Ahwo nana yọ utu ahwo nọ a bi ruiruo evaọ otafe ugbẹhẹ uwou na. A be rehọ oware jọ ru ibriki ekpakpala tamu ohwohwo. A te rehọ ewẹ ibriki nana ruru eyọno nọ a fihọ ifremu uwou na.

Ohwo nana yọ omọvo utu ahwo nọ a rẹ ruẹ nọ a ru lele omaa uwou nọ a drọ fihotọ no. Ọ be rehọ okwakwa nọ o rrọ obọ riẹ na kpoka họ oria nọ ugbẹhẹ o te jọ. Evaọ oke ovona, ahwo nọ a rẹ tehe iwou a mu iruo họ eru no evaọ obeva uwou F nọ ma be ruẹ evaọ ugbo na.

Ohwo nana ọ be nẹ ame fihọ ugbẹhẹ nọ a ralọ no, ọ tẹ be rehọ oware nọ o rrọ obọ riẹ na ru ei riẹriẹ ziezi. Re a gbẹ raha ame gahrọ họ, ame nọ okwakwa ẹlẹtriki nọ a rẹ rọ rawo ame no ofou ze o kokohọ a re ro ru iruo. A rẹ rehọ ame nana ro misi isimeti nọ a rẹ rọ ralọ uwou, gbe oware nọ a re ro di ighogho etaeze.

Ahwo nọ a haya nọ a re ru edhere a bi ru ikota fihọ edhere jọ nọ a rẹ rrọ dhẹ kpohọ idhere efa. Etenẹ nọ a rrọ na o kẹle uwou nọ a rẹ rria nọ a re se E.

Ọzae jọ nọ ọ kpako te ikpe udhosa gbe ikpegbọvo no ọ be bọ ugbẹhẹ uwou nọ a rẹ rria nọ a re se F. Anwọ okenọ ebabọ na i ro muhọ na, Isẹri Jihova nọ i bu vrẹ udhusoi nọ e kpako vrẹ ikpe udhosa-gbikpe no a be hae fialoma ze re a rehọ onaa iruo rai ru iruo ebabọ na.

Uwoho nana u bi dhesẹ iwou nọ a te rria nọ a bọ thabọ no. A te kọ ẹbe fihọ ehru iwou kpobi nọ a te rria na. Taure a te ti ru onana, a ti ru obehru na fihọ oghẹrẹ nọ o gbe ro fi ame he, kẹsena a vẹ whẹ ẹkpẹ fihọ iẹe jẹ kọ ebe sa-sa nọ e rrọ okegbe yena fihọ iẹe. Iwou nọ ebe e rrọ ehru rai enẹ i re fiobọhọ kẹ emera gbe evra. Obeva iwou itiena e rẹ jọ dhedhẹ fikiere a rẹ gbẹ raha ugho fihọ AC tere he, yọ ame oso nọ o re su kufiẹ o re gbe tulo ho. Oria nọ a ku isimeti fihọ na yọ oria nọ o te jọ otọhotọ uwou nọ a rẹ rria nọ a re se A gbe abọjọ otọhotọ uwou nọ ifisi e te jọ.

Ahwo nana a bi fi ifremu ẹthẹ nọ a rehọ ayọno ru họ ubruwou jọ. Taure a tẹ te rehọ ifremu na ze, a re fi ethẹ gbe usiavẹ họ ai je tube penti rai no, fikiere a rẹ whẹ ethẹ na họ lọlọhọ.

Evaọ owọwọ nọ oke o bi si aro họ no, ahwo nọ a haya a bi ku ekọkre fihọ ighogho ipila uwou na. Evaọ udevie uwoho na, whọ rẹ ruẹ nọ a be thọrọ eyọno nọ a gba kugbe fihọ eghogho nọ a ku ekọkre họ no. Ighogho na i diwi te imita udhe. Uwou nọ a rẹ rria nọ a re se B whọ be ruẹ evaọ ugbo na.

Ohwo nana ọ be thahe eware nọ a ti ro kru ekpọ ame ọrrorro fihọ isilini evaọ edhe nọ a rẹ dhẹ imoto fihọ. Eware nọ a ro ru isilini na i re ru ei bẹbẹ re edhedhẹ o te edhe-uwou nọ ọ rrọ obehru nọ ahwo a te rria.

