1 Pita 5:1-14
5 Fikiere, mẹ nọ ọ rrọ ọkpako ukoko re, nọ ọ rọ ẹro ruẹ eware nọ Kristi ọ ruẹ uye rai gbe ọnọ o ti wobọ evaọ oruaro nọ a bi ti dhesẹ via na, mẹ be yare* ekpako nọ e rrọ udevie rai nọ:
2 Wha sẹro uthuru Ọghẹnẹ nọ a rọ kẹ owhai nọ wha rẹrote, wha ru iruo ọsẹro,* orọnikọ wọhọ oware ọgbahọ họ, rekọ avọ unevaze evaọ aro Ọghẹnẹ; orọnikọ fiki erere nọ a rẹ rọ ewhariọ wo ho, rekọ u re no owhai eva ze;
3 yọ orọnikọ wha re ru omarai ilori kẹ enọ e rrọ erọ Ọghẹnẹ hẹ, rekọ wha rẹ jọ oriruo kẹ uthuru na.
4 Yọ okenọ a tẹ rọ othuru-igodẹ ologbo na via no, a rẹ te kẹ owhai etu-uvie oruaro nọ o rẹ hiẹ hẹ.
5 Epọvo na re, whai ezae nọ e gbẹ maha, wha romakpotọ kẹ ekpako na. Rekọ jọ whai kpobi wha rọ omaurokpotọ gẹgọ ro lele ohwohwo yeri, keme Ọghẹnẹ ọ rẹ wọso enọ i wo omorro, rekọ o re dhesẹ uwowou ulogbo kẹ enọ i wo omaurokpotọ.
6 Fikiere, wha hrẹ omarai kpotọ fihọ otọ Ọghẹnẹ nọ o wo ogaga na,* re ọ te kpare owhai kpehru nọ oke u te te,
7 wha gbolo awaọruọ rai kpobi kẹe, keme ọ be daezọ rai.
8 Wha sẹro iroro rai, wha hai rou.* Ọwegrẹ rai, Ẹdhọ, ọ be nya kpenẹ avọ enẹ wọhọ okpohrokpo nọ o bi do enu, be gwọlọ ohwo nọ ọ rẹ re no.
9 Rekọ wha dikihẹ ga wọso ẹe, wha jọ gaga evaọ ẹrọwọ na, keme wha riẹ nọ inievo rai kpobi evaọ akpọ na soso a be ruẹ oghẹrẹ iye evona.
10 Rekọ nọ wha tẹ ruẹ uye omoke jọ no, Ọghẹnẹ nọ ọ vọ avọ uwowou ulogbo na, nọ o se owhai ziọ oruaro ebẹdẹ bẹdẹ riẹ fiki usu nọ wha rrọ kugbe Kristi, o ti wuhrẹ owhai totọ. O ti ru owhai ga, o ti ru owhai dikihẹ ga, o ti ru owhai dowọ muotọ.
11 Ọye o wo ogaga bẹdẹ bẹdẹ. Ami.
12 Ẹkwoma Silvanọs,* ọnọ mẹ riẹ nọ ọ rrọ oniọvo nọ o wo ẹrọwọ, me ro kere umutho eme nana se owhai, re mẹ tuduhọ owhai awọ je se isẹri uzẹme inọ onana họ uwowou ulogbo Ọghẹnẹ. Wha dikihẹ ga evaọ eva riẹ.
13 Aye* nọ ọ rrọ evaọ Babilọn, ọnọ a salọ wọhọ owhai, o bi yere owhai, ere Mak ọmọzae mẹ re.
14 Wha rọ ẹviọlọ uyoyou yere ohwohwo.
Jọ udhedhẹ u te owhai kpobi nọ e rrọ usu kugbe Kristi.
Eme-Obotọ
^ Hayo “tuduhọ.”
^ Hayo “romatotọ sẹro riẹ.”
^ Evaọ Griki, “obọ ulogbo Ọghẹnẹ.”
^ Hayo “rroro.”
^ Nọ a re je se Saelas.
^ O wọhọ nọ “aye” nọ a jọ etenẹ fodẹ na u dikihẹ kẹ ukoko nọ o jọ Babilọn.
