Anwọ ikpe buobu ze na, Isẹri Jihova a be hae bọ eria sa-sa nọ a rẹ jọ ru iwuhrẹ nọ a re se Ọgwa Uvie. Kọ ọjọ ọ rrọ evaọ ẹwho ra? Erere vẹ o re noi ze otẹrọnọ Ọgwa Uvie ọ rrọ ẹwho ra?

A rẹ bọ Egwa Uvie evaọ oghẹrẹ nọ e rẹ rọ wha erru họ okegbe na. Jason nọ ọ be kpọ iruo ebabọ Egwa Uvie evaọ obọ America ọ ta nọ: “Utee mai họ, epanọ ma sae rọ bọ Egwa Uvie kpobi evaọ oghẹrẹ nọ e rẹ rọ jọ usu iwou nọ e mai woma je siuru evaọ okegbe na.” Osẹri Jihova nọ o re ru iruo kugbe utu ebabọ ọ ta nọ: “Ma gwọlọ nọ Ọgwa Uvie kpobi nọ ma bọ ọ rẹ jọ emamọ okẹ rọkẹ ẹwho na, o ve je ru oria na jọ wowoma.”

Ahwo nọ a rẹ bọ Egwa Uvie yọ Isẹri Jihova nọ e fialoma via re a rehọ oke gbe onaa sa-sa nọ a wo rọ bọ emamọ Egwa Uvie nọ i wo erru ziezi. Ahwo a be hae muẹrohọ emamọ iruo nọ a bi ru. Wọhọ oriruo, ohwo jọ nọ o re rri iwou nọ a bọ obọ sọ i woma o jiri Isẹri Jihova rọkẹ Ọgwa Uvie jọ nọ a bọ kẹle na evaọ Richmond, nọ ọ rrọ Texas evaọ America. Ọ ta nọ idhe nọ a rọ kare Ọgwa Uvie na họ idhe nọ e mai woma kpaobọ nọ ọ ruẹ no. Evaọ ukoliko Jamaica, ohwo jọ nọ o re rri iwou nọ a bọ obọ sọ i woma ọ rehọ ibe iruiruo riẹ gboma nyai rri Ọgwa Uvie jọ nọ a be bọ. Ọ ta kẹ ibe iruiruo riẹ nọ: “U du gwọlọ nọ wha rẹ ruawa kpahe ahwo nana ha. Isẹri Jihova a re ru lele izi ẹwho nọ e ta kpahe ebabọ je tube ru iruo rai woma vi epanọ izi na e ta dede.” Omọfa jọ nọ o re rri iwou nọ a bọ obọ sọ i woma evaọ ẹwho jọ evaọ ubrotọ Florida no ọ rrọ America ọ ta nọ, “Mẹ nyai rri ẹsipito gbe iwou egọmeti sa-sa nọ a be bọ no, rekọ ọvuọvo evaọ usu rai nọ a romatotọ ru iruo riẹ kpatiẹ wọhọ Ọgwa Uvie rai nana ọ rrọ họ. Wha rẹ ginẹ riẹ iruo ru ziezi.”

Iwuhrẹ nọ a be hae jọ Egwa Uvie Isẹri Jihova ru i bi fiobọhọ kẹ ahwo nọ a bi kpohọ iwuhrẹ na ru emamọ inwene evaọ uzuazọ rai. Ahwo nọ a bi kpohọ iwuhrẹ na a zihe ruọ emamọ esẹ, ini gbe emọ no. Osẹri Jihova jọ nọ a re se Rod nọ o bi ruiruo kugbe utu ahwo nọ a rẹ bọ Egwa Uvie ọ ta nọ: “Ọgwa Uvie kpobi yọ oria nọ a rẹ jọ wuhrẹ ahwo epanọ a sai ro wo emamọ uruemu, yọ onana o rẹ wha erere se ẹwho kpobi.” Ọ ta re nọ: “Whọ rẹ sae jọ etẹe ruẹ obufihọ nọ whọ tẹ be rẹriẹ ovao dhe ebẹbẹ. Ahwo nọ a rẹ jọ etẹe a rrọ sasasa yọ a rẹ whẹtiẹ ohwo họ oma ziezi, onọ u re fiobọhọ kẹ ahwo nọ a gwọlọ wo omosasọ jẹ gwọlọ riẹ Ọghẹnẹ.”

Ahwo nọ a re kpohọ iwuhrẹ evaọ Egwa Uvie na a you erivẹ rai, yọ a rẹ dhogbo re a fiobọhọ kẹ ohwohwo nọ okpẹtu jọ ọ tẹ romavia. Wọhọ oriruo, evaọ 2016, nọ ofou-ọwhibo ọ raha eware gaga evaọ obọ Bahamas, Isẹri Jihova a fiobọhọ ruẹrẹ iwou nọ i bu te egba ivẹ gbe udhuvẹ gbe ikpegbene (254). Evaọ ẹwho na, ame o ku uwou ọkpọkuaye jọ nọ ọ kpako te ikpe udhone no nọ a re se Violet. Aye nana ọ nyabru utu Isẹri Jihova jọ nọ i je fiobọhọ kẹ ahwo nọ eware rai e raha, ọ tẹ ta kẹ ae nọ a nyaze te ruẹrẹ uwou riẹ inọ ọ te hwosa ugho kẹ ae. Isẹri Jihova na a tẹ ginẹ nya jẹ tehe idhe nọ e kpare no evaọ uwou aye na fihọ kẹe rekọ a mi rie ugho ọvo ho. A tẹ jẹ rehọ isilini ekpokpọ ro nwene erọ anwae nọ e jọ otuwou aye na. Aye na ọ tẹ gbalọ ahwo na kpobi je yere ae unuẹse buobu yọ ọ be ta kẹ ae nọ, “Whai ginọ ahwo Ọghẹnẹ!”

Re a sae rẹrote Egwa Uvie rai ziezi, Isẹri Jihova a wo ọruẹrẹfihotọ jọ nọ a re ro wuhrẹ ahwo nọ a rrọ ukoko ọvuọvo re a riẹ epanọ a rẹ rọ rẹrote Ọgwa Uvie na. Emamọ iyẹrẹ i bi no onana ze. Wọhọ oriruo, evaọ ẹwho ọsese jọ nọ ọ rrọ ubrotọ Arizona evaọ America, a zizie aye jọ kpohọ ewuhrẹ evaọ obọ Ọgwa Uvie yọ ọ ginẹ nya. Aye na ọ ta nọ a be ginẹ rẹrote Ọgwa Uvie na ziezi yọ o were riẹ gaga inọ Isẹri Jihova a wo omaa nọ a be rọ rẹrote Ọgwa Uvie na noke toke. U gbe rie unu gaga inọ a be ruẹrẹ Ọgwa Uvie na ghelọ epanọ o woma te na. Aye nana ọ jẹ hai kere uzoẹme jọ evaọ obe-usi ẹwho na, fikiere a jọ obe-usi ẹwho na ta kpahe oghẹrẹ nọ a be rẹrote Ọgwa Uvie na te uwhremu na. A jọ obọ ekuhọ uzoẹme na ta nọ, “Eva e were omai . . . nọ a bọ Ọgwa Uvie fihọ ẹwho mai.”

Egwa Uvie e rrọ ewho sa-sa evaọ akpọ na soso. Ma zizie owhẹ inọ who weze kpohọ Ọgwa Uvie mai jọ. Jọ u mu owhẹ ẹro nọ a ti dede owhẹ rehọ ziezi.