Ahwo Ẹfisọs 2:1-22
2 Ofariẹ, Ọghẹnẹ o ru owhai ziọ uzuazọ dede nọ wha whu no vẹre fiki iruthọ gbe izieraha rai,
2 enọ wha je jo yeri evaọ oke jọ wọhọ epaọ ahwo uyero-akpọ* nana, wọhọ epaọ oreva osu nọ ọ be kpọ ofou na, ẹzi nọ ọ be kpọ ahwo aghẹmeeyo.
3 Ẹhẹ, mai kpobi ma jọ udevie rai je ru eware lele isiuru uwo mai, je ru oreva uwo na gbe orọ iroro mai, yọ no oke nọ a ro yẹ omai ze, ma reabe ofu Ọghẹnẹ wọhọ amọfa kpobi.
4 Rekọ Ọghẹnẹ nọ o wo ohrọ-oriọ ulogbo fiki uyoyou ulogbo nọ o wo kẹ omai,
5 o ru omai ziọ uzuazọ kugbe Kristi, makọ evaọ okenọ ma ro whu no evaọ izieraha mai—a siwi owhai no fiki uwowou ulogbo.
6 U te no ere no, ọ kpare omai ze kugbei jẹ rehọ omai keria kugbei evaọ obọ odhiwu fikinọ ma rrọ usu kugbe Kristi Jesu,
7 re ọ ruẹse jọ uyero-akpọ* nọ o be tha na dhesẹ uwowou ulogbo riẹ fiki aruoriwo nọ o wo kẹ omai nọ e rrọ usu kugbe Kristi Jesu.
8 Uwowou ulogbo nana o wha riẹ ze nọ a ro siwi owhai fiki ẹrọwọ rai, yọ orọnọ fiki omodawọ rai hi; ukpoye okẹ Ọghẹnẹ o rrọ.
9 Ijo, o rrọ fiki iruo nọ ohwo o ru hu, re ohwo ọvo ọ gbẹ ruẹ oware ovuọvo ro seha ha.
10 Mai yọ iruo abọ Ọghẹnẹ, yọ ọ ma omai ẹkwoma usu nọ ma rrọ kugbe Kristi Jesu re ma ru iruo iwoma, enọ Ọghẹnẹ ọ jiroro rai fihọ otọ no anwẹdẹ inọ ma ti ru.
11 Fikiere, wha kareghẹhọ nọ evaọ oke jọ, enọ e yawo evaọ ugboma na a jẹ hai se owhai nọ e rrọ ahwo erẹwho efa na otu nọ e yawo ho.
12 Evaọ oke yena wha riẹ Kristi hi, wha wo usu kugbe orẹwho Izrẹl he, wha jọ erara kẹ evọ eyaa na; wha wo ẹruore he, yọ wha riẹ Ọghẹnẹ hẹ evaọ akpọ na.
13 Rekọ enẹna nọ wha rrọ usu kugbe Kristi Jesu na, whai enọ i thabọ no Ọghẹnẹ vẹre na, wha kẹle riẹ no fiki azẹ Kristi.
14 Keme ọye o ru omai wo udhedhẹ, o ru itu ivẹ na zihe ruọ ọvo je kporo ugbẹhẹ nọ o jọ udevie rai nọ o hẹriẹ e rai.
15 Ọ rehọ ugboma riẹ nọ o ro dhe idhe si egrẹ na no, Uzi nọ u wo ijaje sa-sa na, re ọ ruẹsi ru itu ivẹ na nọ e rrọ usu kugbe ọyomariẹ na zihe ruọ ohwo ọkpokpọ ọvo je ru ae wo udhedhẹ,
16 re ọ ruẹrẹ itu ivẹ na họ kugbe Ọghẹnẹ, a vẹ jọ ugboma ovo ẹkwoma ure-oja* na, keme ọ rehọ oma riẹ si egrẹ na no otọ no.
17 Ọ nyaze o te whowho usi uwoma udhedhẹ kẹ owhai enọ i thabọ vẹre gbe otu nọ e kẹle,
18 keme ẹkwoma riẹ, mai itu ahwo ivẹ na ma wo uvẹ nọ ma rẹ rọ rehọ ẹkwoma ẹzi ọvo lẹ se Ọsẹ na.
19 Fikiere wha gbẹ rrọ erara gbe ahwo orẹwho ofa vievie he, rekọ whai yọ emotọ kugbe erezi na, wha tẹ jẹ rrọ ahwo uviuwou Ọghẹnẹ,
20 yọ a bọ owhai fihọ otọhotọ orọ ikọ gbe eruẹaro na no, yọ Kristi Jesu họ utho ubienẹ otọhotọ na.
21 Uwou na soso nọ o rrọ usu kugbei, nọ a be whẹ abọ sa-sa riẹ họ kugbe ziezi, o be nyaharo bi zihe ruọ etẹmpol ọrẹri kẹ Jihova.*
22 Whai nọ wha rrọ usu kugbei na, a be bọ owhai kugbe re wha jọ uwou kẹ Ọghẹnẹ nọ ọ rẹ rria ẹkwoma ẹzi.
