2 Ahwo Kọrint 3:1-18
3 Kọ ma rẹ wariẹ dhesẹ omamai kẹ owhai? Hayo, wọhọ epanọ ahwo jọ a bi ru, kọ o gwọlọ nọ ma re kere ileta nọ a re ro dhesẹ ohwo se owhai ro dhesẹ omamai, hayo re wha kere ro dhesẹ omai?
2 Whai họ ileta mai, nọ a kere fihọ udu mai nọ ahwo-akpọ kpobi a riẹ je bi se.
3 O rrọ vevẹ nọ whai yọ ileta Kristi nọ a rọ ẹkwoma odibọgba mai kere, ẹzi Ọghẹnẹ nọ ọ rrọ uzuazọ na a ro kere iei orọnikọ ame-ugbẹ hẹ, yọ udu a kere ileta na fihọ orọnikọ ekpala itho ho.
4 Ma wo oghẹrẹ evaifihọ nana evaọ aro Ọghẹnẹ ẹkwoma Kristi.
5 Orọnikọ ma be ta nọ ẹgba mai ma ro te ziezi kẹ iruo nana ha, rekọ ọnọ o ru omai te ziezi họ Ọghẹnẹ,
6 ọnọ o ru omai te ziezi re ma jọ egbodibo ọvọ ọkpokpọ, orọnikọ ọrọ izi nọ a kere fihọ otọ họ, rekọ ẹzi ọfuafo na; keme Uzi na o rẹ wha obrukpe uwhu ze, rekọ ẹzi ọfuafo na ọ rẹ kẹ uzuazọ.
7 Whaọ, otẹrọnọ Uzi nọ o rẹ wha uwhu ze, onọ a kere fihọ itho na u wo oruaro te epanọ ahwo Izrẹl a jẹ sai ro rri ovao Mosis hi fiki epanọ ovao riẹ u je lo, yọ oruaro yena o te hiẹ no,
8 kọ iruo nọ ẹzi ọfuafo na o bi ru i gbe wo oruaro viere?
9 Otẹrọnọ Uzi nọ o be wha obrukpe ze na u wo oruaro, iruo ẹzi na nọ i bi ru ahwo kiẹrẹe na i re wo oruaro viere.
10 Evaọ uzẹme, makọ Uzi na nọ u wo oruaro vẹre na u gbe wo oruaro ho fiki oruaro nọ o rro vi ei nọ o ze.
11 Otẹrọnọ onọ a ti si no otọ no u wo oruaro, oruaro ọvọ ọkpokpọ na o rẹ rro viere.
12 Nọ ma wo ẹruore nana, ma be ta ẹme ududu,
13 yọ ma bi ru wọhọ Mosis hi ọnọ ọ jẹ hae rọ ohọ ruru ovao re ahwo Izrẹl a gbẹ ruẹ oware nọ Uzi nọ a ti si no otọ no na u bi su kpohọ họ.
14 Rekọ iroro rai i wuhu di. Rite inẹnẹ na, ohọ ovona u gbe di ude rai nọ a te bi se ọvọ anwae na, keme ẹkwoma Kristi ọvo a sai ro si ei no.
15 Rite inẹnẹ na, oke kpobi nọ a te bi se eme Mosis, ohọ u re ruru udu rai.
16 Rekọ nọ ohwo o te kurẹriẹ bru Jihova,* ohọ na u gbe ruru udu riẹ hẹ.
17 Jihova* yọ Ẹzi, yọ oria nọ ẹzi Jihova* ọ rrọ, ufuoma o rẹ jọ etẹe.
18 Rọkẹ omai kpobi, ohọ u ruru ovao mai hi. Ma wọhọ ighẹgbe nọ i bi dhesẹ oruaro Jihova* via. Yọ ma bi nwene re ma jọ wọhọ uwoho riẹ, bi no oruaro ruọ oruaro, wọhọ epanọ Jihova* ọnọ ọ rrọ Ẹzi na o bi ru ei fihọ.
Eme-Obotọ
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
