2 Ahwo Kọrint 4:1-18
4 Fikiere, nọ orọnọ ma wo iruo odibọgba nana fiki ohrọ nọ Ọghẹnẹ ọ re omai na, o be bẹ omai no ho.
2 Rekọ ma siobọno eware omovuọ nọ a re dhere ru no. Ma be rọ ẹghẹ ru eware hayo rẹriẹ ẹme Ọghẹnẹ hẹ; rekọ ma be rọ uzẹme na nọ ma bi whowho ro fi emamọ oriruo họ otọ kẹ ahwo kpobi evaọ aro Ọghẹnẹ.
3 Otẹrọnọ usi uwoma nọ ma bi whowho na u dhere, enọ a be te raha u dhere kẹ,
4 enọ e rrọ ilele Jesu hu nọ ọghẹnẹ uyero-akpọ* nana o wuhu iroro rai di no, re elo usi uwoma oruaro kpahe Kristi, ọnọ ọ rrọ uwoho Ọghẹnẹ na, o gbe lo mu ai hi.
5 Keme orọnikọ omobọ mai ma be ta kpahe he, rekọ Jesu Kristi inọ ọye họ Olori, gbe nọ mai yọ erigbo rai fiki Jesu.
6 Ọghẹnẹ họ ọnọ ọ ta nọ: “Jọ elo o lo no ebi ze,” yọ ọ rehọ obọdẹ eriariẹ riẹ ro fi elo họ udu mai no ẹkwoma ovao Kristi.
7 Rekọ, ma wo efe nana evaọ ekwakwa nọ a rọ ọviẹ ma, re u dhesẹ via nọ Ọghẹnẹ họ ọnọ ọ be kẹ omai ogaga nọ u vi ogaga orọnikọ ogaga obọmai hi.
8 A be nwẹ omai evaọ kabọ kabọ, rekọ a keke omai ba ugbẹhẹ hẹ; eware i re dhe omai ọvẹ, rekọ ma rẹ ruẹ edhere ro noi;
9 a bi kpokpo omai, rekọ a gbabọkẹ omai hi; a be rọ omai fotọ, rekọ ma bi whu hu.
10 Ẹsikpobi ma be rọ ovao dhe eware oja nọ e rẹ wha uwhu ze wọhọ epanọ o jọ kẹ Jesu, re uzuazọ Jesu o ruẹsi dhesẹ oma via evaọ oma mai re.
11 Mai nọ ma rrọ uzuazọ ma be rọ ovao dhe uwhu ẹsikpobi fiki Jesu, re uzuazọ Jesu o ruẹsi dhesẹ oma via re evaọ ugboma mai nọ u re whu.
12 Fikiere, usi uwoma na o be lẹliẹ omai rẹriẹ ovao dhe uwhu, rekọ o be wha uzuazọ se owhai.
13 Whaọ ma wo oghẹrẹ ẹrọwọ ọvona nọ a kere kpahe nọ: “Mẹ rọwo, oyejabọ nọ mẹ be rọ ta ẹme”; ma rọwo re, oyejabọ nọ ma be rọ ta ẹme,
14 keme ma riẹ nọ Ọnọ ọ kpare Jesu ze ọ te kpare omai ze re wọhọ epanọ ọ kpare Jesu ze na, ọ vẹ rehọ omai gbe owhai rọ kẹe.
15 Eware nana kpobi e rrọ fiki rai, re ahwo buobu a sai wo erere no uwowou ulogbo Ọghẹnẹ ze keme amọfa buobu a be kẹ Ọghẹnẹ uyere onọ o be wha oruaro sei.
16 Fikiere, o be bẹ omai no ho, rekọ o tẹ make rọnọ ugboma mai o gbẹ ga tere he, ababọ avro, ohwo nọ ma rrọ evaọ obeva ọ be kpokpọ kẹdẹ kẹdẹ.
17 Keme dede nọ uye nọ ma be rẹriẹ ovao ku o rrọ ubroke jẹ rrọ vovori, o be lẹliẹ omai wo oruaro nọ u bi dhe ẹruẹruọ, onọ o rẹ jọ bẹdẹ bẹdẹ.
18 Orọnikọ eware nọ ma be ruẹ eye ma be tẹrovi hi, rekọ eware nọ a re ruẹ hẹ. Keme eware nọ ma be ruẹ e rẹ jọ ubroke, rekọ eware nọ a re ruẹ hẹ* e rẹ jọ bẹdẹ bẹdẹ.
