2 Ahwo Kọrint 10:1-18
10 Whaọ mẹ Pọl mẹ be rehọ ẹwolẹ gbe uwowou Kristi lẹ owhai, dede nọ mẹ rẹ wọhọ ọyẹlẹ nọ mẹ tẹ rrọ kugbe owhai ovao dhe ovao, mẹ rẹ ta ẹme ududu kẹ owhai okenọ mẹ rrọ kugbe owhai hi.
2 Mẹ be lẹ nọ mẹ tẹ nyaze, jọ udu mẹ o lọhọ re mẹ siọ oware ogaga nọ me wo họ iroro ba eru kpahe enọ i bi rri omai wọhọ ẹsenọ ma be rọ iroro akpọ na ru eware.
3 Keme dede nọ mai yọ ahwo-akpọ, orọnikọ ẹgba gbe eriariẹ ohwo-akpọ ma bi ro fi ẹmo ho.
4 Ekwakwa ẹmuofio mai e rrọ erọ akpọ na ha, rekọ Ọghẹnẹ họ ọnọ ọ be kẹ omai ogaga nọ ma rẹ rọ raha eware nọ e dowọ mu otọ gaga.
5 Keme ma be raha iroro ethọthọ gbe oware kpobi nọ o wọso eriariẹ Ọghẹnẹ, yọ ma bi mu oghẹrẹ iroro kpobi imu re u ru ahwo yoẹme kẹ Kristi;
6 yọ ma ruẹrẹ oma kpahe re ma kẹ ohwo kpobi nọ ọ ghẹmeeyo uye, nọ wha tẹ jọ kabọ kabọ dhesẹ no inọ wha bi yoẹme.
7 Okafe wha bi rri ro bruoziẹ. U te mu ohwo jọ ẹro nọ ọ rrọ ọrọ Kristi, jọ ọ wariẹ roro kpahe onana: Wọhọ epanọ ọ rrọ ọrọ Kristi na, ere ma rrọ re.
8 Keme mẹ tẹ maki seha gahrọ omojọ kpahe udu nọ Olori na ọ kẹ omai inọ ma rọ bọ owhai ga orọnikọ re ma ro whrehe owhai hi, oma o rẹ vuọ omẹ hẹ.
9 Keme mẹ gwọlọ re o jọ wọhọ ẹsenọ mẹ be rọ ileta mẹ ro guegue owhai hi.
10 Keme a be ta nọ: “Ileta riẹ i re wo ẹgba, rekọ nọ ọ tẹ rrọ kugbe omai* ọ wọhọ ọyẹlẹ, yọ ẹmeọta riẹ o re siuru hu.”
11 Jọ ohwo otiọye ọ riẹ inọ oware nọ ma kere evaọ ileta mai okenọ ma rrọ kugbe owhai hi, oye ma ti ru okenọ ma tẹ rrọ kugbe owhai.
12 Ma rẹ dariẹ kele omamai kugbe ejọ hayo rọ omamai wawo ejọ nọ ae ọvo a bi jiri omarai hi. Rekọ nọ a be rehọ izi obọrai nọ a fihọ rọ kiẹ omarai riwi jẹ be rehọ omarai wawo ohwohwo na, u dhesẹ nọ a kare otoriẹ.
13 Rekọ, umuo uwhru ẹkwotọ nọ Ọghẹnẹ ọ ghale kẹ omai ma re seha ba, ma rẹ nyavrẹ uwhru mai hi. Whai yọ abọjọ ẹkwotọ mai.
14 Ma fa uwhru mai vrẹ hẹ nọ ma nya bru owhai ze nọ orọnọ ẹkwotọ mai wha rrọ na, keme mai họ ahwo ọsosuọ nọ a whowho usi uwoma kpahe Kristi kẹ owhai.
15 Ijo, orọnikọ otafe ẹkwotọ mai ma bi jo seha ha, koyehọ iruo omọfa, rekọ ma wo ẹruore inọ, nọ ẹrọwọ rai ọ be ga na, iruo nọ ma ru na i ti vihọ, evaọ ẹkwotọ mai na. Onana o vẹ te lẹliẹ omai ru viere,
16 re ma sai whowho usi uwoma na evaọ erẹwho efa, re ma gbẹ rehọ iruo nọ a ru no evaọ ẹkwotọ omọfa ro seha ha.
17 “Rekọ jọ ohwo nọ o bi seha, ọ rehọ Jihova* seha.”
18 Keme ohwo nọ Jihova* o bi jiri ọye Ọ rẹ jẹrehọ orọnikọ ohwo nọ o bi jiri omobọ riẹ hẹ.
