1 Ahwo Tẹsalonika 4:1-18
4 Orọ urere, inievo, ma vuẹ owhai no epanọ u fo nọ wha re yeri re wha sai ru Ọghẹnẹ eva were, yọ wha bi gine ru ere. Whaọ, ma be rọ odẹ Olori na Jesu tuduhọ owhai awọ jẹ lẹ owhai nọ wha ruabọhọ eruo onana viere.
2 Keme wha riẹ ehrẹ Olori na Jesu nọ ma kẹ owhai.
3 Onana họ oreva Ọghẹnẹ, inọ wha jọ ọrẹri je siomano ọfariẹ-ogbe.*
4 U fo re omomọvo rai ọ riẹ epanọ o re ro su oma riẹ re ọ sae jọ ọrẹri je wo ọghọ,
5 orọnikọ avọ isiuru egaga kẹ owezẹ ọzae-avọ-aye nọ e vrẹta ha wọhọ epaọ erẹwho na nọ e riẹ Ọghẹnẹ hẹ.
6 Jọ ohwo ọvo ọ nya vrẹ umuo nọ u fo ho re ọ wha oniọvo riẹ re evaọ ẹme nana, keme Jihova* ọ te rọ ahwo nọ a ru eware nana kpobi gu ẹdhọ, wọhọ epanọ ma ta kẹ owhai vẹre jẹ vẹvẹ owhai unu gaga re.
7 Keme orọnikọ Ọghẹnẹ o se omai re ma yeri uzuazọ ugbegbe he rekọ re ma jọ ọrẹri.
8 Fikiere, ohwo nọ o bi rri uwuhrẹ nana vo, orọnikọ ohwo-akpọ o bi rri vo ho rekọ Ọghẹnẹ, ọnọ ọ be kẹ owhai ẹzi ọfuafo riẹ.
9 Rekọ, kpahe uyoyou-inievo, u du gwọlọ nọ ma re kere se owhai hi, keme Ọghẹnẹ o wuhrẹ owhai nọ wha you ohwohwo.
10 Evaọ uzẹme, wha bi ru ere kẹ inievo kpobi nọ e rrọ Masidonia soso. Rekọ, inievo, ma be tuduhọ owhai awọ nọ wha ruabọhọ eruo onana viere.
11 Wha gbaemu nọ wha rẹ rria dhedhẹ jẹ tẹrovi orọ obọrai jẹ rọ abọ rai ru iruo, wọhọ epanọ ma hrẹ owhai,
12 re ahwo obọ otafe a ruẹ nọ wha be rria kpatiẹ gbe nọ oware ovo o kare owhai hi.
13 Ofariẹ, inievo, ma gwọlọ nọ wha jọ igbori hi kpahe enọ i whu* no, re wha gbe weri wọhọ ahwo edekọ na ha enọ i wo ẹruore he.
14 Keme ma tẹ rọwo inọ Jesu o whu jẹ kparoma ze, ere ọvona ma rẹ rọwo re inọ Ọghẹnẹ ọ te kpare enọ i whu* nọ e rrọ usu kugbe Jesu ze re a jọ kugbei.
15 Ma be ta onana kẹ owhai wọhọ epanọ o rrọ ẹme Jihova* inọ, mai nọ e te gbẹ jọ uzuazọ evaọ oke ọzino* Olori na ma te karo kẹ enọ i whu* anwẹdẹ hẹ;
16 keme Olori na omariẹ o ti no obọ odhiwu ze, ọ vẹ te rehọ urru oruarua orọ ukọ-odhiwu oride ro se avọ ọgba Ọghẹnẹ nọ o kru, enọ e rrọ usu kugbe Jesu nọ i whu no a vẹ te kaki tovrẹ.
17 Kẹsena a vẹ te rehọ omai nọ e rrọ uzuazọ kugbe ae evaọ ẹgho kpohọ ehru bru Olori na; ma vẹ te jọ kugbe Olori na ẹsikpobi.
18 Fikiere, wha hae rọ eme nana tuduhọ ohwohwo awọ.
Eme-Obotọ
^ Evaọ Griki, por·neiʹa. Rri oria Otofa Eme.
^ Rri oria Otofa Eme.
^ Evaọ Griki, “enọ e rrọ owezẹ uwhu.”
^ Evaọ Griki, “enọ e rrọ owezẹ uwhu.”
^ Rri oria Otofa Eme.
^ Rri oria Otofa Eme.
^ Evaọ Griki, “enọ e rrọ owezẹ uwhu.”
