Ahwo Ẹfisọs 3:1-21
3 Fiki onana, mẹ Pọl, ọnọ ọ rrọ uwou-odi fiki Kristi Jesu gbe fiki rai ahwo erẹwho na—
2 otẹrọnọ wha gine yo kpahe owha-iruo nọ Ọghẹnẹ ọ kẹ omẹ nọ me re ro fiobọhọ kẹ owhai wo erere no uwowou ulogbo Ọghẹnẹ ze,
3 inọ ẹkwoma eviavia a rọ fere oware udidi ọrẹri na via kẹ omẹ, wọhọ epanọ me kere kpẹkpẹe vẹre no na.
4 Fikiere, nọ wha ti se onana, wha ti vuhumu nọ me wo otoriẹ oware udidi ọrẹri nọ u kiekpahe Kristi na.
5 Evaọ ige nọ e vrẹ a fere oware udidi na via kẹ emọ ahwo ho wọhọ epanọ a rehọ ẹzi ọfuafo na fere iẹe via kẹ ikọ gbe eruẹaro riẹ no enẹna,
6 inọ, ahwo erẹwho na, nọ e rrọ usu kugbe Kristi Jesu gbe fiki usi uwoma na, a te jọ ibe ereuku kugbei gbe ahwo ugboma ovona, je lele omai reuku eyaa na.
7 Mẹ rrọ ọgbodibo nọ ọ be ta kpahe oware udidi nana fiki okẹ ọvọvẹ orọ uwowou ulogbo Ọghẹnẹ, onọ ọ kẹ omẹ ẹkwoma ogaga riẹ.
8 A dhesẹ uwowou ulogbo nana kẹ omẹ, mẹ nọ ọ kawo vi ọnọ ọ mae kawo evaọ usu erezi na kpobi, re me whowho usi uwoma kpahe ugbidigbi efe Kristi kẹ erẹwho na,
9 je ru ahwo kpobi ruẹ epanọ a be rọ kpọ eware nọ i wobọ kugbe oware udidi ọrẹri na, onọ Ọghẹnẹ, ọnọ ọ ma eware kpobi ọ kodhere evaọ ige kpobi nọ e vrẹ no.
10 Onana o jọ ere, re enẹna a ruẹse rọ ẹkwoma ukoko na fere areghẹ ologbo Ọghẹnẹ nọ ọ rrọ eghegha na via kẹ egọmeti gbe udu-esuo nọ e rrọ obọ idhiwu na.
11 Onana o rrọ epaọ ẹjiroro ebẹdẹ bẹdẹ riẹ nọ ọ jiroro nọ o ti ru ẹkwoma Kristi na, Jesu Olori mai,
12 ọnọ ma rọ ẹkwoma riẹ wo uvẹ nana nọ ma be rọ ta ẹme ududu jẹ be sae lẹ se Ọghẹnẹ avọ evaifihọ fiki ẹrọwọ nọ ma fihọ iẹe.
13 Fikiere mẹ be lẹ owhai nọ wha whrehe he fiki ikpokpoma nọ i bi te omẹ fiki rai, keme enana e te wha oruaro se owhai.
14 Fiki onana mẹ be hai kigwẹ lẹ se Ọsẹ na,
15 ọnọ ọ kẹ uviuwou kpobi evaọ obọ odhiwu gbe evaọ otọakpọ odẹ.
16 Mẹ be lẹ nọ ọ rọ fiki oruaro ulogbo riẹ fiobọhọ kẹ owhai jọ gaga evaọ ohwo nọ wha rrọ evaọ obeva avọ ogaga ẹkwoma ẹzi riẹ,
17 gbe re Kristi ọ rria udu rai avọ uyoyou fiki ẹrọwọ rai. Jọ wha dadamu jẹ jọ gaga evaọ otọhotọ na,
18 re wọhọ erezi na kpobi wha sai wo otoriẹ okẹkẹe gbe uthethei gbe ekpehru gbe ekodo uzẹme na ziezi,
19 re wha jẹ riẹ uyoyou Kristi onọ u vi eriariẹ, wha vẹ ruẹse vọ avọ iruemu iwoma kpobi nọ i re no obọ Ọghẹnẹ ze.
20 Whaọ Ọghẹnẹ ọ rẹ sae rehọ ogaga riẹ nọ u bi ru iruo evaọ oma mai ru eware buobu gbidigbidi kẹ omai vi eware kpobi nọ ma yare hayo nọ ma roro.
21 Jọ oruaro u tei ẹkwoma ukoko na gbe Kristi Jesu no ige te ige bẹdẹ bẹdẹ. Ami.
