1 Pita 3:1-22
3 Epọvo na re, whai eyae wha romakpotọ kẹ ezae rai, re otẹrọnọ ejọ i bi lele Ẹme Ọghẹnẹ hẹ, ẹsejọhọ a vẹ te rọ fiki emamọ uruemu eyae rai kurẹriẹ ababọ ẹme nọ a ta kẹ ae,
2 keme a be rọ ẹro ruẹ uruemu ezi* rai gbe adhẹẹ odidi nọ wha wo.
3 Wha jọ osẹ* rai o jọ orọ okafe he, orọ igbeto ime gbe ekwakwa igoru hayo iwu iwoma nọ a re fihọ,
4 rekọ jọ o jọ orọ obọ udu na, koyehọ ẹzi udhedhẹ gbe ẹwolẹ nọ a rẹ rọ gẹgọ nọ o rẹ raha ha, onọ o rrọ ghaghae gaga evaọ aro Ọghẹnẹ.
5 Keme enẹ eyae ẹrọwọ erọ oke nọ u kpemu nọ e rọ ẹruore rai kpahe Ọghẹnẹ a jẹ rọ whẹ erru họ omarai, a jẹ romakpotọ kẹ ezae rai,
6 wọhọ epanọ Sera o je yoẹme kẹ Abraham, nọ o je sei olori. Whai yọ emọ riẹ otẹrọnọ wha ruabọhọ ewoma oruo, wha gbẹ jẹ kuvẹ re oware ovo u ru ozọ mu owhai hi.
7 Epọvo na re, whai ezae, wha hae rehọ otoriẹ lele eyae rai yeri.* Wha rọ ọghọ kẹ aye wọhọ epanọ wha re ru okwakwa nọ o rrọ hẹhẹhẹ gaga, keme te ai te owhai wha gbẹ rrọ ereuku uzuazọ fiki aruoriwo ologbo Ọghẹnẹ, re elẹ rai i gbe brudhe he.
8 Orọ urere, jọ whai kpobi wha wo iroro evo,* wo ororokẹ kẹ ohwohwo, wo uyoyou-inievo, uvi ohrọ-oriọ, gbe omaurokpotọ.
9 Jọ wha rehọ eyoma hwosa eyoma ha hayo ekela hwosa ekela ha. Ukpoye, wha rehọ ẹme owowou hwa zihe, keme fiki onana a ro se owhai, re wha ruẹsi wo oghale.
10 Keme “ohwo kpobi nọ uzuazọ o were, ọ tẹ jẹ gwọlọ wo evawere ọ rẹ kpọ ẹrọo riẹ no eme iyoma yọ ọ rẹ rehọ igbenu riẹ ta eme eviẹhọ họ.
11 Jọ o siomano oware uyoma o ve ru oware uwoma; jọ ọ gwọlọ udhedhẹ jẹ daoma sẹro riẹ.
12 Keme ibiaro Jihova* i bi rri enọ i kiẹrẹe, yọ ezọ riẹ i bi yo olẹ-ayare rai, rekọ ovao Jihova* o wọso enọ i bi ru eware iyoma.”
13 Evaọ uzẹme, ono ọ rẹ nwa owhai oma nọ wha te bi kru oma ga ru oware uwoma?
14 Rekọ wha tẹ make be ruẹ uye fiki ẹrẹreokie, jọ eva e were owhai. Ghele na, wha dhozọ oware nọ a be dhozọ riẹ hẹ,* hayo ruawa ha.
15 Rekọ wha jọ udu rai rọwo inọ Kristi họ Olori, ọ tẹ jẹ rrọ ọrẹri, wha ruẹrẹ oma kpahe ẹsikpobi re wha ta ẹkẹ-unu rai kẹ ohwo kpobi nọ ọ nọ owhai kpahe ẹruore nọ wha wo na, rekọ wha ru ere avọ udu uwowolẹ gbe adhẹẹ odidi.
16 Wha sẹro emamọ obruoziẹ-iroro rai, re evaọ edhere kpobi nọ a be rọ ta ẹme wọso owhai, oma o vẹ te vuọ enọ e be ta ẹme wọso owhai na fiki emamọ uruemu rai wọhọ enọ i bi lele Kristi.
17 Keme o mai woma re wha ruẹ uye fikinọ wha bi ru ewoma, o tẹ rrọ oreva Ọghẹnẹ nọ ọ rẹ kuvẹ riẹ, viukpenọ wha rẹ ruẹ uye fikinọ wha bi ru eyoma.
18 Keme Kristi o whu ẹsiẹvo rọkẹ oke kpobi fiki izieraha ahwo, ohwo okiẹrẹe nọ o whu fiki ahwo nọ a kiẹrẹe he, re ọ ruẹsi su owhai bru Ọghẹnẹ. A kpe rie evaọ oma uwo rekọ a kpare riẹ ziọ uzuazọ evaọ oma ẹzi.
19 Enẹ ọ rọ nyavrẹ o te whowho ovuẹ kẹ izi nọ e rrọ uwou-odi,
20 enọ e ghẹmeeyo evaọ oke Noa. Evaọ edẹ yena Ọghẹnẹ ọ jẹ rọ odiri hẹrẹ* nọ Noa o je ku okọ na, onọ umutho ahwo, koyehọ imaree a ruọ eva nọ a rọ zọ evaọ owhe na.
21 Oware nọ o wọhọ oyena, koyehọ ame-ọhọ, u bi siwi owhai enẹna re fiki ẹkparomatha Jesu Kristi. Ame-ọhọ yọ orọnikọ ẹhọ egbegbe no ugboma na ha, rekọ yọ ayare inọ Ọghẹnẹ ọ kẹ ohwo emamọ obruoziẹ-iroro.
22 Jesu ọ rrọ obọze Ọghẹnẹ, keme o kpohọ odhiwu, Ọghẹnẹ o te ru ikọ-odhiwu gbe enọ i wo udu-esuo gbe ogaga re a jọ otọ riẹ.
Eme-Obotọ
^ Evaọ Griki, “ofuafo.”
^ Hayo “ẹgọ nọ a rẹ rọ whẹ erru họ oma.”
^ Hayo “hai dhesẹ ororokẹ kẹ ae; daoma riẹ epanọ a rrọ.”
^ Hayo “jọ iroro rai e rọwokugbe.”
^ Rri oria Otofa Eme.
^ Rri oria Otofa Eme.
^ Hayo o sae jọ nọ, “wha dhozọ eha nọ a bi se he.”
^ Evaọ Griki, “odiri Ọghẹnẹ ọ jẹ hẹrẹ.”
