2 Ahwo Kọrint 5:1-21
5 Ma riẹ nọ otẹrọnọ uwou* otọakpọ mai o te kporo kuotọ no, Ọghẹnẹ ọ te kẹ omai uwou nọ o te jọ bẹdẹ bẹdẹ evaọ obọ odhiwu, uwou nọ a rọ abọ bọ họ.
2 Keme ma bi dimẹ evaọ uwou nana, be rọ ọwhọ rẹro onọ ma ti wo evaọ obọ odhiwu,
3 nọ ma te woi no, u ti ruru omai wọhọ ohọ.
4 Evaọ uzẹme, mai nọ ma rrọ uwou nana ma bi dimẹ, ma wo awaọruọ ọgaga keme ma gwọlọ no uwou nana ha, rekọ ma gwọlọ nọ ma rẹ jọ ọrọ obọ odhiwu na, re uzuazọ ebẹdẹ bẹdẹ u nwene ugboma nọ u re whu na.
5 Ọghẹnẹ họ ọnọ ọ ruẹrẹ omai họ kẹ onana, ọnọ ọ kẹ omai ẹzi ọfuafo na wọhọ oka imuẹro oware nọ o be tha na.*
6 Fikiere udu o rrọ omai awọ ẹsikpobi yọ ma riẹ nọ, nọ ma rrọ evaọ ugboma nana, ma sae jọ kugbe Olori na ha,
7 keme ẹrọwọ ma be rọ nya, orọnikọ eware nọ ma be ruẹ hẹ.
8 Rekọ udu o rrọ omai awọ, yọ o mae were omai re ma nyasiọ ugboma nana ba re ma jọ kugbe Olori na.
9 Fikiere, te ma rrọ kugbei hayo ma rrọ kugbei hi, ma gba riẹ mu nọ ma re ru onọ o rẹ were iẹe.
10 Keme mai kpobi te romavia* hrọ evaọ aro akaba oziẹobro Kristi, re omomọvo o ti wo osa eware nọ o ru nọ ọ jọ ugboma nana, te uwoma hayo uyoma.
11 Fikiere, nọ ma riẹ nọ u fo re ma dhozọ Olori na, ma be tẹzẹ ahwo re a gaviezọ, rekọ Ọghẹnẹ ọ riẹ omai ziezi. Me rẹro nọ obruoziẹ-iroro rai o fiobọhọ kẹ owhai riẹ omai ziezi no re.
12 Orọnikọ ma be wariẹ dhesẹ omamai kẹ owhai hi, rekọ ma be ta oware nọ o rẹ sae kẹ owhai udu rehọ omai seha, re wha sae kpahe ẹme kẹ enọ e rẹ rehọ eware okafe seha viukpọ oware nọ o rrọ udu.
13 Otẹrọnọ wha roro nọ iroro mai e gba ha, ma ru ere fiki Ọghẹnẹ; otẹrọnọ ma ta eme nọ i dhesẹ nọ iroro mai e rrọ gbagba, ma ru ere fiki rai.
14 Uyoyou nọ Kristi o wo o be wọ omai, keme ma rọwo nọ ọzae ọvo o whu kẹ ahwo kpobi; o whu kẹ ahwo kpobi keme aikpobi a whu no vẹre.
15 O whu kẹ ahwo kpobi re enọ e rrọ uzuazọ a gbẹ rria kẹ omobọ rai hi, rekọ rọkẹ ọnọ o whu kẹ ae nọ a kpare ze.
16 Fikiere, no enẹna vrẹ, ma gbẹ be rehọ eriwo ohwo-akpọ ro rri ohwo ọvo ho. O tẹ make rọnọ ma riẹ Kristi vẹre wọhọ ohwo-akpọ, ma gbẹ riẹe ere ofa vievie he.
17 Fikiere, ohwo kpobi nọ ọ rrọ usu kugbe Kristi yọ omama okpokpọ; eware anwae e vrẹ no, eware ekpokpọ e ze no.
18 Obọ Ọghẹnẹ eware kpobi i no ze, ọnọ ọ rehọ ẹkwoma Kristi ruẹrẹ omai họ kugbe ọyomariẹ, ọ tẹ kẹ omai iruo nọ ma re ro fiobọhọ kẹ ahwo ruẹrẹhọ kugbei,
19 koyehọ, Ọghẹnẹ ọ be rehọ ẹkwoma Kristi ruẹrẹ ahwo akpọ na họ kugbe ọyomariẹ, o bi kele iruthọ rai rọ kẹ ae he, yọ ọ kẹ omai iruo nọ ma re ro whowho ovuẹ nọ ahwo a rẹ rọ ruẹrẹhọ kugbei.
20 Fikiere, mai yọ enyukọ nọ i bi dikihẹ kẹ Kristi, wọhọ ẹsenọ Ọghẹnẹ ọ be rọ ẹkwoma mai lẹ ahwo. Wọhọ enọ i dikihẹ kẹ Kristi ma be lẹ nọ: “Wha ruẹrẹhọ kugbe Ọghẹnẹ.”
21 O ru ohwo nọ ọ riẹ uzioraha ha re ọ jọ idhe uzioraha fiki mai, re ma sae rọ ẹkwoma riẹ kiẹrẹe evaọ aro Ọghẹnẹ.
Eme-Obotọ
^ “Uwou” nọ a jọ etenẹ fodẹ na u dikihẹ kẹ ugboma uwo hayo ọrọ ẹzi.
^ Hayo “ọ hwa abọjọ oware nọ o be tha na.”
^ Hayo “a te rehọ omai via.”
