2 Ahwo Kọrint 12:1-21
12 Me re seha. Mẹ riẹ nọ o rẹ kẹ erere he. Ghele na, mẹ te ta kpahe eruẹaruẹ gbe eviavia igbunu nọ i no obọ Olori na ze.
2 Mẹ riẹ ọzae jọ nọ ọ rrọ usu kugbe Kristi. Ikpe ikpegbene nọ e vrẹ a rehọ e riẹ vrẹ idudhe kpohọ odhiwu avọ esa—sọ oma uwo a rọ rehọ iẹe vrẹ hayo oma uwo ho mẹ riẹ hẹ; Ọghẹnẹ ọ riẹ.
3 Ẹhẹ, mẹ riẹ ọzae otiọye na. A rehọ e riẹ vrẹ kpohọ aparadase—sọ oma uwo a rọ rehọ iẹe vrẹ hayo oma uwo ho mẹ riẹ hẹ; Ọghẹnẹ ọ riẹ.
4 Nọ ọ jọ aparadase na, o yo eme nọ a rẹ sae ta ha, nọ i fo eme nọ ohwo ọ rẹ ta ha.
5 Mẹ rẹ rehọ ohwo otiọye na seha, rekọ mẹ rẹ rehọ omobọ mẹ seha ha, ajokpaọ eria nọ mẹ jọ ga ha.
6 Keme mẹ tẹ tubẹ gwọlọ seha, u ti dhesẹ nọ mẹ kare iroro ho, keme uzẹme na mẹ te ta. Rekọ me bi ru ere he, re ohwo ọvo o gbe jiri omẹ vi oware nọ ọ be jọ oma mẹ ruẹ hẹ hayo nọ o bi yo mi omẹ,
7 fikinọ eviavia igbunu itieye na i te omẹ obọ.
Re me gbe fu uke gahrọ họ, a kẹ omẹ unwe evaọ oma mẹ nọ u bi duwu omẹ, ukọ Setan re ọ hae tehe* omẹ, re me gbe fu uke gahrọ họ.
8 Isiasa mẹ lẹ Olori na kpahe onana inọ jọ u no omẹ oma.
9 Rekọ ọ ta kẹ omẹ nọ: “Uwowou ulogbo nọ me dhesẹ kẹ owhẹ u te, keme evaọ oma enọ e ga ha ogaga mẹ u re jo dhesẹ oma via vọvọ.” Fikiere avọ evawere, mẹ rẹ rọ eware nọ mẹ jọ ga ha seha, re ogaga Kristi o ruẹsi ruru omẹ wọhọ uwou.
10 Fikiere oma o rẹ were omẹ okenọ mẹ ga ha, nọ a tẹ be poviẹ omẹ, nọ eware e tẹ rrọ omẹ oma gaga, nọ ukpokpoma gbe ebẹbẹ i te te omẹ fiki Kristi. Keme okenọ mẹ ga ha, ẹsiẹe me re wo ogaga.
11 Me zihe ruọ ohwo nọ ọ kare iroro no. Whai wha ru omẹ zihe ruọ ere, keme whai u fo nọ wha rẹ ta ewoma mẹ. Obọdẹ ikọ rai na a woma vi omẹ evaọ oware ovo ho, dede nọ mẹ yọ ohwo ọvo ho.
12 Ithihakọ egaga gbe eware eka gbe eware igbunu avọ iruo igbunu nọ me ru evaọ udevie rai i dhesẹ nọ mẹ ginọ ukọ.
13 Edhere vẹ me ro rri ikoko edekọ na aro vi owhai, u te no owha ẹruorote mẹ nọ mẹ wọ họ owhai uzou hu? Otẹrọnọ mẹ jọ onana ru thọ, wha rọvrẹ omẹ.
14 Rri! Onana họ orọ avọ esa nọ mẹ be rọ wọ nọ mẹ rẹ nya bru owhai ze, yọ mẹ te jọ owha kẹ owhai hi. Eyero rai mẹ be gwọlọ họ rekọ owhai; keme orọnikọ emọ họ enọ e rẹ kokọ kokohọ kẹ esẹgbini rai hi rekọ esẹgbini e rẹ kokọ kokohọ kẹ emọ rai.
15 Rọkẹ omẹ, mẹ rẹ rọ evawere rehọ eware mẹ kpobi gbe uzuazọ mẹ gbodibo fiki uzuazọ rai. Otẹrọnọ me you owhai ga tere, kọ mẹ wha re you tere he?
16 O make rrọ ere na, mẹ rọ uye bẹ owhai hi. Ghele na, wha be ta nọ me wo “ẹghẹ” gbe inọ “eviẹhọ” mẹ rọ ruọ owhai oma.
17 Kọ mẹ rọ ẹkwoma ahwo nọ me vi se owhai gboro oware jọ mi owhai?
18 Mẹ tuduhọ Taitọs awọ nọ ọ nya bru owhai ze, me te je vi oniọvo jọ lele iei. Taitọs o gboro oware ovo mi owhai hi, o ru ere? Uruemu ovona mẹ gbe ọyomariẹ ma dhesẹ, o gbẹ rrọ ere? Oghẹrẹ ovona ma ru, o gbẹ rrọ ere?
19 Nọ wha bi se ileta nana, kọ wha bi roro nọ ma bi gu ẹkẹ-unu mai kẹ owhai evaọ eme nọ wha ta kpahe omai? Ilele Jesu ma rrọ, yọ Ọghẹnẹ ọ riẹ nọ uzẹme na ma be ta na. Rekọ iyoyou, ma bi ru eware kpobi rọ bọ owhai ga.
20 Keme ozọ u bi mu omẹ inọ mẹ tẹ nyaze, mẹ te ruẹ owhai oghẹrẹ nọ mẹ gwọlọ họ, yọ wha te ruẹ omẹ oghẹrẹ nọ wha gwọlọ họ, ukpoye kọ eware nana mẹ te ruẹ evaọ udevie rai: ẹwhọ, ihri-eriọ, ofu-omuo, ohẹriẹ, eme iyoma eta, iguẹgu, uke-ufuo avọ omorro, gbe ozighi.
21 Ẹsejọhọ, nọ mẹ te wariẹ nyaze na, Ọghẹnẹ mẹ o ti ru omẹ oma vo evaọ udevie rai, me ve ti weri fiki ibuobu nọ e raha uzi vẹre nọ i ri kurẹriẹ hẹ no egbegbe rai, ọfariẹ-ogbe,* gbe uruemu nọ u fo ho nọ a re ru ababọ omovuọ.*
Eme-Obotọ
^ Hayo “hai kpe.”
^ Evaọ Griki, “por·neiʹa.” Rri oria Otofa Eme.
^ Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ
