Nọ ahwo egọmeti nọ e rrọ ẹwho na a rọwo kẹ ae no, iruiruo nana a tẹ be kwa ire nọ a ko fihotọ no re a sae ruẹrẹ oria na kpahe kẹ iruo ebabọ na. A jẹ daoma ruẹ nọ a ru iruo nana no taure ezi nọ emevra e rẹ rọ bọ iwou rai u te ti te. A be rehọ ewẹ-ire nọ a bru ehehẹhẹ na ru edhere-owọ nọ ahwo a rẹ nya, yọ a bi koko ite-ire na họ re a sae rehọ ai ru iruo ebabọ na.

Ohwo nọ o re ru eware ikpẹ o bi fi eware nọ a rẹ thọrọ ifi TV họ oria nana. Etenẹ yọ ehọtẹle vẹre, rekọ a gwọlọ rehọ iẹe ru ikichini gbe oria nọ a rẹ jọ re emu. Ahwo nọ a ti ru iruo ebabọ na a te hae jọ TV na rri egagọ ohiohiẹ gbe Uwuhrẹ Uwou-Eroro na nọ uviuwou Bẹtẹl soso u re ru, gbe eware itieye na efa.

Iruiruo nana a be rehọ eyọno di ogba wariẹ eria nọ a te jọ ru iruo ebabọ na. A te rehọ eyọno nana di ogba wariẹ enwenọ eria kpobi nọ a te bọ iwou fihọ. Nọ orọnọ oria nana o nwane rrọ evaọ okpẹwho ho na, a te daoma re a ruẹ nọ iruo ebabọ na i kpokpo erao ẹwọ nọ e rrọ oria na tere he. Wọhọ oriruo, evaọ obotọ ayọno na, a nyasiọ omoria jọ ba nọ erao esese wọhọ ebaja e rẹ sae nyavrẹ lọlọhọ evaọ aso.

A bi ru edhere nọ a te dhẹ evaọ etoke ebabọ na, yọ edhere na o no oria nọ iruiruo na a te rria lafi oria nọ a be bọ uwou ogha na fihọ.

Ofẹ ovatha-ọre a jọ rehọ uwoho nana, yọ u bi dhesẹ edhere nọ a te dhẹ evaọ etoke ebabọ na nọ a ru re no. Wọhọ epanọ whọ be ruẹ evaọ ofẹ obọze na, edhere na ọ lafi oria nọ a te bọ uwou ogha na fihọ. A gwọlọ rehọ iwou esese nọ e rrọ ofẹ ẹkpẹlobọ evaọ obotọ na ru iwou nọ ahwo nọ a ti ru iruo ebabọ na a re rria. A te jẹ bọ imiwou esese nọ a rẹ rria fihọ oria nọ o rrọ obọze iwou nọ e rrọ ẹkpẹlobọ na.

Omọvo Utu Ẹruorote Isẹri Jihova avọ oniọvo nọ ehri ukoko u vi ze, a weze bru ahwo nọ a bi ru iruo ebabọ na. Evaọ oka ovo yena, a gba ẹgwae obọdẹ jọ yọ a rọ ividio thuru kugbe Egwa Uvie kpobi nọ e rrọ orẹwho Britain gbe Ireland. A jọ ẹgwae na whowho nọ evaọ owọwọ ẹdẹ nọ ọ vrẹ na, ahwo egọmeti Chelmsford City Council a kuenu kẹ ae inọ a sae mu iruo ebabọ na họ.

Iruiruo nana a bi ru oware jọ fihọ edhere na nọ o rẹ thọ awọ ire oak (ok) ivẹ nọ e rrọ tabọ tabọ edhere na. Edhere nana ọ nya oria nọ a te hae jọ ruẹrẹ eware kpahe kẹ ebabọ na lafi oria nọ a te bọ uwou ogha na fihọ. A ru oware na fihọ edhere na re ekatapila gbe imoto egbẹgbẹdẹ efa a gbẹ dhẹ awọ ire na kpe no ho.

