1 Pita 1:1-25
1 Pita, ukọ Jesu Kristi, ro se enọ e be rria ubroke nọ e vaha ruọ eria sa-sa evaọ Pọntọs, Galesha, Kapadosia, Esia, gbe Bithinia, enọ a salọ
2 wọhọ epanọ Ọghẹnẹ Ọsẹ na ọ jiroro na fihọ otọ, enọ a rọ ẹzi ọfuafo na ru fo, re a ruẹse jọ enọ i re yoẹme gbe enọ a frẹ azẹ Jesu Kristi ku:
Jọ Ọghẹnẹ o dhesẹ uwowou ulogbo riẹ kẹ owhai je ru owhai wo udhedhẹ vi epaọ anwẹdẹ.
3 Jọ ujiro u te Ọghẹnẹ, Ọsẹ Olori mai Jesu Kristi, keme fiki ohrọ-oriọ ulogbo riẹ, o ru nọ a rọ wariẹ yẹ omai re ma wo ẹruore nọ o muẹro* ẹkwoma ẹkparomatha Jesu Kristi no uwhu ze,
4 re ma wo ukuoriọ nọ o rẹ raha ha, nọ u re gbeku hu, nọ o rẹ hiẹ hẹ. A ruẹrẹ e riẹ họ obọ odhiwu kẹ owhai,
5 enọ Ọghẹnẹ ọ be rọ ogaga riẹ sẹro fikinọ wha wo ẹrọwọ. O bi ru onana re wha wo esiwo nọ a te kẹ* evaọ oke urere na.
6 Fiki onana wha be ghọghọ gaga, dede nọ evaọ omoke, edawọ sa-sa e wha uweri se owhai no,
7 re ẹrọwọ rai nọ a dawo no nọ u wo aghare vi igoru nọ e rẹ raha dede nọ a rọ erae dawo iẹe no,* o vẹ wha ajiri gbe oruaro gbe orro ze evaọ oke edhesẹvia Jesu Kristi.
8 Dede nọ wha ruẹ e riẹ vievie he, wha you rie. Dede nọ wha be ruẹ e riẹ obọnana ha, wha fi ẹrọwọ họ iẹe jẹ be ghọghọ gaga avọ oghọghọ ulogbo nọ a sai gbiku riẹ hẹ,
9 keme u mu owhai ẹro nọ wha ti wo utee ẹrọwọ rai na te obọ, koyehọ esiwo rai.
10 Eruẹaro nọ e ruẹaro kpahe uwowou ulogbo nọ o dhesẹ kẹ owhai na a romatotọ nọ kpahe esiwo nana jẹ kiẹ kpahe iẹe.
11 A ruabọhọ jẹ kiẹ kpahe ugogo oke hayo ezi nọ ẹzi ọfuafo na nọ ọ jọ oma rai o je dhesẹ kpahe Kristi na, nọ o je se isẹri kpahe eware nọ Kristi ọ te ruẹ uye rai gbe oruaro nọ u ti lele iei.
12 A dhesẹ via kẹ ae nọ orọnikọ omobọ rai a be gbodibo kẹ hẹ, rekọ rọkẹ owhai kpahe oware nọ a whowho via kẹ owhai no na ẹkwoma enọ i whowho usi uwoma na kẹ owhai avọ obufihọ ẹzi ọfuafo nọ o no obọ odhiwu ze. O rrọ isiuru ikọ-odhiwu na gaga re a wo otoriẹ eware nana.
13 Fikiere, wha ruẹrẹ iroro rai kpahe kẹ iruo; wha sẹro iroro rai ziezi; wha rọ ẹruore rai kpahe uwowou ulogbo nọ a ti dhesẹ kẹ owhai evaọ oke edhesẹvia Jesu Kristi.
14 Wọhọ emọ nọ i bi yoẹme, wha gbẹ kuvẹ hẹ re isiuru nọ wha wo vẹre evaọ okenọ wha jọ igbori e kpọ* owhai,
15 rekọ wọhọ Ọghẹnẹ Ọrẹri nọ o se owhai na, whai omarai wha jọ ọrẹri evaọ uruemu rai kpobi,
16 keme a kere nọ: “Wha rẹ jọ ọrẹri hrọ, keme mẹ ọrẹri.”
17 Yọ otẹrọnọ wha bi se Ọsẹ na nọ o re bruoziẹ ababọ ọriẹwẹ lele epanọ iruo omomọvo e rrọ na, wha rọ ozodhẹ yeri uzuazọ evaọ ubroke nọ wha be rria na.
18 Keme wha riẹ nọ orọnikọ eware nọ e rẹ raha, wọhọ isiliva hayo igoru, a ro si* owhai no igbo edhere uzuazọ ufofe rai hi, onọ esẹ-ode rai a fihọ otọ kẹ owhai.
19 Rekọ azẹ ọghaghae Kristi a ro siwi owhai, onọ o wọhọ orọ omogodẹ nọ o wo ẹyao ho jẹ kare epe.
20 Uzẹme, Ọghẹnẹ ọ salọ e riẹ taure akpọ na o te ti muhọ,* rekọ a dhesẹ i rie via evaọ obọ urere oke nana fiki rai.
21 Ẹkwoma riẹ wha rọ rọwo Ọghẹnẹ, ọnọ ọ kpare riẹ no uwhu ze jẹ kẹe oruaro, re wha ruẹsi fi ẹrọwọ gbe ẹruore rai họ Ọghẹnẹ.
22 Enẹna nọ wha ru omarai fo no ẹkwoma ẹmeoyo kẹ uzẹme na, onọ o wha riẹ ze nọ wha ro wo uyoyou-inievo nọ o kare eviẹhọ na, jọ wha you ohwohwo gaga no udu ze.
23 Keme a rọ ẹkwoma ẹme Ọghẹnẹ ọnọ ọ rrọ uzuazọ jẹ rrọ bẹdẹ bẹdẹ na wariẹ yẹ owhai no, orọnikọ ẹkwoma oware nọ u re gbo ho rekọ ẹkwoma ubi nọ u re gbo ho.*
24 Keme “ahwo kpobi a wọhọ ẹbe, yọ oruaro rai o wọhọ ododo ẹwọ; ẹbe na o te whu no, ododo na ọ vẹ kpare kie,
25 rekọ ẹme Jihova* ọ rẹ jọ bẹdẹ bẹdẹ.” Yọ “ẹme” nana họ usi uwoma na nọ a whowho kẹ owhai na.
Eme-Obotọ
^ Evaọ Griki, “nọ ọ rrọ uzuazọ.”
^ Evaọ Griki, “dhesẹ via.”
^ Hayo “a rọ erae ru ei fo.”
^ Hayo “i su.”
^ Evaọ Griki, “ta owhai no igbo; dẹ owhai zihe ze.”
^ Onana u dhesẹ okenọ Adamu avọ Ivi a ro mu emọ họ eyẹ.
^ Koyehọ, ubi nọ o rẹ sae mọ ibi.
^ Rri oria Otofa Eme
