1 Pita 2:1-25
2 Fikiere, wha siobọno eyoma kpobi gbe ẹghẹ gbe eviẹhọ gbe ihri-eriọ gbe eme iyoma eta kpobi.
2 Wọhọ emọboba nọ a yẹ obọ, wha wo isiuru kẹ ame-ivie ẹme na nọ a rọ oware ofa gua ha na, re wha rọ ẹkwoma riẹ rro te epanọ wha re ro wo esiwo,
3 keme wha dawo jẹ ruẹ no nọ Olori na ọ rrọ wowou.
4 Wha be nya bru utho nọ o rrọ uzuazọ ze, onọ ahwo a se rekọ nọ Ọghẹnẹ ọ salọ, nọ ọ rrọ ghaghae kẹe.
5 Whai omarai nọ wha rrọ itho nọ e rrọ uzuazọ na whai yọ uwou nọ a be rọ ẹkwoma ẹzi Ọghẹnẹ bọ, re wha jọ utu izerẹ ọrẹri, re wha ruẹsi dhe idhe nọ Ọghẹnẹ ọ rẹ jẹrehọ avọ obufihọ ẹzi Ọghẹnẹ ẹkwoma Jesu Kristi.
6 Keme a jọ Ikereakere na ta nọ: “Rri! Mẹ be wọ utho nọ a salọ họ otọ evaọ Zayọn, utho ubienẹ otọhotọ oghaghae, yọ ohwo ọvuọvo nọ o bi fi ẹrọwọ họ iẹe nọ u re kiekpe* ọ riẹ hẹ.”
7 Fikiere, whai ọ rrọ ghaghae kẹ, keme wha rọwo e riẹ; rekọ rọkẹ enọ e rọwo ho, “utho nọ ebebabọ na a se, oye u zihe ruọ utho ubienẹ nọ o mai wuzou no na”
8 gbe “utho ezoruẹ gbe utho ọzadhe.” A bi zoruẹ fikinọ a be rọwo ru lele ẹme na ha. Yọ enẹ a ta nọ o rẹ jọ kẹ ahwo otiọye.
9 Rekọ whai yọ “uyẹ nọ a salọ, izerẹ nọ e rrọ ivie, orẹwho ọrẹri, ahwo nọ a rẹ jọ okwakwa obọdẹ, re wha ruẹse jọ oria kpobi whowho ewoma”* Ọnọ o se owhai no ebi ziọ elo igbunu riẹ.
10 Keme a rri owhai fihọ ahwo vẹre he, rekọ enẹna wha rrọ ahwo Ọghẹnẹ; a dhesẹ ohrọ-oriọ kẹ owhai vẹre he, rekọ enẹna a dhesẹ ohrọ-oriọ kẹ owhai no.
11 Iyoyou, mẹ be tuduhọ owhai awọ nọ wọhọ enọ e rrọ orẹwho ofa gbe enọ e be rria ubroke, wha hai siomano isiuru uwo nọ e be họre wọso owhai.
12 Wha sẹro emamọ uruemu rai evaọ udevie erẹwho na, re nọ a tẹ be ta ẹme wọso owhai inọ whai irumuomu, a vẹ te ruẹ iruo iwoma rai, u ve ti ru nọ a te rọ kẹ Ọghẹnẹ oruaro evaọ ẹdẹ ọkiẹriwo riẹ.
13 Fiki Olori na, wha romakpotọ kẹ ọruẹrẹfihotọ ohwo-akpọ kpobi, ovie wọhọ ọnọ o wuzou,
14 hayo isu-ubrotọ wọhọ enọ ọ kẹ udu re a rọ uye kẹ enọ i ru eyoma, a ve jiri enọ i ru ewoma.
15 Keme oreva Ọghẹnẹ o rrọ inọ wha te bi ru ewoma, wha sai ruru unu enọ e kare iroro nọ e be rọ ogbori ta ẹme.
16 Wha yeri wọhọ emuyẹ, rekọ wha du rehọ ufuoma rai rọ foma ru eyoma ha, rekọ wọhọ erigbo Ọghẹnẹ.
17 Wha rọ ọghọ kẹ oghẹrẹ ahwo kpobi, wha you inievo na kpobi, wha dhozọ Ọghẹnẹ, wha rọ ọghọ kẹ ovie.
18 Jọ idibo a romakpotọ kẹ ilori rai avọ uvi ozodhẹ, orọnikọ ilori nọ i woma je wo ororokẹ* ọvo ho, rekọ te enọ o rrọ bẹbẹ re a ru eva were.
19 Keme emamọ oware o rrọ nọ ohwo o te bi thihakọ ẹbẹbẹ* jẹ be ruẹ uye okienyẹ fikinọ ọ gwọlọ wo emamọ obruoziẹ-iroro evaọ aro Ọghẹnẹ.
20 Kọ didi erere ọ riẹ nọ a te bi kpe owhẹ fikinọ whọ raha uzi yọ who bi thihakọ riẹ? Rekọ otẹrọnọ who bi thihakọ uye fikinọ who bi ru ewoma, onana yọ oware nọ u kiehọ evaọ aro Ọghẹnẹ.
21 Ẹhẹ, fiki onana a ro se owhai, keme Kristi omariẹ ọ ruẹ uye kẹ owhai, ọ nyasiọ oriruo ba kẹ owhai re wha lele ithihi riẹ kpekpekpe.
22 Ọ raha uzi ovo ho, yọ eviẹhọ e jọ unu riẹ hẹ.
23 Nọ a jẹ lae eka, ọ la eka zihe he. Nọ ọ jẹ ruẹ uye, o seha kẹ enọ e jẹ kẹe uye he, rekọ o mu omariẹ họ obọ Ọnọ o re bruoziẹ okiẹrẹe na.
24 Ọ wọ izieraha mai họ oma nọ a kare iẹe fihọ ure na, re ma ruẹsi whu evaọ abọ izieraha ma ve yeri uzuazọ ẹrẹreokie. Yọ “ẹkwoma oma nọ a nwa riẹ a ro siwi owhai.”
25 Keme wha jọ wọhọ igodẹ nọ i bi vru, rekọ enẹna wha zihe bru othuru-igodẹ gbe ọsẹro uzuazọ rai ze no.
Eme-Obotọ
^ Evaọ Griki, “nọ o re ru oma vo.”
^ Koyehọ, oghẹrẹ ohwo nọ ọ rrọ gbe eware iwoma nọ o bi ru.
^ Hayo “ọnọ ọ rẹ kpairoro vrẹ oriẹ, ọ vẹ rọwo orọ amọfa, ọnọ o re si eware kekeke he.”
^ Hayo “uweri; edada.”
