A be rọ omoto na wọ uwou ayọno jọ fihọ ehru ọfa. Etenẹ na ahwo nọ a ziọ ugheriwo a sae jọ rri iruo nọ a bi ru na. Anwọ Asoi 2017 a rọ kuvẹ re ahwo a nyaze ti rri ughe iruo na. Taure amara Aria o te ti te, ahwo nọ a bu te idu ikpegbihrẹ (17,000) a kere odẹ fihọ otọ no rọkẹ ugheriwo na.

A be rọ ẹjini nọ a re se crane rọ wọ oware nọ a tehe fihọ Uwou F. Ọna họ uwou ọsosuọ nọ a kake bọ nọ a te rria. Fikinọ eria nọ e wariẹ iwou na họ e rọ vevẹ, a sae wọ eware nọ a tehe na fihọ iwou na ababọ ẹkpare nọ a rẹ kpare ae no tao.

Iwou isoi nọ a te rria a be bọ ẹsiẹvo na. Evaọ uwoho nọ ọ kẹle omai na, a be gba ayọno fihọ otọhotọ Uwou B taure a te ti ku ekọkre fihọ iẹe. Evaọ uwoho nọ ọ rrọ obọze evaọ obaro na, a bi ku ekọkre fihọ edhe ọsosuọ ọrọ Uwou D. Evaọ ẹkpẹlobọ obaro na, a be rọ crane wọ oware nọ ọ te jọ obotọ oria nọ ilifti gbe oria nọ a rẹ rọ gadiẹ kpehru e te jọ evaọ Uwou E.

Ahwo nana a be whẹ ekpọ ame nọ a re ro furie erae kugbe. Erae a rọ ghra ekpọ ivẹ nana re e sae tamu ohwohwo ziezi. Kẹsena a ve ru oria nọ ekpọ ivẹ na e jọ kugbe na re o jọ riẹriẹriẹ je rri oria na sọ ọ ginẹ ga ziezi. A tẹ ma uthethei eria nọ a fi ekpọ ame itienana họ, i re theri te emaele ivẹ.

Ohwo nọ ọ be wezẹ ekọvẹte nọ a ru obọ. Ekọvẹte sa-sa nọ a ru fihọ ogba na u re ru ei lọhọ re a ru edhere fihọ oria nọ ame o bi su vrẹ. Onana u re ru nọ ame ọ sai ro su kpohọ iwẹ sa-sa nọ e rrọ ogba na je ru nọ ame o gbe ro ku ogba na ha.

Ọzae-avọ-aye nọ a bi kpoka họ oria nọ ekọridọ ọ te jọ evaọ uwou edhe obotọ.

Uwoho nana u bi dhesẹ iwou isoi nọ a te rria nọ a muhọ ẹbọ no. Taure amara Azie o te ti te yọ a bọ edẹẹ nọ i kru iwou na kpobi no, a te je mu igbẹhẹ obeva Uwou F họ ẹbọ no (ọye ọ rrọ obọze evaọ obemu kpobi na). Evaọ oke yena yọ a mu igbẹhẹ Uwou F họ ẹralọ gbe epenti no. Evaọ oke ọvona, a te je mu igbẹhẹ gbe inwido Uwou E họ ẹwọ fihọ (ọye ọ rrọ ẹkpẹlobọ evaọ obemu kpobi na). Oke nana a ro mu Iwou B,C, gbe D họ ẹruẹrẹ kpahe re a mu iruo họ wọhọ otọhotọ iwou na, iruo ẹlẹtriki, gbe eware efa.

Brọda Robert Luccioni yọ ofiobọhọ kẹ Ogbẹgwae Ebe-Iwhowho ọrọ Utu Ẹruorote Isẹri Jihova gbe ọsẹro ẹko-iruo ebabọ Isẹri Jihova evaọ akpọ na soso nọ a re se Worldwide Design/Construction Department (WDC). Ọ be rehọ ovuẹ Ebaibol tuduhọ itu ebabọ sa-sa awọ. Ẹko-iruo WDC na họ ahwo nọ a rẹ rẹrote ebabọ iwou ogha ekpokpọ jẹ ruẹ nọ a ru iruo na ziezi ababọ igho nọ a rẹ raha gahrọ.

