2 Ahwo Kọrint 1:1-24
1 Pọl, ọnọ ọ rrọ ukọ Kristi Jesu wọhọ epaọ oreva Ọghẹnẹ, gbe Timoti oniọvo mai nọ ọ rrọ kugbe omẹ, ro se ukoko Ọghẹnẹ nọ o rrọ Kọrint, gbe erezi na kpobi nọ e rrọ Akeya soso.
2 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.
3 Jọ ujiro u te Ọghẹnẹ, Ọsẹ Olori mai Jesu Kristi, Ọsẹ nọ o wo ohrọ-oriọ gbe Ọghẹnẹ nọ ọ rẹ kẹ omosasọ evaọ oghẹrẹ uyero kpobi,
4 ọnọ ọ rẹ sasa* omai oma evaọ uye* kpobi nọ ma rrọ, re ma sae rọ omosasọ nọ ma wo no obọ Ọghẹnẹ ze rọ sasa amọfa oma evaọ oghẹrẹ uye* kpobi nọ a rrọ.
5 Wọhọ epanọ ma be ruẹ uye buobu fiki Kristi na, ere ọvona ma bi wo omosasọ ga te ẹkwoma Kristi.
6 Whaọ ma tẹ rrọ uye,* ma rrọ uye re wha sai wo omosasọ gbe esiwo; yọ ma te bi wo omosasọ, o rrọ kẹ omosasọ rai, onọ u re fiobọhọ kẹ owhai thihakọ oghẹrẹ uye nọ u bi te omai na.
7 Fikiere, ẹruore mai kpahe owhai o rrọ gaga, keme ma riẹ nọ wọhọ epanọ wha bi lele omai ruẹ uye na, wha ti lele omai wo omosasọ re.
8 Inievo, ma gwọlọ nọ wha riẹ kpahe uye nọ o bẹ omai evaọ ubrotọ Esia. Uye na o ga vi omai oma te epanọ ma je ro roro nọ ma te zọ họ.
9 O jọ omai oma nọ uwhu mai u te otọ no. Onana o via re ma gbẹ rẹroso omobọ mai hi rekọ Ọghẹnẹ, ọnọ ọ rẹ kpare enọ i whu no ze.
10 Uwhu dẹẹ ọ thọ omai no yọ ọ te gbẹ thọ omai, ma rẹroso iẹe inọ ọ te gbẹ thọ omai.
11 Whai omarai, wha sai fiobọhọ kẹ omai ẹkwoma olẹ ọgaga nọ wha rẹ lẹ roro omai. Onana u ti ru nọ ahwo buobu a ti ro jiri Ọghẹnẹ rọkẹ obọ nọ o bi fihọ kẹ omai fiki elẹ nọ ahwo buobu a be lẹ roro omai.
12 Onana họ oware nọ ma bi ro seha, obruoziẹ-iroro mai o bi se isẹri kẹ omai inọ emamọ uruemu gbe eva efuafo ma bi ro yeri evaọ akpọ na, maero evaọ udevie rai, orọnikọ avọ areghẹ ohwo-akpọ họ rekọ uwowou ulogbo Ọghẹnẹ.
13 Keme eware nọ ma bi kere se owhai na yọ eware nọ wha rẹ sai se je wo otoriẹ rai,* yọ me rẹro nọ wha ti gbe wo otoriẹ eware nana vọvọ,*
14 wọhọ epanọ wha vuhumu omojọ no na inọ wha sae rọ omai seha, wọhọ epanọ ma te rọ owhai seha re evaọ ẹdẹ Olori mai Jesu.
15 Fiki imuẹro nana, mẹ jẹ gwọlọ nọ mẹ rẹ kake nya bru owhai ze tao, re wha sai wo uvẹ avọ ivẹ nọ wha rẹ rọ ghọghọ;*
16 keme me wo họ iroro nọ mẹ rẹ nya bru owhai ze nọ me ti kpobọ Masidonia, je zihe no obọ Masidonia bru owhai ze, me ve no oborai kpobọ Judia.
17 Whaọ, nọ mẹ jiroro nana, kọ me rri rie jeve jeve? Hayo kọ isiuru obọmẹ me bi le, nọ mẹ rẹ rọ ta nọ “Ee, Ee” me ve nwene unu ta nọ “Ijo, ijo”?
18 Uzẹme ma be ta kẹ owhai na, wha rẹ sai fievahọ Ọghẹnẹ. Ma re yo “Ee” kpakiyọ “Ijo” ma wo họ iroro ho.
19 Keme Ọmọ Ọghẹnẹ, Jesu Kristi, ọnọ mẹ avọ Silvanọs* gbe Timoti ma whowho kẹ owhai, ọ rẹ ta nọ “Ee” kpakiyọ “Ijo” ho, rekọ “Ee” riẹ yọ “Ee.”
20 Makọ epanọ eyaa Ọghẹnẹ i bu te kẹhẹ, i bi rugba ẹkwoma riẹ. Fikiere, ẹkwoma riẹ ma be rọ ta kẹ Ọghẹnẹ nọ “Ami,” onọ o be wha oruaro se Ọghẹnẹ.
21 Rekọ Ọghẹnẹ họ ọnọ ọ kẹ imuẹro inọ mai avọ owhai yọ erọ Kristi, yọ ọye ọ salọ omai.
22 O te je kpoka riẹ họ omai no, yọ ọ kẹ omai oka imuẹro oware nọ o be tha na* no, koyehọ ẹzi na nọ ọ kẹ omai evaọ udu mai.
23 Ọghẹnẹ họ osẹri mẹ inọ mẹ gwọlọ fi ọkora họ owhai oma ha, oye mẹ gbẹ re rọ nyaze Kọrint he na.
24 Orọnikọ mai họ enọ e be kpọ ẹrọwọ rai hi, rekọ mai yọ ibe iruiruo rai nọ i bi fiobọhọ kẹ owhai wo oghọghọ, keme fiki ẹrọwọ rai wha ro dikihẹ.
Eme-Obotọ
^ Hayo “tuduhọ omai awọ.”
^ Hayo “ukpokpoma.”
^ Hayo “ukpokpoma.”
^ Hayo “ukpokpoma.”
^ Hayo o sae jọ nọ, “eware nọ wha riẹ ziezi no vẹre.”
^ Evaọ Griki, “rite urere.”
^ Hayo o sae jọ nọ, “re wha sai wo erere isiava.”
^ Nọ a re je se Saelas.
^ Hayo “ọ hwa abọjọ oware nọ o be tha na.”
