A be rehọ ekatapila ivẹ wọ ọkpọ ame ologbo jọ ruẹrẹhọ. Uwou nọ ifisi e rrọ whọ be ruẹ evaọ obemu thethabọ na.

Ahwo nọ a haya a be wọ ugbẹhẹ obaro fihọ uwou na. A penti ugbẹhẹ na je ru ei evaọ oghẹrẹ nọ o sae rọ jọ wọhọ ekọlọ ebe gbe ire nọ e rrọ okegbe na.

Nọ a ku ekọkre fihọ otọ na no, ahwo nọ a haya a tẹ be rehọ emashini nana ro ru ei re o jọ riẹriẹriẹ. Onana u re ru otọ na lo jẹ tọ ziezi.

Obọze ẹkpẹlobọ ovatha-ọre a jọ rehọ uwoho nana no ehru ze. Evaọ oria nọ o mae kẹle na, a be ruẹrẹ oria nọ a rẹ dhẹ imoto fihọ evaọ obotọ uwou nọ a rẹ jọ dede ahwo rehọ. A whẹ eyọno nọ i no oria nọ a rẹ jọ dede ahwo rehọ nọ e lafi iwou ivẹ nọ ifisi e rrọ na họ no. Iwou nọ a re se north avọ south production buildings whọ be ruẹ evaọ obemu na.

Kẹle Uwou A na, ohwo nọ ọ rẹ ma otọ o bi rri eware nọ ahwo nọ a rẹ ruẹrẹ otọ a ru no, re o kere ae fihotọ. Fikinọ ahwo nọ a rẹ ruẹrẹ otọ a kaki mu iruo rai họ evaọ ubrobọ emuhọ iruo ebabọ na, u ru nọ ire gbe ekakọ sa-sa nọ a kọ fihọ otọ na e rọ rro ziezi no taure a te ti ku iruo ebabọ na họ.

Ahwo nọ a re penti iwou a be rehọ oghẹrẹ ipenti jọ nọ a re se resin ro penti oria nọ a rẹ dhẹ imoto fihọ. Ọjọ evaọ usu rai o ku oghẹrẹ eviẹ jọ họ, enọ e rẹ tamu oria nọ a bi penti na ha. Ipenti resin ọ rẹ kaki voro ho, yọ ọyẹle ọ rẹ kaki mu ei hi, fikiere o kiehọ kẹ oria nana nọ a te dhẹ imoto fihọ na.

Ahwo nana a be ma icheni nọ a ti ro kru eware ekpakpala nọ i re ru ẹrrorro fihọ uwou. Eware nana i re ru oria nọ ahwo buobu a be jọ ru iruo rrorro.

Iruiruo nana a bi penti obeva ugbẹhẹ uwou nọ ifisi e rrọ na evaọ orọ ọsosuọ. Evaọ obehru ọfisi ọvuọvo, whọ rẹ ruẹ oware ẹkọdishọno nọ a rehọ ipruvu ubiebi ro ruru, re ipenti na e si ae ba ewholo.

Iruiruo nana a be whẹ eyọno fihọ ehru oria nọ ohwo nọ o re dede ahwo rehọ ọ te jọ.

Ahwo nọ a haya a be rehọ oghẹrẹ ekatapila jọ nọ a re se spider crane rọ wọ eglase fihọ otafe oria nọ a te jọ re emu gbe ọgwa nọ ahwo a re kokohọ.

Ahwo nọ a re ru eware itanẹte a bi fi uzou họ ifi itanẹte nọ a rẹ thọrọ fihọ ugbẹhẹ. Evaọ idhe-ene nọ e rrọ uwou nọ ifisi e rrọ na, ifi itanẹte nọ a ro ru itanẹte fihọ edhe ọvuọvo i theri te emaele ọgbagbọvo. A rehọ ifi itanẹte na nya obotọ iwou na ọvuọvo, keme a dina ru otọ iwou na kpehru omojọ. Fikinọ a dina ru otọ iwou na kpehru na, o sae lọhọ re a ru inwene fihọ ọfisi ọvuọvo evaọ obaro.

Utu ahwo nọ a rẹ dhogbo nọ a re se Emergency Response Team, a be rehọ ohwo jọ dhesẹ oriruo ọrọ epanọ a sae ro siwi ohwo nọ o bi kie, rekọ nọ o bi veghe.

Ohwo nana ọ be ma otọ na re ọ riẹ epanọ edhere-owọ nọ a gwọlọ ru fihọ etẹe o re kpehru te. Evaọ akotọ edhere na, whọ rẹ ruẹ ekatapila nọ a be rọ tọ egọdọ nọ a te kọ ure nọ a re se hornbeam fihọ.

A rehọ uwoho nana no obehru ze. A fi solar họ ehru iwou nọ a re se production buildings na, gbe uwou nọ ifisi e rrọ na, re a rehọ ae ru ikpẹ fihọ iwou na.

Ohwo nana o bi fi etaeze họ edhe avọ esa ọrọ uwou nọ ifisi e rrọ na. Oware nọ a fihọ otọ riẹ na u re ru nọ etaeze na e gbẹ rọ va ha nọ oware jọ o tẹ make nuhu otọ uwou na.

Iruiruo nọ ohọo u bi kpe nọ a be re emu uvo rai. A ru oria nana fihọ re a hae jariẹ re emu evaọ oke ebabọ na. Ẹko ahwo esa a rẹ jariẹ re emu evaọ okpẹdẹ, fikiere a te ku ahwo na kpobi kugbe a re bu te enwenọ odu ọvo (1,000).

A be rehọ ekatapila esese rọ whẹ eware no emu uwou nọ ifisi e rrọ nyai kufiẹ. Evaọ obọze na, whọ rẹ ruẹ iluvase nọ a fihọ ogebara oria nọ a rẹ jọ re emu, gbe ọgwa nọ a re kokohọ na. Iluvase nana i re ru nọ elo ọre o gbe ro lo mu ahwo aro ho evaọ ezi ekpahe.

Utu ahwo nọ a rẹ whẹ erru fihọ uwou a bi fi ekapẹte nọ a ru wọhọ etaeze fihọ otọ uwou na. Imava nọ i bi fiobọhọ kẹe na, yọ ahwo nọ a fialoma via nọ a re ru iruo ẹsiẹvo evaọ ẹkpoka. Ẹkwoma ọruẹrẹfihotọ nana nọ a re se Day Volunteer Program na, ahwo nọ a rrọ ikoko Isẹri Jihova evaọ orẹwho Britain gbe Ireland a sae fialoma via re a fiobọhọ evaọ iruo ebabọ na ẹdẹvo evaọ ẹkpoka. Taure urere amara Ava u te ti te, ahwo nọ a bu vi idu isoi gbe egba isoi (5,500) a fiobọhọ evaọ iruo na.

Ahwo nọ a haya a be rehọ eyọno bọ ugbẹhẹ fihọ udevie uwou na, re a ghale iẹe kpohọ abava. A rehọ eware ekpẹkpẹ nọ e rrọ otọ na ro kpoka họ umuo oria nọ emashini nọ a gadiẹ na e rẹ dhẹ mu.

Iruiruo nana a bi ru otọ uwou na fo, yọ amọfa jọ a bi ru otọ oria nọ a re jo dede ahwo rehọ na kpehru.