Evaọ ubrobọ ekuhọ amara Akpegbọvo 2016, ame o ku ewho jọ nọ e rrọ ẹkpẹlobọ ovatha-ọre okpẹwho Moncalieri evaọ Italy. Evaọ eria jọ, ame na o diwi vrẹ irula gbe ubro. Obe-usi jọ o niyẹrẹ nọ: “Ame na o ku iwou jẹ raha eware ahwo kpobi.” Ahwo egọmeti a fiobọhọ kẹ ahwo nọ a bu te odu ọvo gbe egba isoi (1,500) kwa no iwou rai, fikiere ohwo ọvuọvo o whu hu. Ghele na, ame na ọ raha eware ahwo buobu.

Ababọ oke oraha, Isẹri Jihova a tẹ ghale omarai fihọ itu sa-sa re a fiobọhọ. A je fiobọhọ kẹ ahwo tọ ọloho gbe erara no iwou rai, je fiobọhọ kẹ ae kwa egbara gbe eware nọ i gbe woma. Nọ utu Isẹri Jihova jọ a nyaku oria nọ ahwo egọmeti a jọ di edhere, a kẹ rai uvẹ re a nyavrẹ keme a ruẹ nọ a wha emu gbe eware nọ a gwọlọ ro fiobọhọ kẹ ahwo nọ eware rai e raha. Isẹri Jihova na a fiobọhọ kẹ ibe Isẹri Jihova rai gbe amọfa nọ a rrọ Isẹri Jihova ha.

Wọhọ oriruo, ame o ku ibruwou kpobi nọ a bọ fihọ obotọ uwou jọ soso le no. Nọ ahwo nọ a rẹ dhogbo a nwani se ame no evaọ ibruwou na no, Isẹri Jihova buobu a te fiobọhọ kẹ Osẹri Jihova jọ nọ a re se Antonio avọ uviuwou riẹ whẹ erara noi no. Kẹsena, Isẹri Jihova na a te fiobọhọ kẹ amọfa nọ e be rria uwou na. A dhe uhie họ jẹ wọ eware kẹ ohwohwo no obotọ uwou na ze, yọ evaọ umutho euwa jọ ọvo, a tẹ whẹ erara nọ e jọ obotọ iwou na kpobi muotọ. Eva e were ahwo nọ a fiobọhọ kẹ na kpobi. Ohwo jọ nọ ọ be rria uwou na nọ a re se Viviana ọ nyabru aye Antonio avọ irui nọ i bi su noi aro ze, ọ tẹ ta nọ: “Ivie yere ahwo ukoko rai kẹ omai ziezi—whai ginọ ahwo oghẹrẹsa!”

Evaọ ẹmẹwho jọ nọ ame na ọ jọ raha eware gaga, ahwo ẹwho na a jẹ ruẹ epanọ Isẹri Jihova a je ro fiobọhọ kẹ ahwo nọ ame na ọ raha eware rai. Oware nọ a ruẹ na u duobọte ejọ udu te epanọ a ro kuomagbe Isẹri Jihova nọ i bi fiobọhọ kẹ ahwo na je ru lele ekpọvio nọ ohwo nọ o wuzou utu na ọ kẹ rai.

Uwou ọzae jọ ọ raha gaga, yọ ọloho ọ vọ oria nọ ọ rẹ dhẹ omoto fihọ. Akpọ o gbe ọzae na unu nọ ọ ruẹ Isẹri Jihova eree nọ a je fiobọhọ kẹe tọ ọloho no oria na no evaọ euwa ene soso ababọ eriosehọ. Oware nọ a ru na o da riẹ ẹro te epanọ ọ rọ gbalọ Isẹri Jihova na jọ je kere fihọ oria itanẹte riẹ nọ “obufihọ rai” o da omẹ ẹro fia.

Osẹri Jihova jọ ọ ta nọ: “Ma fiobọhọ kẹ erivẹ mai buobu nọ e rrọ Isẹri Jihova ha, yọ ibuobu rai a kpako te ikpe udhone gbọ no. Irui-oviẹ i je su no aro rai ze evaọ okenọ a je yere omai rọkẹ oware nọ ma ru kẹ ae na.” Ọzae jọ nọ o kru ichọche Katọlik ga gaga ọ ta kẹ Isẹri Jihova epanọ obufihọ rai o were riẹ te inọ: “U gbunu kẹhẹ inọ dede nọ ma rrọ ọvuọ egagọ riẹ, ma fiobọhọ kẹ ohwohwo ghele.” Ọzae ọfa jọ ọ ta nọ: “Ma re roro nọ usi uwoma ọvo wha rẹ ta kẹ ahwo evaọ ohiohiẹ Ẹdoka, kpakiyọ wha re fiobọhọ kẹ ahwo re.”