A be rọ ekatapila tọ ẹkpẹ fihọ itipa ologbo. Taure a te ti mu ebabọ na họ, a tọ ẹkpẹ buobu no otọ ze jẹ whẹe fihọ oria ọfa evaọ oria ebabọ na.

Ahwo nọ a bi ru iruo evaọ Ẹko-iruo Ẹlẹtriki a be whẹ iwhaya fihọ. Ifisi sa-sa gbe oria nọ a rẹ jọ re emu evaọ etoke ebabọ na e te jọ oria nana nọ o kẹle oria nọ a be bọ uwou ogha na fihọ na.

Uwoho nana u bi dhesẹ oria ọkpokpọ nọ imoto e rẹ dhẹ ghelie họ gbe edhere nọ a te hae rọ dhẹ ruọ uwou ogha na. Evaọ ofẹ ẹkpẹlobọ oria ugheghelie na, a be ruẹrẹ oria jọ fihọ nọ ọgbọ gbe ame nọ a te jọ yọrọ imiyei ọ te jọ. U te je wo oria nọ ahwo nọ a te rria uwou-ogha na gbe erara nọ i weze ze a rẹ jọ rri ughe.

A be wariẹ kporo itho gbe eblọko nọ a kokohọ evaọ otọ na hẹhẹhẹ re a rehọ ae ru edhere.

Evaọ ẹkpẹlobọ na, a bi ru edhere nọ a te dhẹ evaọ oke iruo na gbe uzedhe ọnọ a te hae dhẹ. Oware ọfuafo jọnọ a re se geotextile a bi ro ru ei. Ame o re fi geotextile na vrẹ, yọ ọ rẹ lẹliẹ edhere na jọ gaga. Evaọ obọze na, a be rehọ ekatapila ọgbẹgbẹdẹ dhẹ edhere na re otọ na ọ sae ga ziezi taure a te ti fi oware ọfuafo na họ iẹe.

Ahwo nọ a gwọlọ wobọ evaọ iruo ebabọ na a be nọ enọ kpahe eware jọ. Ọruẹrẹfihotọ omakokohọ nana yọ ovo jọ evaọ usu 18 evaọ Britain gbe Ireland nọ ogbẹgwae iruo ebabọ na a ru. Isẹri Jihova nọ i bu vi idu ikpegbisoi (15,000) ae a ziọ omakokohọ nana, yọ ibuobu a fialoma via re a wobọ evaọ iruo ebabọ na.

Ahwo nọ a rẹ ruẹrẹ otọ họ a be vravra ẹkpẹ obiebi fihọ awọ ure willow nọ a kọ obọ. Ure nana yọ ọvo jọ evaọ usu ire egba ihrẹ (700) nọ a kọ fihọ otọ na. Owẹ nana u re fiobọhọ whaha ame nọ o re ku okegbe na nọ okposo ọ tẹ rrọ. A rẹ rehọ iẹe rawo ame jẹ rọ ẹmẹrera siobọnoi nọ a tẹ gwọlọ.

Evaọ ẹdẹ nana, igrigri e jọ oria kpobi, yọ a jẹ rọ ekatapila nọ e rẹ tọ otọ gbe itipa ilogbo ruẹrẹ otọ na họ. Evaọ omariẹ kpobi, ekpẹ nọ a rọ ekatapila gbe itipa tọ no oria ruọ oria i bu wumuo ho. A te dhesẹ iẹe, ekpẹ na e rẹ vọ itipa ilogbo nọ i bu te idu ikpe (10,000) kiọkọ.

Ahwo nana a be ruẹrẹ otọ na họ taure a tẹ te kọ oghoghẹrẹ ire nọ a re ro diogba fihọ iẹe. A kọ oghoghẹrẹ ire ikpegbọvo gbe ẹbe sa-sa nọ i bu te ikpegbezeza fihọ ọgbọ na gbe ighẹ na, yọ aikpobi na yọ ire gbe ẹbe nọ whọ rẹ ruẹ evaọ ubrotọ nana.

Evaọ ofẹ ẹkpẹlobọ na, a be rọ ẹjini tọ eghogho họ otọ na rọkẹ eria nọ o te jọ otọhotọ iwou nọ a te rria na. Ọkpọ nọ a be rọ tọ otọ na o wo eghogho. Nọ a te bi wolo ọkpọ na no yọ a be rọ eghogho nọ ọ rrọ ọkpọ na ku ekọkre fihọ ọgọdọ na. Evaọ obọze uwoho na, a be thọrọ eyọno nọ a gba fihọ ọgọdọ nọ a ku ekọkre fihọ no na. Egọdọ nọ a tọ, ku ekọkre fihọ, jẹ thọrọ eyọno fihọ rọkẹ otọhotọ uwou na i bu vi egba esa gbe udhosa (360).

