Ahwo nọ a rẹ ruẹrẹ otọ a be rehọ ireki ro go ẹkpẹ ruẹrẹhọ taure a tẹ te kọ ẹbe fihọ iẹe. Iwou nọ a rẹ rria A gbe B eye whọ be ruẹ evaọ ugbothabọ na.

Ẹtẹre nọ ame o re su fihọ whọ be ruẹ evaọ obemu uwou nọ ifisi e rrọ na. Ẹtẹre nana avọ efa nọ e rrọ uwou ogha Chelmsford na eye ame oso o re su fihọ. A ru rie evaọ oghẹrẹ nọ ame oso ọ gbẹ rọ jọ gbegbe he, yọ i re je ru nọ ame o gbe ro ku okegbe na ha. Etẹre na i re je fiobọhọ ru oria kpobi jọ fuafo rọkẹ ahwo gbe erao ẹwọ.

Ọzae-avọ-aye nana a re ru iruo ekapenta. A be whẹ eware nọ a rẹ rọ hẹriẹ ifisi sa-sa họ.

Ohwo nana ọ be rehọ oware jọ nọ a re se laser level ro kpoka họ ẹthẹ ubruwou nọ a re jo ru eto, taure ọ tẹ te ta oware mu ei.

Ohwo nọ o re ru iruo ekapenta, ọ be rehọ level rọ ma esaebọdo nọ ọ gwọlọ fihọ re ọ riẹ sọ ọ ruẹrẹhọ no. Esaebọdo itienana nọ a fihọ idhere-owọ na, i re fiobọhọ kẹ ahwo nọ a te rria uwou ogha na gbe erara nọ a gbe ro vru hu, keme otọ uwou ogha na ọ rro te eplọto egba esa gbe udhosa gbe ikpegbihrẹ (377).

Omọvo jọ evaọ utu ahwo nọ a re furie erae jẹ dhogbo, ọ be dawo ọkpọ-ame nana re ọ riẹ sọ o bi hwẹ ziezi.

Omọvo Ogbẹgwae Iruo Ebabọ na jọ o bi ru egagọ ohiohiẹ evaọ uwou ogha ọkpokpọ na re a dawo eware nọ a ru fihọ iẹe sọ i bi ru iruo ziezi. Ahwo uviuwou Bẹtẹl soso nọ e rrọ London a rehọ itanẹte thuru kugbe egagọ ohiohiẹ na.

Ohwo nọ o re ru eware ikpẹ o bi fi ikpẹ edhere họ unu oria nọ a gwọlọ nọ umutho ahwo jọ ọvo a rẹ dhẹ ruọ eva. Ikpẹ nana i re fiobọhọ kẹ ohwo riẹ sọ ọ rẹ hẹrẹ hayo ọ rẹ dhẹ vrẹ.

Iruiruo nana a bi korie irọba no oma iwhaya re a rehọ ae ru eware efa.

Ohwo nana o bi dhesẹ oghẹrẹ nọ a te bọ uwou ogha na kẹ ahwo nọ a ziọ ugheriwo. Evaọ etoke ebabọ na, ahwo nọ a ziọ ugheriwo a bu vi idu udhone gbe ikpegbisoi (95,000).

Omọvo Ogbẹgwae Uwou Ogha Britain, ọ be kẹ ovuẹ evaọ ẹgwae urere nọ a gba kugbe ahwo nọ a bi ru iruo ebabọ na. A gba ẹgwae nana taure ẹko-iruo sa-sa evaọ Bẹtẹl a te ti mu uwou ogha na họ ẹruorote. Ahwo nọ a bu vi idu ikpegbọvo (11,000) ae a fialoma via kẹ iruo ebabọ na.

Ahwo nana yọ utu ahwo nọ a re ru ividio nọ a re se Regional Video Team gbe Local Broadcasting Department. A bi wuhrẹ ae epanọ a sae rọ rehọ eyọno nọ a ro gbere obehru uwou nọ a re jo ru ividio na ro ru iruo ziezi. Iruiruo na buobu a ku eviẹ irọba iburu họ otọ eviẹ rai, re a siọ eka ba eru fihọ eria nọ a penti evaọ otọ na.

Iruiruo nana a be vravrẹ ẹkpẹ owhowho fihọ ighogho itho nọ a ro ru edhere na. Edhere nana a rẹ rọ dhẹ kpohọ uwou nọ ifisi e rrọ.