Ahwo nana a be tọ egọdọ nọ a ti fi ekpọ ame gbe iwhaya họ kpohọ iwou nọ iruiruo na a te rria evaọ etoke ebabọ na. Iwou nọ whọ be ruẹ evaọ ugbothabọ na yọ enọ a bọ no evaọ usu iwou udhuvẹ gbikpe nọ iruiruo na a te rria evaọ etoke ebabọ na.

Ohwo nana o bi fi ekpọ ame họ uwou jọ evaọ usu iwou nọ ahwo a te rria evaọ etoke ebabọ na..

Uwoho nana u bi dhesẹ iwou nọ ahwo a te rria evaọ etoke ebabọ na. Whọ rẹ jẹ ruẹ eria nọ a ruẹrẹ fihọ no nọ a te bọ iwou efa fihọ. Evaọ ofẹ ẹkpẹlobọ na, whọ rẹ ruẹ iwou nọ a te jọ ruẹrẹ eware kpahe kẹ ebabọ na gbe uwou nọ a te hae jọ re emu. Oria nọ a te bọ uwou ogha na fihọ oye o rrọ udevie evaọ ugbothabọ na.

Ohwo nana o bi thuru iwhaya ivẹ kugbe evaọ ubruwou nọ a fi eware ekọmputa nọ a rẹ rọ ta ẹme họ. O gwọlọ nọ a rẹ kaki ru eware itanẹte fihọ oria ebabọ na re a sae rẹrote iruo ebabọ na kpobi, ta ẹme kugbe uwou ogha efa, je ru lele ekpọvio nọ i bi no obọ ehri ukoko ze.

Ohwo nọ a haya ọ be rehọ oware jọ nọ a re se GPS rọ ma otọ na re ọ riẹ eria nọ ahwo nọ a rẹ gwọlọ eware evaọ otọ, a tọ egọdọ fihọ. Egọdọ nana i re fiobọhọ kẹ ahwo nọ a rẹ kiẹ otọ gwọlọ eware anwae re a riẹ epanọ u fo nọ otọ na o rẹ ghare te taure iruo ebabọ na i te ti muhọ. Ahwo Rom họ ahwo nọ a fa ẹwho Chelmsford nọ ọ kẹle oria nọ a te bọ uwou ogha na fihọ na. Dede nọ a tọ egọdọ nọ i bu te udhusoi gbe ihrẹ (107) evaọ okenọ a jẹ gwọlọ eware evaọ otọ na, a jọ otọ na ruẹ emamọ oware ovo ho.

Ohwo nana ọ be rehọ ẹjini na bru oware nọ a ti fihọ akotọ ẹthẹ re o jọ umumuo. A ti ru iwou jọ evaọ eria nọ a te jọ ruẹrẹ eware họ kẹ ebabọ na zihe ruọ iwou nọ a rẹ jọ ruẹrẹ eware. A ti je zihe iwou jọ ruọ ifisi gbe eria nọ a re jo ru eware sa-sa evaọ etoke ebabọ na.

Ohwo nana ọ be rehọ ekatapila rọ whẹ ẹkpẹ fihọ itipa ọsese. A te rọ ẹkpẹ na lẹ eria nọ a tọ egọdọ fihọ.

Uwoho nana u bi dhesẹ epanọ otọ nọ a be bọ uwou ogha na fihọ o rro te. Otọ na o rro te eplọto egba esa gbe udhosa gbe ikpegbihrẹ (377). A sae rehọ edhere jọ nọ ọ kẹle otọ uwou ogha na dhẹ kpohọ unueri nọ ekọ ilogbo e rẹ kpahe, oria nọ irupre e rẹ kpahe gbe okpẹwho London.

Ahwo nọ a haya a bi kporo iwou anwae nọ e jọ oria na no taure a te ti mu uwou ogha ọkpokpọ na họ ẹbọ.

Ahwo nana a be rehọ ekatapila nọ a re se crane rọ wọ imiwou esese fihọ eria nọ e te jọ. Evaọ oria nọ o rrọ aro mai na, whọ rẹ ruẹ nọ a ruẹrẹ e riẹ kpahe no nọ a te wọ iwou efa fihọ. A te rehọ imiwou esese nana ro ru ifisi evaọ etoke ebabọ na.