2 Ahwo Kọrint 6:1-18
6 Nọ ma bi lele Ọghẹnẹ ru iruo na, ma be tuduhọ owhai awọ re inọ, nọ wha jẹ uwowou ulogbo Ọghẹnẹ rehọ no na, wha ru re o jọ uvrẹvru hu.
2 Keme ọ ta nọ: “Evaọ oke ọjẹrehọ, me yo kẹ owhẹ, evaọ ẹdẹ esiwo, me fiobọhọ kẹ owhẹ.” Rri, enẹna họ ugogo oke ọjẹrehọ na. Rri, enẹna họ ẹdẹ esiwo.
3 Ma bi ru oware ovo nọ o rẹ wha ezoruẹ ze he, re a gbẹ jọ odibọgba mai ruẹ afuẹwẹ hẹ;
4 rekọ evaọ edhere kpobi, ma bi dhesẹ nọ mai yọ egbodibo Ọghẹnẹ, ẹkwoma ithihakọ evaọ eware buobu, ikpokpoma, oke uye, uyero obẹbẹ,
5 ukpe, efihọ uwou-odi, ozighi, iruo egaga, ababọ owezẹ evaọ aso, gbe ababọ emu unuẹse buobu.
6 Ofariẹ, ẹkwoma uzuazọ ẹfuọ, eriariẹ, odiri, uwowou, ẹzi ọfuafo, uyoyou nọ o kare eviẹhọ,
7 ẹta eme uzẹme, ogaga Ọghẹnẹ, ekwakwa-ẹmo ẹrẹreokie nọ ma kru họ obọze gbe ẹkpẹlobọ.
8 Ma bi je dhesẹ nọ mai yọ egbodibo Ọghẹnẹ nọ a te bi jiri omai je kpomovuọ họ omai oma, a tẹ be ta eme iyoma gbe eme iwoma kpahe omai. A bi rri omai nọ mai yọ eviẹahwohọ rekọ ma be ta uzẹme,
9 a bi rri omai nọ ohwo ọvo ọ riẹ omai hi, rekọ a riẹ omai, a bi rri omai nọ ma bi whu* rekọ ma rrọ uzuazọ, a bi rri omai nọ a be kẹ omai uye, rekọ ma whu hu,
10 a bi rri omai wọhọ enọ i bi weri rekọ ma be ghọghọ ẹsikpobi, wọhọ iyogbere rekọ ma bi ru ibuobu fe, wọhọ enọ i wo oware ovo ho rekọ ma wo eware kpobi.
11 Ma rovie unu mai ta ẹme kẹ owhai vevẹ, whai inievo Kọrint, yọ ma rovie udu mai fihọ gbaladha.
12 Ma bi dhesẹ uyoyou kẹ owhai vọvọ, rekọ wha bi dhesẹ uyoyou kẹ omai vọvọ họ.
13 Fikiere, mẹ be ta kẹ owhai wọhọ emọ mẹ inọ, wha ru epọvo na, wha rovie udu rai fihọ gbaladha re.*
14 Wha mu usu nọ u fo ho kugbe enọ e rrọ Ileleikristi hi hi. Didi usu ẹrẹreokie o wo kugbe emuemu? Hayo didi usu elo o wo kugbe ebi?
15 Ofariẹ, didi okugbe ọ rrọ udevie Kristi avọ Belial?* Hayo kọ eme ohwo nọ ọ rọwo Jesu avọ ọnọ ọ rọwo e riẹ hẹ a wo kugbe?
16 Kọ didi okugbe ọ rrọ udevie etẹmpol Ọghẹnẹ avọ emedhọ? Keme mai yọ etẹmpol Ọghẹnẹ nọ ọ rrọ uzuazọ; wọhọ epanọ Ọghẹnẹ ọ ta nọ: “Mẹ te rria udevie rai jẹ jọ udevie rai, mẹ te jọ Ọghẹnẹ rai, a vẹ te jọ ahwo mẹ.”
17 “‘Fikiere, wha no udevie rai, jẹ hẹriẹ oma no ai,’ ere Jihova* ọ ta, ‘yọ wha gbẹ rọ obọ te oware ugbegbe na ha’”; “‘me ve ti dede owhai rehọ.’”
18 “‘Mẹ vẹ te jọ ọsẹ rai, wha vẹ te jọ emezae gbe emetẹ mẹ,’ ere Jihova* Erumeru na ọ ta.”
Eme-Obotọ
^ Hayo “rri omai nọ ma fo uwhu.”
^ Hayo “wha rọ udu rai kpobi dhesẹ uyoyou re.”
^ Ẹme Hibru nọ otofa riẹ o rrọ “Ọnọ o fioka ha.” A rẹ rehọ iẹe ta ẹme kpahe Setan.
^ Rri oria Otofa Eme.
^ Rri oria Otofa Eme.