Emẹkaniki nana ọ be ruẹrẹ omoto evaọ oria ọkpokpọ nọ a bọ obọ nọ a rẹ jẹ ruẹrẹ imoto. Nọ orọnọ eko-iruo Bẹtẹl kpobi e rrọ evaọ uwou ogha ọkpokpọ na, u gbe du gwọlọ nọ a re wo imoto buobu nọ a rẹ rọ dhẹ kpohọ iruo kẹdẹ kẹdẹ hẹ. Fikiere a te zẹ imoto kpobi nọ a gbẹ be dhẹ hẹ no. Evaọ ugbothabọ na, whọ rẹ ruẹ omoto nọ ahwo nọ a rẹ rẹrote otọ a rẹ dhẹ ro ru iruo.

Eware oniọvo jọ nọ ọ rrọ Bẹtẹl ru iruo a be kwa no omoto ze na. Itu ahwo nọ i bu te udhegbihrẹ ae a fiobọhọ kẹ inievo nọ i bi ru iruo evaọ Bẹtẹl kwa eware rai evaọ amara Ọvo gbe Ava. Evaọ obọ emuhọ amara Asa, yọ uviuwou Bẹtẹl soso o kwa ze je mu iruo họ no evaọ uwou ogha ọkpokpọ na.

Inievo nọ i re ru iruo evaọ ikichini a bi there emu jọ nọ a re se salad kẹ uviuwou Bẹtẹl.

A be wọ umuwou nana nọ a jẹ rria evaọ etoke ebabọ na vrẹ keme a zẹ riẹ no. Evaọ etoke ebabọ na, iruiruo na a sae rọ owọ gheghe nya kpohọ oria nọ a be bọ uwou ogha na fihọ lọlọhọ. A bọ iwou nana kẹle oria ebabọ na re iruiruo na a gbẹ ruọ imoto kẹdẹ kẹdẹ hẹ, yọ onana o rẹ thọ okegbe na no iwiri nọ i re kuye no imoto ze. Utu ahwo jọ nọ a rẹ kiẹ iruo ebabọ gbe eware efa riwi nọ a re se BREEAM, o ta nọ oware nọ ogbẹgwae iruo ebabọ na u ru na u kiehọ gaga. Evaọ ugbothabọ na, whọ rẹ ruẹ iwou ekpokpọ nọ a te rria na.

Ahwo nọ a bi ru iruo evaọ Ẹko-Iruo Efafa, a be whẹ umuwou ọsese nọ a rẹ jọ rekọdo họ. A ru istudio nana fihọ dede nọ ifisi efafa kpobi a wo emeware nọ a rẹ rọ rekọdo. A rẹ jọ umuwou ọsese nana rekọdo evẹrẹ efa nọ a be ta evaọ ẹkwotọ uwou ogha Britain wọhọ, evẹrẹ Irish gbe Scottish Gaelic.

Oniọvo-ọmọzae jọ evaọ Ẹko-Iruo Ebabọ Evaọ Uwou Ogha, ọ be rọ ividio ta ẹme kugbe oniọvo jọ nọ o re lele ae ru iruo evaọ ofẹ ẹkpẹlobọ ovatha-ọre England. Inievo nọ i bi ru iruo nọ e be rria obọ otafe uwou ogha a re se inievo nọ e rrọ uwou ogha na ẹsikpobi kpahe Egwa Uvie nọ a be bọ, gbe epanọ a rẹ rọ rẹrote ae. Evaọ obaro riẹ na, whọ rẹ ruẹ inievo efa nọ e rrọ ẹko-iruo ọvona nọ a be ta kpahe ẹkọdishọno nọ a gwọlọ ru fihọ Egwa Uvie ekpokpọ gbe enọ a be ruẹrẹ.

Ahwo ọkpokpọ nọ a re no obọ otafe ze ti ru iruo evaọ emedẹ jọ evaọ ẹkpoka, a nwane nyaze obọ. Uviemenẹ a te rehọ ae kpohọ oria nọ a ti jo dede ae rehọ ziezi, kẹsena a ve ti dhesẹ iruo nọ a te hae ru kẹ ae. Nọ iruo i muhọ obọ evaọ uwou ogha Britain ọkpokpọ nọ a bọ fihọ Chelmsford na, enwenọ ahwo nọ i bu te egba isoi (500) a jẹ hai no obọ otafe ze ti fiobọhọ ru iruo Bẹtẹl. Evaọ ofẹ ẹkpẹlobọ na, whọ rẹ ruẹ inievo-emezae ivẹ jọ nọ a be dawo TV nọ a fihọ oria nọ a re jo dede ahwo rehọ na sọ i bi ru iruo ziezi.