Oruiruo nana o bi fi eware họ oma ekpọ-ame ọrrorro evaọ ubruwou nọ a te hae jọ there ame ọrrorro.

Evaọ ubruwou nọ a rẹ jọ họ je nwene iwu, ahwo nana a bi fi etaeze họ ugbẹhẹ eria nọ a rẹ jọ họ na.

Ohwo nana o bi fi ekpọ ayọno nọ e rẹ thọ uwou no egbrara họ ehru uwou na. Ekpọ ayọno nana egbrara e rẹ rọ nyaruọ otọ, ukpenọ e rẹ tehe uwou na. Oruiruo nana o thuru ufi jọ fihọ oma nọ a tehe fihọ otọ ehru uwou na, re ọ sai ru iruo ababọ omonwa.

Ahwo nana a bi ririe iwindo na kpahe taure a tẹ te rehọ ebe tamu ai. Eware nọ a te tamu ai na i re ru nọ ahwo a rẹ rọ riẹ vevẹ inọ eglase e rrọ etẹe, re ahwo a gbẹ nyaruọ ai idudhe he.

Ohwo nana ọ be rehọ oghẹrẹ etẹlẹvisiọno jọ nọ o wo ekamẹra ro rri ekpọ nọ a tọ họ otọ sọ obeva rai e rrọ vevẹ.

Ahwo nọ a re ru iruo ekapenta, a be tehe ire fihọ oma ugbẹhẹ uwou nọ a rẹ jọ re emu gbe ọgwa nọ ahwo a re kokohọ na. A ru uwou nana evaọ oghẹrẹ nọ a sae rọ jariẹ ru eware obọdẹ efa.

Ahwo nọ a rẹ ruẹrẹ otọ, a be kọ ire sa-sa nọ e rrọ okegbe na kẹle ugbẹhẹ nọ a bọ nọ a be rọ da ẹkpẹ ji.

Ahwo nana a bi fi eglase họ ogebara ibruwou nọ a te rria na. Eglase nana i re ru nọ uvo gbe ofou e rẹ rọ ruọ oria nana ziezi.

Evaọ obọ etegu uwou nọ a rẹ jọ dede ahwo rehọ na, ahwo nọ a re ru ikpẹ a bi fi ikpẹ họ obehru riẹ.

Ohwo nana ọ be rehọ emashini ọsese nana ro bru eghogho fihọ oware ẹkọdishọno.

Ahwo nọ a rẹ ruẹrẹ otọ gbe utu iruiruo efa, a be kọ ire fihọ oria nana je ru edhere-owọ fihọ iẹe. Evaọ abọ ẹkpẹlobọ na, whọ rẹ ruẹ uwou nọ a te jọ re emu, ọgwa nọ ahwo a te hai kokohọ gbe oria nọ a sae jọ ru eware obọdẹ efa na. Uwou A whọ be ruẹ evaọ ugbothabọ na.

Ohwo nana o bi fi ekpọ-ame nọ a re ro furie erae họ ehru uwou na.

Ahwo nana a be ruẹrẹ otọ na kpahe taure a tẹ te kọ ẹbe fihọ iẹe. Whọ rẹ jẹ ruẹ ahwo nọ a be rehọ ekpọ ithethei rọ wezẹ iwindo uwou nọ ifisi e rrọ na.

Utu ahwo nọ a rẹ whẹ erru họ uwou a bi ku oghẹrẹ isimeti jọ họ otọ oria na. Isimeti na ọvo ọ rẹ riẹriẹ họ otọ. A be rehọ oghẹrẹ ireki jọ nọ o re ru oware jọ ẹrẹrẹ ro nwo isimeti na fihọ oria nọ isimeti na i te he, kẹsena a vẹ rehọ oware ofa ro ghelie ehru riẹ re a si ofou no eria nọ ofou o kare dhe.

Utu ahwo nọ a rẹ whẹ erru họ uwou, a bi fi oghẹrẹ ekapẹte jọ nọ a rehọ etaeze avọ ure ro ru họ otọ uwou nọ a te jọ re emu, ọgwa nọ ahwo a re kokohọ, gbe oria nọ a rẹ jọ ru eware obọdẹ efa. Evaọ ugbẹhẹ nọ ọ rrọ obaro na, whọ rẹ ruẹ nọ a fi etẹlẹvisiọno họ iẹe no keme etẹe a ti ro ru eplatfọmo.

Evaọ oria nọ a re jo ru ividio, ohwo nọ o re ru iruo ekapenta o bi fi eware nọ ahwo a rẹ rọ ruẹrẹ oma kpahe họ oria nana taure a te ti vidio rai.

Ahwo nọ a re ru iruo ekapenta a be whẹ eware nọ a gwọlọ rọ hẹriẹ ifisi sa-sa họ. Onana u re ru ei lọhọ nọ a sai ro nwene oghẹrẹ nọ ifisi na e rrọ evaọ obaro.

Ahwo nọ a haya a be whẹ eyọno họ evaọ uwou nọ a ti jo ru ividio. Eyọno na i ti theri no oka te oka ugbẹhẹ na. Eyọno nana a te hae thuru ikpẹ gbe ekamẹra fihọ evaọ okenọ a te bi ru ividio.

Ofẹ ẹkpẹlobọ ovatha-ọre a jọ rehọ uwoho nana no ehru ze. Evaọ ofẹ ẹkpẹlobọ na, whọ rẹ ruẹ iwou nọ a te rria B, C, D, E, gbe F nọ a bọ re no. Evaọ udevie na, whọ rẹ ruẹ uwou A nọ a be bọ kẹle ere no, yọ uwou nọ ifisi e rrọ oye o kẹle e riẹ nọ a bọ re no na. Evaọ obọze na, whọ rẹ ruẹ iwou nọ a re se South Production Building gbe North Production Building nọ a bọ kẹle ere no. Who te muẹrohọ okegbe na, whọ rẹ ruẹ nọ ahwo nọ a rẹ ruẹrẹ otọ a gbe bi ru iruo.

Iruiruo nana a bi fi etaeze ekpakpala nọ a rehọ itho ru họ oria opraprara nọ o rrọ emu uwou nọ a re jo dede ahwo rehọ na. Iruiruo na a fi ekanopi họ nọ a rẹ jọ otọ rai ririe etaeze nọ a bi fihọ na re uvo ọgaga o si ae ba ekpe.