọ ọmo na o te yere ọmọ-isukulu na, yọ ọmọ-isukulu na o yere ọzae na gaga re. Kẹsena ọmọ-isukulu na ọ tẹ rọ uvẹ yena ta usi uwoma kẹe, yọ ọzae na ọ rọwo nọ a wuhrẹ Ebaibol kugbei. Evaọ eka nọ i lele i rie nọ ọmọ-isukulu Giliad na o je ro wuhrẹ Ebaibol kugbe ọzae na, ọ rọ uvẹ yena ta usi uwoma kẹ ahwo buobu nọ a je weze bru ọzae na ze. Uwhremu na, a te mu Ebaibol na họ ewuhrẹ kugbe imahrẹ evaọ usu ahwo na.

“Ajọ Isukulu Uvie na I Fiobọhọ kẹ Owhẹ Jọ Gaga.” Donald Gordon nọ ọ rrọ ofiobọhọ kẹ Ogbẹgwae Ebe-Iwhowho, ọ kiẹ ezae ivẹ jọ nọ e rọo no avọ eyae rai riwi evaọ eklase na. Oniọvo-ọmọzae jọ evaọ usu inievo ivẹ na ọ ta nọ a jẹ ta kpahe obe Ahwo Ẹfisọs 3:16-20 evaọ isukulu na gaga. Onana u fiobọhọ kẹ emọ-isukulu na “jọ gaga” ẹkwoma omaurokpotọ nọ a je dhesẹ re amọfa a sae ta ẹme kẹ ae lọlọhọ. Onana u te je fiobọhọ kẹ ae vuhumu nọ Jihova o gbe wo iruo buobu nọ ọ gwọlọ nọ idibo riẹ a re ru. Oniọvo-ọmọtẹ jọ evaọ usu rai ọ ta nọ, oghẹrẹ nọ owuhrẹ jọ evaọ isukulu Giliad na ọ rọ tuduhọ emọ-isukulu na awọ o were e riẹ gaga. Ọ ta kẹ ae nọ a jọ wọhọ emeri ọsese nọ ọ rẹ sae rro evaọ abade, orọnikọ eri ologbo nọ ọ rrọ omodhe ọsese nọ umutho ame ọvo ọ rrọ họ. Oniọvo-ọmọtẹ na ọ ta nọ: “Oware nọ me wuhrẹ no oriruo nana ze họ, me te ru omamẹ wọhọ ọnọ ọ mae kawo evaọ ukoko Jihova, Jihova o ti fiobọhọ kẹ omẹ wo ẹnyaharo ziezi evaọ ukoko na.”

“Ajọ Jihova Ọ Kareghẹhọ Owhẹ Rọkẹ Iruo Iwoma Ra.” Mark Sanderson nọ ọ rrọ omọvo Utu Ẹruorote na, ọye họ ọnọ ọ kẹ ovuẹ obọdẹ. Ọ rehọ uzoẹme riẹ no olẹ nọ Nehemaya ọ lẹ ze, inọ: “Kareghẹhọ omẹ rọkẹ iruo iwoma mẹ, O Ọghẹnẹ mẹ.” (Nehemaya 5:19; 13:31) Orọnikọ ozọ u je mu Nehemaya ha inọ ọyomariẹ gbe iruo nọ o ru e te thọrọ Jihova ẹro. Ukpoye, ọ jẹ lẹ se Jihova re ọ hae kareghẹhọ iẹe jẹ ghale iẹe.

Epọvo na, emọ-isukulu na a sai fievahọ Jihova inọ ọ te kareghẹhọ ae rọkẹ iruo iwoma rai nọ a te fi eware nọ a wuhrẹ evaọ isukulu Giliead na họ iruo evaọ uzuazọ rai. Wọhọ oriruo, u fo nọ uyoyou nọ a wo kẹ Jihova o rẹ jọ ugogo ẹjiroro nọ o rẹ wọ ae gọe. (Mak 12:30) Abraham ọ rehọ udu riẹ kpobi you Jihova, yọ Ọghẹnẹ ọ kareghẹhọ iẹe rọkẹ iruo iwoma riẹ. Nọ Abraham ọ maki whu kri vrẹ odu ikpe no, Ọghẹnẹ o gbe sei “ogbẹnyusu mẹ.”​—Aizaya 41:8.

Kẹsena Brọda Sanderson ọ tẹ tuduhọ emọ-isukulu na awọ re a hai you erivẹ rai, maero kọ inievo-emezae gbe erọ emetẹ nọ e rrọ ukoko na. (Mak 12:31) Wọhọ epanọ emamọ ohwo Sameria na o “ru omariẹ ọrivẹ kẹ ọzae nọ o kie ruọ abọ igbulegbu na,” ere o gwọlọ nọ emọ-isukulu na a rẹ fialoma via re a fiobọhọ kẹ ahwo nọ a gwọlọ obufihọ. (Luk 10:36) Ọ rehọ oriruo Brọda Nicholas Kovalak ro ru ẹme riẹ na vẹ, ọnọ o nwrotọ no isukulu Giliad evaọ okenọ u kpemu je ru iruo ọsẹro ubrotọ evaọ oke jọ. Ahwo a riẹ Brọda Kovalak inọ ọ jọ whẹtiẹ whẹtiẹ, yọ ọ jọ yoyou re. Evaọ oke jọ, ọ tuduhọ ọsẹro okogho jọ avọ aye riẹ awọ re a kru oma ga ziezi evaọ usi uwoma ota rai. Ọ ta kẹ ae inọ, “Wha hae kaki muhọ evaọ okpẹdẹ, evaọ ẹkpoka, evaọ amara, gbe evaọ ẹgbukpe.” Rekọ nọ o muẹrohọ oniọvo-ọmọtẹ na evaọ emedẹ jọ no, ọ tẹ ta kẹe nọ: “Kpairoro vrẹ ẹme nọ mẹ vuẹ owhai na. Wha bi ru gahrọ dede. Wha ru ẹmẹrera re wha sae tọ evaọ egagọ Jihova.” Ohrẹ nana u fiobọhọ kẹ oniọvo-ọmọtẹ na gọ Jihova evaọ ikpe buobu evaọ iruo odibọgba oke-kpobi na.

Nọ Brọda Sanderson o je ku ẹme riẹ họ, ọ tẹ tuduhọ emọ-isukulu na awọ re a ru ẹjiroro nọ a ro zizie ai ziọ isukulu na gba, ẹkwoma amọfa nọ a re wuhrẹ je fiobọhọ kẹ re a rẹrote ewha-iruo. (2 Timoti 2:2) Nọ a te ru enẹ evaọ okenọ a te zihe kpohọ iruo rai, u ti ru nọ a te rọ bọ inievo na ga, yọ Jihova ọ te kareghẹhọ ae rọkẹ iruo iwoma rai.​—Olezi 20:1-5.

Ekuhọ. Nọ a kẹ emọ-isukulu na obe nọ a ro nwrotọ no, ọmọ-isukulu na jọ o te se ileta uyere nọ emọ eklase na a kere. Kẹsena emọ-isukulu ikpegbisoi evaọ usu emọ eklase na a tẹ so ole avọ 123 evaọ obe-ile Suile kẹ Jihova na, onọ uzoẹme riẹ o ta nọ, “Esẹro Na​—A Rehọ e Rai Mu Wọhọ Ekẹ.”