Ekpahe e jọ gaga evaọ ohiohiẹ nana, yọ ohwo nana o bi ru ọkpọ ame nọ a ti si kpohọ ifisi nọ a te jọ ru iruo evaọ ubroke ọvo.

A be rehọ ekatapila nọ a sai ro ru iruo evaọ ame whẹ eloho, erara gbe egha-ire no owẹ ologbo nana. A gbabọkẹ iwẹ itienana buobu nọ e jọ otọ na, yọ o gwọlọ nọ a rẹ ruẹrẹ ae. Ekpẹ nọ a whẹ fihọ ekakọ iwẹ nana i ti fiobọhọ ru ae kpehru, yọ onana o te whaha ame nọ o re ku okegbe na nọ okposo ọ tẹ rrọ. Iyei nọ a si no owẹ nana kpohọ iwẹ efa nọ e rrọ ogba na i bu te idu ivẹ gbe egba isoi (2,500), taure a tẹ te ruẹrẹ owẹ na.

Nọ uwoho eria nọ a te bọ iwou nọ a rẹ rria fihọ. Who te rri obotọ na, a mu otọhotọ iwou na jọ họ no. Evaọ obọze obotọ na, whọ rẹ ruẹ edẹẹ otọhotọ uwou na nọ i dikihẹ. Evaọ ẹkpẹlobọ obotọ na, a ku ekọkre fihọ edẹẹ na no. Evaọ udevie na, a gbẹ be tọ ighogho rọkẹ edẹẹ iwou na.

Ohwo nọ o bi ru ẹthẹ evaọ oria nọ ahwo a rẹ jọ rri ughe taure a te ti gbe ọda họ iẹe. Ahwo nọ a nyaze ti rri ughe a sae jọ etenẹ na ruẹ iwoho iwou nọ a te bọ fihọ ogba na, jẹ gadiẹ kpehru re a ruẹ epanọ iruo ebabọ na e be nyaharo te.

A be wọ ẹjini nọ a rẹ rọ wọ eware egbẹgbẹdẹ fihọ ẹta riẹ. A re se ẹjini na crane, yọ a rẹ rehọ iẹe wọ eware kpehru nọ a tẹ be bọ uwou ehru idhe buobu. Crane na o kpehru te imita 40, yọ a sae rehọ iẹe wọ oware nọ ọ gbẹdẹ te ekpa isimeti egba esa gbe udhe (320) ẹsiẹvo.

A be rehọ ẹjini jọ bru ipila hayo edẹẹ uwou na fihọ umumuo nọ a gwọlọ. Evaọ okenọ a ti ku ekọkre fihọ otọ uwou na, a vẹ gba eyọno nọ e tehe lahwe evaọ edẹẹ na kugbe enọ e te jọ otọhotọ uwou na.

Ahwo nọ a re ru ikpẹ a bi fi oka JW.ORG fihọ ugbẹhẹ nọ a ma fihọ akotọ edhere nọ a rẹ rọ rueva uwou ogha na. Ọnana yọ ọvo jọ evaọ usu ivẹ nọ a ti fihọ iẹe.

Etenẹ na yọ oria ogheghelie nọ imoto e rẹ rọ dhẹ ruọ evaọ ogba na nọ a ru no obọ. Evaọ ẹkpẹlobọ na, whọ rẹ ruẹ eka JW.ORG ivẹ nọ i bi dhesẹ nọ etenẹ na yọ uwou ogha Isẹri Jihova. Nọ a tẹ ruẹrẹ owẹ na jẹ kọ ire fihọ akotọ riẹ kpobi no, e te whẹ erru họ edhere nọ a rẹ rọ dhẹ ruọ uwou ogha na.

Obọ Crane na o theri te imita 65, fikiere evaọ usu iwou isoi nọ a te bọ na, a sae rehọ iẹe ruiruo evaọ iwou ene. Evaọ obọze na, a bi ku ekọkre fihọ eria nọ a rẹ dhẹ imoto fihọ evaọ obotọ iwou nọ a te rria na. A gba eyọno fihọ no, enọ e te jọ igbẹhẹ gbe edẹẹ uwou na.