Ohwo nana ọ be rehọ ẹjini ru ugbẹhẹ na fihọ riẹriẹriẹ taure a tẹ te gọmu oware fihọ iẹe. Imighogho nọ e rrọ ẹjini na i re se ovu kpobi rehọ.

Imava nana a bi ru iruo evaọ edhere jọ nọ a rẹ rọ dhẹ kpohọ oria ẹko-iruo jọ. A be mahe ighogho fihọ eria nọ a ku isimeti fihọ evaọ edhere na. Ighogho na e rẹ lẹliẹ edhere na di ẹbe ze je ru nọ ame oso o gbe ro su gaga evaọ edhere na ha.

Ahwo nana a be rọ ẹjini ro penti obehru ikichini ubruwou jọ.

Ahwo nana a bi si eware nọ a rẹ rọ gadiẹ no ofẹ jọ ruọ ofẹ ọfa taure a te ti mu iruo họ evaọ ofẹ yena. Ekpọ ewawae nọ e rrọ udevie uwou na a re ro ru ẹrrorro fihọ uwou na evaọ etoke ekpahe. Ẹrrorro na o rẹ lẹliẹ otọ gbe ugbẹhẹ nọ a ralọ je penti kake ya.

Ohwo nana o bi ru oware nọ a gọmu fihọ ugbẹhẹ na re o jọ riẹriẹriẹ. Oware nọ a gọmu fihọ ugbẹhẹ na u woma kẹ oria nọ u re zurie gaga keme a rẹ sae wezẹ iẹe yọ o rẹ tọ ziezi. Whọ rẹ ruẹ ahwo nọ a gbe bi ru iruo nọ a bi penti ugbẹhẹ na jẹ biẹ oware nọ a be gọmu fihọ ugbẹhẹ na.

Iruiruo nọ a kokohọ be gbẹgwae evaọ ohiohiẹ taure a te ti mu iruo họ. Ohwo nọ o wuzou ẹko-iruo na ọ be ta kẹ ae kpahe oware nọ u je wuzou re a ru iruo ebabọ na ababọ omonwa. Ahwo nọ a rrọ eko-iruo efa ae a fialoma ze re a fiobọhọ ru iruo orufuọ evaọ uwou nọ a re se F gbe okegbe riẹ taure ahwo a tẹ te kwa ro iẹe.

Ahwo nọ a haya a bi ru ogebara fihọ obemu ibruwou nọ e rrọ uwou nọ a re se F na kpobi. Ẹjini nọ ọ rẹ wọ ohwo kpehru ọye a rueva je ro ru eware na fihọ iẹe. A rẹ rọ ekọlọ nọ a ro penti ogebara iwou na ọvuọvo ro vuhu ae, yọ ekọlọ na e rẹ jọ wọhọ ebe ẹwọ nọ e rrọ okegbe na. Whọ rẹ jọ ugbothabọ na ruẹ uwou nọ a re se E. A bi si ipruvu nọ a ro ruru ei no ehru riẹ taure a te ti si eware nọ a rẹ rọ gadiẹ no oma uwou na.

Nọ iruo i kuhọ no, ọzae-avọ-aye jọ a tẹ be kwa eware rai kpohọ uwou nọ a re se F nọ a bọ re no evaọ ẹdẹ nọ ọ nwane vrẹ na. A bi fi ahwo nọ a bi ru iruo na họ iwou ekpokpọ nọ a bọ no na evaọ omoke jọ. Onana o rẹ whae ze nọ a gbẹ rọ haya uwou hayo raha ugho fihọ ofa tere he, je wo oke ru iruo na ziezi.

Ahwo nọ a haya a bi ku ekọkre fihọ edhe nọ a rẹ dhẹ imoto fihọ evaọ ubrobọ owọwọ. Uwou nọ a rẹ rria nọ a re se B whọ be ruẹ nọ o kẹle riẹ na.

Ọzae-avọ-aye jọ nọ a rrọ ẹko-iruo ekapenta a be rehọ ẹjini jọ bru eghogho fihọ oware nọ a re fihọ ehru ekọbọdo ikichini, yọ evaọ oke ovona a be rehọ ẹjini ọfa ro se erara nọ a bi bru lahwe na rehọ. A bi bru eware na evaọ ikichini nọ a gwọlọ fi ae họ re e seba ewiri evaọ etoke nọ a tẹ be wọ ae.