Ahwo Ẹfisọs 1:1-23
1 Mẹ Pọl, ọnọ ọ rrọ ukọ Kristi Jesu wọhọ epaọ oreva Ọghẹnẹ, me bi kere ileta nana ro se erezi nọ e rrọ Ẹfisọs, nọ i bi kru ẹrọwọ rai evaọ usu kugbe Kristi Jesu:
2 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.
3 Jọ ujiro u te Ọghẹnẹ, Ọsẹ Olori mai Jesu Kristi, keme ọ rọ ẹkwoma ẹzi riẹ kẹ omai oghẹrẹ eghale kpobi evaọ obọ odhiwu fikinọ ma rrọ usu kugbe Kristi.
4 Ọ salọ omai re ma jọ usu kugbe Kristi taure akpọ na o te ti muhọ,* re uyoyou nọ ma wo kẹ Ọghẹnẹ u ru omai jọ ọrẹri jẹ kare epe evaọ aro riẹ.
5 Keme ọ jiroro na no anwẹdẹ inọ o ti zihe omai ruọ emọ obọriẹ ẹkwoma Jesu Kristi wọhọ epanọ o were riẹ jẹ rrọ oreva riẹ,
6 re ahwo a jiri ei fiki uwowou ulogbo nọ o dhesẹ kẹ omai ẹkwoma ọmọ oyoyou riẹ.
7 Fiki uwowou ulogbo riẹ, ọ rehọ ẹkwoma azẹ Ọmọ riẹ hwa osa ẹtanigbo ro si omai no igbo, koyehọ erọvrẹ izieraha mai.
8 Ọghẹnẹ o dhesẹ uwowou ulogbo nana kẹ omai evaọ areghẹ gbe otoriẹ kpobi nọ ọ kẹ omai,
9 ẹkwoma eware ididi ọrẹri erọ oreva riẹ nọ ọ fere via kẹ omai. Fikinọ o were riẹ, ọ jiroro nọ
10 o re ru ọruẹrẹfihotọ nọ ọ rẹ rọ kpọ eware nọ oke nọ o fihọ o tẹ gba no, re o koko eware kpobi họ kugbe evaọ Kristi, te eware nọ e rrọ obọ odhiwu gbe eware nọ e rrọ otọakpọ na. Ẹhẹ, evaọ eva riẹ,
11 ọnọ ma rrọ usu kugbe, nọ a rehọ omai mu kugbe re ma gbẹ jọ ereuku wọhọ epaọ ẹjiroro Ọghẹnẹ nọ ọ ta fihọ otọ no anwẹdẹ, keme o re ru eware kpobi nọ ọ jiroro rai lele oreva riẹ.
12 O ru onana re a sae rọ ẹkwoma mai nọ e kaki wo ẹruore kpahe Kristi na jiri Ọghẹnẹ jẹ kẹe oruaro.
13 Rekọ wha fi ẹruore họ iẹe re nọ wha yo ẹme uzẹme na no, koyehọ usi uwoma kpahe esiwo rai. Nọ wha rọwo no, a rọ ẹkwoma riẹ rehọ ẹzi ọfuafo nọ a ya eyaa riẹ na kpoka họ owhai,
14 onọ o rrọ imuẹro inọ ma ti wo ukuoriọ nọ o be tha na. Ẹjiroro onana họ re a rọ ẹkwoma ẹtanigbo si ahwo Ọghẹnẹ no igbo, onọ o te wha ujiro sei.
15 Yọ oyejabọ nọ, anwẹnọ me ro yo kpahe ẹrọwọ nọ wha fihọ Olori na Jesu gbe uyoyou nọ wha bi dhesẹ kẹ erezi na kpobi,
16 mẹ re siọ Ọghẹnẹ ba eyere fiki rai hi. Mẹ be fodẹ owhai ẹsikpobi evaọ elẹ mẹ,
17 inọ jọ Ọghẹnẹ ọrọ Olori mai Jesu Kristi, Ọsẹ oruaro na, ọ kẹ owhai ẹzi areghẹ gbe onọ wha re ro wo eriariẹ egbagba ọrọ eware nọ ọ fere via kpahe omariẹ.
18 O rovie udu rai no re wha ruẹ jẹ riẹ ẹruore nọ o se owhai ze kẹ, eghale ilogbo nọ ọ te kẹ erezi na wọhọ ukuoriọ,
19 re wha jẹ riẹ ogaga ulogbo nọ ọ kẹ omai enọ e rọwo na. Onana u dhesẹ oma via no evaọ iruo nọ ogaga ulogbo riẹ u bi ru,
20 onọ o dhesẹ via kpahe Kristi evaọ okenọ ọ kpare iẹe no uwhu ze jẹ rehọ iẹe keria obọze riẹ evaọ obọ odhiwu,
21 kpehru vi egọmeti gbe udu-esuo gbe ogaga gbe isuẹsu gbe odẹ kpobi, orọnikọ evaọ uyero-akpọ* nana ọvo ho rekọ te onọ o be tha na.
22 O te je fi eware kpobi họ otọ awọ riẹ, jẹ rehọ iẹe mu ọnọ o wuzou eware kpobi evaọ ukoko na,
23 onọ o rrọ ugboma riẹ, nọ o rrọ vọvọ ẹkwoma riẹ nọ o ru eware kpobi rrọ vọvọ evaọ kabọ kabọ.