Ahwo nana a bi ku ekọkre nọ a te rọ bọ uwou nọ a ti fi egase, ekọmputa nọ a rẹ rọ sẹro evuẹ gbe eware ikpẹ họ. Evaọ obọze na, a be rehọ ẹjini ku ekọkre fihọ otọhotọ ogba uwou na re o whaha edo nọ o re no ijini nana ze.

Utu ahwo nọ a rẹ drọ iwou a be kiẹ omaa uwou na riwi re a riẹ oria nọ a te gba eyọno fihọ evaọ otọ na.

Ohwo na o bi fi ifremu nọ a rọ ayọno ru họ ugbẹhẹ otafe.

A bi fi eskafo wariẹ otafe uwou nọ a re se E nọ a rẹ rria re o lọhọ kẹ ahwo nọ a ti ru iruo evaọ otafe ugbẹhẹ uwou na.

Ohwo na ọ be rehọ ọda obọdẹ jọ ralọ inwido nọ a whẹhọ no obọ. Nọ ọda na ọ tẹ ya no, o ve zihe ruọ urọba nọ o rẹ thọ eglase nọ e rrọ inwido na nọ a bi ru iruo na. Nọ a je ru iruo na re no, a ve korie iei no.

Ahwo nana a bi rri sọ ekpọ ame ọroro nọ e rrọ otọ uwou na i bi ruiruo ziezi. Nọ a tẹ ruẹ nọ aikpobi i bi ruiruo ziezi, a ve ku ekọkre ro ruru ai.

Ohwo na o bi bru idodo na ruẹrẹhọ evaọ oria ugheghelie nọ a rẹ rọ rueva uwou ogha na. Oghẹrẹ idodo nana i re ru nọ ebe gheghe i gbe ro di ze he, onọ u re ru nọ a gbẹ raha oke gaga rọ rẹrote oria nana ha.

Ohwo na o bi rri oware jọ nọ a re se GPS ro kpoka họ edhere nọ a te rọ rueva uwou nọ ifisi e te jọ. Ọ tehe ayọno jọ fihọ otọ, ọ tẹ be rehọ ọda ro wholo iei re ahwo a ruẹ e riẹ vevẹ. A te bọ ikichini fihọ iẹe gbe oria nọ a rẹ jọ re emu, yọ a sae je kokohọ oria na re. Iwou nọ a rẹ rria whọ be ruẹ evaọ ugbothabọ na.

Ọzae-avọ-aye nọ a be tehe ire fihọ oria nọ a gwọlọ ku ekọkre fihọ. Ọgọdọ na yọ oria nọ a sae jọ kpọ ame oso. Evaọ obemu na, whọ rẹ sae ruẹ iwou nọ a re se E gbe F. A rehọ irọba ilogbo ruru oma iwou ivẹ na wariẹ. A ru ere re a sae jọ eva rai ru iruo evaọ oke ekpahe.

A bi wuhrẹ ohwo jọ epanọ ọ sae rọ rehọ ijini nana rọ wọ oware. A sae rọ ẹjini nana wọ eblọko nọ ọ gbẹdẹ te enwenọ ẹkpa isimeti gbe ubro. Nọ a tẹ rọ ẹjini na wọ eblọko esese fihọ akotọ edhere na no, a ve ku ekọkre fihọ tabọ tabọ riẹ.

A be wọ ọkpọ ame na ruẹrẹhọ yọ ohwo jọ o kru rie daji ziezi. Ekpọ ame nọ a ti fihọ ogba na soso i ti theri te emaele esa.

Ohwo nana ọ be rọ ẹjini ro bru eblọko. A rẹ rọ ibro eblọko na bọ obotọ iwou nọ a rẹ rria. Onana o rẹ wha erru fihọ iwou na. A te kele unu ibro eblọko nọ a ti ro ru akotọ iwou na, i ti bu vi idu egba esa (300,000).