Imava nana a bi ku ekọkre fihọ aro oria nọ a te hae jọ ruẹrẹ ijini gbe imoto nọ a ti ro ru iruo ebabọ na.

Ahwo nọ a haya a be tehe idhe fihọ uwou nọ ifisi gbe eria nọ a rẹ jọ re emu e te jọ evaọ etoke nọ a ti ru iruo ebabọ na.

Evaọ edhere nọ a rẹ rọ dhẹ ruọ oria na, omọvo iruiruo na jọ ọ be rehọ ekatapila nọ a thahe oware nọ a re ro bru ire fihọ ro bru ire jọ no edhere na. Nọ ọ tẹ rehọ oware nọ a re ro bru ire na ro bru ure no, ọ vẹ rehọ ekatapila na wọe vrẹ. Fikinọ a ti bru ire jọ no, ahwo nọ a rẹ ruẹrẹ otọ a te kọ ire idu buobu fihọ otọ na taure iruo ebabọ na i te ti kuhọ.

Iruiruo nana a bi si eware kpobi nọ ohwo nọ o wo otọ na vẹre ọ nyaseba no. Kẹsena a ve ti ru ẹkpẹ na fo taure a tẹ te rehọ iẹe ru oware kpobi nọ a gwọlọ rehọ iẹe ru.

Ahwo nana a bi ru epanọ a rẹ rọ rehọ ẹjini nọ a re se crane rọ wọ imiwou nọ a te jọ ruiruo fihọ eria nọ u fo nọ e rẹ jọ. Te inievo nọ i ti ru iruo ebabọ na gbe ahwo nọ a haya kẹ iruo jọ, a ti zihe imiwou nana ruọ ifisi gbe eria nọ a rẹ jọ ruẹrẹ eware kpahe kẹ iruo ebabọ na.

Iruiruo nana a be kwa eware jọ nọ i gbe woma evaọ otọ na fihọ eria sa-sa, re a ku ae kugbe ro ru iruo ebabọ na. Utee Ogbẹgwae Iruo Ebabọ na họ, re a kwa enwenọ eware ezuzu kpobi nọ ekọmpene efa a ku fihọ otọ na no, rekọ a bi tube ru vi epanọ a ma omaa riẹ na dede. Ofariẹ, enwenọ eware kpobi nọ i no iwou nọ a kporo evaọ otọ na ze, wọhọ eblọko, ekọkre, gbe ire, a ti kugbe ro ru iruo ebabọ na.

Ohwo nana ọ be tọ ẹkpẹ ruru ọgọdọ nọ a fi ekpọ họ. A tọ ọgọdọ nana kpohọ iwou nọ ahwo nọ a ti ru iruo ebabọ na a te rria evaọ etoke ebabọ na.

Ohwo nọ a haya ọ be kiẹ ẹkpẹ riwi sọ ẹkpẹ na o woma te epanọ a sae rọ rehọ iẹe ru idhere nọ e te jọ uwou ogha na.

Evaọ amara Asoi 31, 2016, Utu Ẹruorote Iruẹru Isẹri Jihova u kuenu kẹ omaa-uwou nana. Iruo ebabọ na e sai muhọ obọnana keme Utu Ẹruorote na a kuenu kẹe no, yọ ahwo egọmeti nọ e rrọ ẹwho na a kaki kuenu kẹe no vẹre.

Ahwo nana a bi si eware nọ i woma ha no ẹkpẹ nọ a whẹ no otọ na ze. A ti ku ẹkpẹ na kugbe ro ru iruo ebabọ na. Onana u ti ru nọ a gbẹ raha ugho rọ tọ ẹkpẹ na kufiẹ hẹ hayo dẹ ẹkpẹ ọfa ha.

Ahwo nana a be rọ ekatapila gbẹ oria nọ a ti ru edhere nọ a rẹ rọ dhẹ ruọ uwou ogha na fihọ. A ruabọhọ iruo na ghele dede nọ ikpisoi e jẹ rrọ evaọ amara na soso, onọ u ru nọ epọtọ pọtọ e rọ jọ otọ na soso.

A be rọ ekatapila na frẹ ame fihọ idhere na soso re ovu ọ gbẹ ra vọ oria kpobi hi. Orufuọ nọ a re ru evaọ oria nọ a be jọ bọ uwou yọ abọ jọ oware nọ ukoko nọ a re se Considerate Constructors Scheme o ta nọ ahwo kpobi nọ a be bọ uwou a re ru evaọ ẹwho na, yọ Ogbẹgwae Iruo Ebabọ na o rọwo fihọ iẹe re. Uruemu ẹfuọ nana nọ ukoko yena o be tuduhọ ahwo awọ nọ a ru na, yọ oware nọ o rọwokugbe ẹme nọ Ebaibol na ọ ta. A be rọ enẹ dhesẹ adhẹẹ kẹ ahwo ẹwho na gbe erivẹ rai.

Ohwo nana o bi bru eyọno nọ a ti fihọ otọ eware nọ a te wọ ẹkọdishọno fihọ.

Ahwo nana a bi si ewẹ eblọko gbe itho no ẹkpẹ. Wọhọ epanọ whọ be ruẹ evaọ udevie uwoho na, a be rehọ ekatapila whẹ ewẹ eblọko, itho, gbe ẹkpẹ nọ e gua kugbe fihọ ẹjini jọ. Ẹjini na o re voro ẹkpẹ na jẹ hẹriẹ ewẹ eblọko gbe itho na, te esese gbe ilogbo fihọ ofẹ sa-sa, kẹsena ẹkpẹ na o ve kie kpobọ otọ. Nọ ẹjini na ọ be hẹriẹ ewẹ itho, eblọko, gbe ẹkpẹ na, e vẹ nyai hwẹ fihọ ekatapila esa nọ e wariẹ e riẹ họ na.

Ahwo nọ a haya a be rehọ ekatapila tunye ẹkpẹ obuobu nana ruẹrẹhọ, re o gbe kpehru vi epanọ a gwọlọ họ.

Evaọ oria udevie nọ o rrọ ofẹ ẹkpẹlobọ na, whọ rẹ ruẹ nọ ahwo nọ a haya a rehọ ekatapila ru ei fihọ riẹriẹriẹ no, re a sae mu otọhotọ iwou nọ a te rria họ ẹtọ fihọ iẹe. Who te gbe rri kpobọ emu evaọ ofẹ ẹkpẹlobọ na, whọ rẹ ruẹ iwou nọ a bọ fihọ etẹe nọ ahwo nọ a ti ru iruo ebabọ na a te rria. Ahwo nọ a bu te udhusoi gbe ikpegberee (118) ae a te rria iwou na.